Մանե Թանդիլյան. «Մենք օգտագործում ենք մեր մանդատները պաշտպան կանգնելու յուրաքանչյուր մարդու իրավունքներին». «Փաստ»

«Փաստ» օրաթերթը գրում է.

Ինչպես հայտնի է, մոտ երկու շաբաթ առաջ Գլխավոր դատախազությունը մերժեց «Ելք» խմբակցության միջնորդությունը՝ Անդրիաս Ղուկասյանին կալանքից ազատ արձակելու վերաբերյալ:

Մերժման պատասխանում նշված էր, թե դատական ակտերում իրավացիորեն արձանագրվել են կալանավորման կիրառման պայմանների և հիմքերի առկայությունը, վարույթն իրականացնող մարմնի կողմից գործի քննության պատշաճ ընթացքն ապահովելու հանգամանքը: Բացի այդ կիրառված կալանավորումն այլընտրանքային խափանման միջոց գրավով փոխարինելն անթույլատրելի է՝ հաշվի առնելով գործի քննության ընթացքում մեղադրյալի կողմից ոչ իրավաչափ վարքագիծ դրսևորելու բարձր հավանականությունը:

Սրա հետ կապված «Փաստը» զրուցել է «Ելք» խմբակցության պատգամավոր Մանե Թանդիլյանի հետ՝ պարզելու դաշինքի հետագա քայլերը` կապված Անդրիաս Ղուկասյանի խափանման միջոցը փոխելու հետ:

– Նախևառաջ նման պատասխանից հետո ի՞նչ հետևություն է անելու «Ելք» դաշինքը, և արդյոք Դուք կանխատեսո՞ւմ էիք նման պատասխան:

– Պատասխանն, ըստ էության, չի բավարարում մեզ, քանի որ այդ հիմնավորումը անհեթեթ է: Հիմնավորումը, թե ձեռք են բերվել բավարար տվյալներ, որ նրան անազատության մեջ չպահելը բավարար չէ նրա ոչ իրավաչափ վարքագիծը կանխելու համար: Այս հիմնավորումը միշտ կարելի է բերել յուրաքանչյուր դեպքի համար: Այն խիստ սուբյեկտիվ և կամայական դատողություն է: Մինչդեռ ՄԻԵԴ–ը այլ ուղեծիր է նախանշում կալանքը` որպես խափանման միջոց ընտրելու համար: Պետք է հստակ ապացուցել, որ ազատության մեջ գտնվողը կխուսափի կամ կխոչընդոտի դատավարությանը: Սակայն այս կամայական դատողությունը դեռևս բավարար հիմք չէ նման ծայրահեղ խափանման միջոց կիրառելու համար: Եթե կան հիմնավոր փաստեր, անհրաժեշտ է դրանք ներկայացնել:

– Անդրիաս Ղուկասյանին ազատ արձակելու շանսերը արդյոք փո՞քր էին:

– Վերոգրյալից պարզ է դառնում, որ եթե կամայական դատողություն չկիրառվեր, ապա, հաշվի առնելով նաև այն հանգամանքը, որ Անդրիաս Ղուկասյանը պատրաստ էր պարտավորագիր ստորագրել, իսկ մեր խմբակցության պատգամավորները` երաշխավոր կանգնել, որ նա չի խուսափի և չի խոչընդոտի դատավարությանը, շանսերն, իհարկե, մեծ էին: Դրա համար էլ դիմել էինք, քանի որ տեսնում էինք, որ չբավարարելու հիմքեր չկան:

– Հետագա քայլեր Անդրիաս Ղուկասյանին օգնելու տեսանկյունից կա՞ն, թե այս մերժումից հետո այլևս ոչինչ հնարավոր չէ անել:

– Այս պահին ընթանում են գլխավոր դատախազի հաշվետվության Խորհրդարանական լսումներ Ազգային Ժողովում: Մենք շարունակում ենք հարցը պահել ուշադրության կենտրոնում նաև այստեղ: Թե ինչ իրավական այլ հնարավորություններ կան, կդժվարանամ պատասխանել, սակայն մենք օգտագործում ենք մեր մանդատները պաշտպան կանգնելու յուրաքանչյուր մարդու իրավունքներին, որքանով որ պատգամավորական մանդատը լիազորում է մեզ դա անելու:

 

  Շարունակությունը` «Փաստ» օրաթերթի այսօրվա համարում: