Ալիևի նախկին փեսան` ամերիկյան սկանդալի կենտրոնում

ԱՄՆ նախագահ Դոնալդ Թրամփը դարձյալ համաշխարհային մեդիայի ակնդետ ուշադրության կենտրոնում է հայտնվել: Այս անգամ առիթը որդու՝ Թրամփ կրտսերի հետ կապված սկանդալն է, ինչն արդեն մի քանի օր քննարկելով՝ ամերիկյան մամուլը համոզված է, որ Թրամփի վարչակազմն այլևս չի կարող հերքել իր կապը Կրեմլի և վերջինիս ազդեցության փաստն ամերիկյան վերջին ընտրությունների վրա:

Խնդիրն այն է, որ մամուլը պարզել, և Դոնալդ Թրամփ կրտսերն էլ հաստատել է որ 2016 թ. հունիսին ինքը, Թրամփի փեսա (ներկայումս նրա ավագ խորհրդական) Ջարեդ Քուշները և Թրամփի նախընտրական արշավի տնօրեն Փոլ Մանաֆորթը, որ հետո խորհրդականի պաշտոն զբաղեցրեց Սպիտակ տանը, Նյու Յորքում հանդիպել են ռուս փաստաբան Նատալյա Վեսելնիցկայի հետ, որն, իբր, ԱՄՆ նախագահի դեմոկրատ թեկնածու Հիլարի Քլինթոնի մասին գաղտնի տեղեկատվության է տիրապետել: Թրամփ կրտսերի խոսքերով՝ ավագ Թրամփը տեղյակ չի եղել հանդիպման մասին, որովհետև իրենք չեն կամեցել անհանգստացնել նրան, իսկ այն չեն բացահայտել, որովհետև չեն կամեցել առանց որևէ փաստարկի սևացնել Քլինթոնի վարկը: Նա նաև նշել է, որ ռուս փաստաբանն իրենց որևէ կարևոր տեղեկություն չի հաղորդել, և ընդամենը 20 րոպե տևած հանդիպման մասին, որն ուղղակի ժամանակի անհարկի կորուստ է եղել, իրենք չէին էլ հիշի, եթե մամուլը նորից աղմուկ չբարձրացներ: Թրամփ կրտսերն ազնվորեն խոստովանել է, որ հիշյալ հանդիպումը կազմակերպել է հոր նախընտրական շտաբի PR աշխատակից, բրիտանական տաբլոիդներից մեկի նախկին լրագրող Ռոբ Գոլդսթոունը, ինչից հետո ամեն բան ավելի հետաքրքիր է դառնում: Պարզվում է՝ Գոլդսթոունը, որ Թրամփի ընտանիքի հետ աշխատել է դեռ գեղեցկության մրցույթներ կազմակերպելու տարիներից, տիկնոջը ճանաչել է Ադրբեջանի նախագահի նախկին փեսա, Լեյլա Ալիևայի նախկին ամուսին, երգիչ և գործարար Էմին Աղալարովի միջոցով, որն էլ Գոլդսթոունին համոզել է գլուխ բերել, իբր, ձեռքի տակ կարևոր դոսյե ունեցող Վեսելնիցկայայի հետ հանդիպումը:

Վերջինս, ի դեպ, երեկ նույնպես ԱՄՆ հեռուստաէկրանների զարդն էր. Նա NBC news–ին տված հարցազրույցում նախ՝ հերքեց Կրեմլի հետ իր կապերը, ապա նշեց, որ շատ է զարմացել, երբ վաղեմի ծանոթներ Էմին Աղալարովն ու Ռոբ Գոլդսթունն իրեն հանդիպում են առաջարկել Թրամփ կրտսերի հետ: Ապա հավելել է, թե է՛լ ավելի է զարմացել, երբ նյու յորքյան հանդիպման ընթացքում Թրամփ կրտսերն իրեն սոսկ մի հարց է տվել՝ իսկապե՞ս իր ձեռքի տակ փաստաթղթեր կան, որոնք հաստատում են ԱՄՆ դեմոկրատական կուսակցության Ազգային կոմիտեի կապը կասկածելի ֆինանսավորման աղբյուրների հետ: Վեսելիցկայան պնդել է, թե ինքը, բնականաբար, հերքել է նման փաստաթղթերի գոյությունը, կամ՝ գոնե իր առնչությունը դրանց հետ, և վերջ: Դրանով ամեն բան ավարտվել է:

ԱՄՆ–ում, սակայն, այդ կարծիքին չեն: Դեմոկրատները և մամուլը պնդում են, որպեսզի ԱՄՆ–ի անցած նախագահական ընտրություններում Ռուսաստանի միջամտության գործը հետաքննող հատուկ դատախազ Ռոբերտ Մյուլերը, և Կոնգրեսի մի քանի տարբեր հանձնաժողովներ, որոնք միաժամանակ հետաքննում են Կրեմլի և Թրամփի թիմի միջև գաղտնի համաձայնության մասին գործի մանրամասները, այժմ ավելի մեծ ուշադրություն դարձնեն նույնիսկ աննշան մանրուքներին, ոմանք էլ առաջարկել են արագացնել նախագահի իմպիչմենթի գործընթացը, ինչը զայրացրել է նախագահ Թրամփին: Վերջինս գովանաբել է իր որդուն և նշել, թե նա շատ բաց, անկեղծ մարդ է, ինչի համար հոր ծափահարություններին է արժանի: Ինչ վերաբերում է ռուսներին՝ ՌԴ նախագահ Վլ. Պուտինի մամլո խոսնակն էլ իր հերթին է արձագանքել տարածվող աղմուկին՝ մեկնաբանելով ռուս փաստաբանի և Կրեմլի կապը: Մենք նույնիսկ չգիտենք, թե ով է նա՝ հայտարարել է Պեսկովը: