Հարուստ լինելու համար պետք է կամ բաց հանքեր շահագործել, կամ էլ՝ ապահովագրական ծառայություններ մատուցել. «Փաստ»

«Փաստ» օրաթերթը գրում է.

Ամեն դեպքում նման եզրակացություն կարելի է անել՝ դիտելով 2017 թ. միջին ամսական անվանական աշխատավարձի ցուցանիշների տվյալներ` ըստ տնտեսական գործունեության ոլորտների:

Այս տարվա առաջին հինգ ամիսների ցուցանիշների համաձայն՝ Հայաստանում միջին ամսական անվանական աշխատավարձի աճ է գրանցվել 2016 թ. համեմատությամբ: Ու թեև այդ աճը հիմնականում չնչին, այսպես ասած, կոպեկների տարբերություն է եղել, սակայն ամեն դեպքում՝ հուսադրող է: Աշխատավարձերի բարձրացման մասին տեղեկանում ենք Ազգային վիճակագրական ծառայության 2017 թ. սոցիալ–տնտեսական վիճակի վերաբերյալ հրապարակումից:

Վերևում արդեն ասացինք, որ միջին ամսական անվանական աշխատավարձը ընդհանուր առմամբ ավելացել է, սակայն միաժամանակ պետական և ոչ պետական հիմնարկների տարանջատման ժամանակ պատկերն էականորեն փոխվում է: Ոչ պետական տնտեսական հատվածների մասով կարող ենք ասել, որ աշխատավարձերը միայն աճել են՝ նվազագույնը 2 հազար և առավելագույնը 9 հազար դրամի սահմաններում: Սակայն պետական ապարատին պատկանող հիմնարկների աշխատակիցների աշխատավարձերի բարձրացում նախորդ տարվա համեմատությամբ միայն այս տարվա մարտին և մայիսին է դիտվել: Իսկ մնացած ամիսներին հակառակը՝ նվազման միտում է դիտվել:

Վիճակագրությունից նաև տեսնում ենք, որ 2017 թ. ապրիլ ամսին միջին անվանական աշխատավարձը կազմել է 189 հազար 148 դրամ: Սա ընդհանուր համապատկերում, սակայն մայրաքաղաքի և մարզերի միջին ամսական անվանական աշխատավարձի արժեքներն էականորեն տարբերվում են միմյանցից և դրա արժեքը տատանվում է 117 հազարից 229 հազար դրամի սահմաններում:

Գուցե զարմանալի թվա, բայց ամենից բարձր միջին ամսական անվանական աշխատավարձ ստանում են Սյունիքի մարզում՝ 229 հազար 416 դրամ: Արդեն երկրորդ տեղում է Երևանը՝ 204 հազար 236 դրամով: Երևանից ու Սյունիքի մարզից բացի այլևս ոչ մի տեղ միջին ամսական անվանական աշխատավարձը չի հատում 200 հազար դրամի սահմանը:

Ուսումնասիրությունը նաև ցույց է տալիս, թե Հայաստանում որ մասնագիտություններն են ամենաեկամտաբերը: Դիտելով միջին ամսական անվանական աշխատավարձի տվյալներն ըստ տնտեսության հատվածների և տնտեսական գործունեության տեսակների՝ պարզ է դառնում, որ մեր երկրում լավ փող աշխատելու համար դու պետք է կամ ֆինանսական, կամ ապահովագրական ծառայությամբ զբաղվես, կամ տեղեկատվական և կապի ոլորտներում աշխատանք ունենաս, կամ էլ՝ հանքագործական արդյունաբերություն և բացհանքերի շահագործում իրականացնես: Այստեղ կարելի է նշել, որ վերոհիշյալ բնագավառներում աշխատանքներ տանելու արդյունքում միջին ամսական անվանական աշխատավարձը կտատանվի 365 հազարից մինչև 472 հազար դրամի սահմաններում:

Դե իսկ խորհուրդ չենք տա աշխատանք փնտրել մշակույթի, զվարճությունների և հանգստի կազմակերպման ոլորտներում: Այնպես չէ, որ դրանք լավ աշխատանքներ չեն: Պարզապես, ըստ այս վիճակագրության՝ 2017 թ. ապրիլ ամսվա դրությամբ ամենից ցածր միջին ամսական անվանական աշխատավարձ է սահմանված այս ոլորտի համար, այն է՝ 108 հազար 421 դրամ: Ընդ որում` պետական կառույցներում աշխատելու դեպքում այդ գումարը կարող է հասնել մինչև 114 հազար դրամի, իսկ ոչ պետականի դեպքում նվազել՝ կազմելով 97 հազար դրամ:

Վատ չեն վաստակում նաև էլեկտրականության, գազի, գոլորշու և լավորակ օդի մատակարարման ոլորտում աշխատող քաղաքացիները: Նրանք այս տարվա վերջին տվյալներով միջինում ամսական վաստակում են 264 հազար դրամ գումար: Իհարկե այնքան էլ հասկանալի չէ, թե լավորակ օդի մատակարարումն իրենից ինչ է ենթադրում, սակայն այսուհետ որոշ ընթերցողներ կարող են ավելի խորն ուսումնասիրել և համապատասխան կարողություններն ու հմտություններն ունենալու դեպքում մասնագիտության փոփոխություն կատարել:

  Շարունակությունը` «Փաստ» օրաթերթի այսօրվա համարում: