Սկանդալային կլինի, եթե Շվեդիայում Էրդողանի դեմ հայցի հիման վրա գործ հարուցվի և ձերբակալելու հիմքեր լինեն. շվեդահայ փաստաբան

Շվեդ օրենսդիրների կողմից Թուրքիայի նախագահ Ռեջեփ Թայիփ Էրդողանի դեմ ներկայացված ցեղասպանության, մարդկության դեմ ու պատերազմական հանցագործությունների իրականացման համար մեղադրանքի հիմքում, ըստ շվեդահայ փաստաբան Մարկ Սաֆարյանի, ավելի շատ քաղաքական պատճառներ են ընկած:

«Օրենսդիրները հավաքել են միջազգային կառույցների զեկույցներում տեղ գտած փաստերը, ըստ որոնց՝ 198 քաղաքացիական զոհեր են եղել, այդ թվում նաև՝ բավականին շատ երեխաներ»,- ասաց նա՝ նշելով, որ գործը Շվեդիայի դատաիրավական պրակտիկայում եզակի է, ընդհանրապես նման բան չի եղել:

Հիշեցնենք, որ 5 շվեդ օրենսդիր հայց է ներկայացրել երկրի դատախազություն՝ նշելով, որ Էրդողանը դերակատարում ունի 2015թ. ի վեր քուրդ զինյալների ու թուրքական զինված ուժերի միջև ընթացող արյունալի հակամարտության մեջ: Հայտնի է, որ Էրդողանից զատ, հայցում նշվում են Թուրքիայի վարչապետ Բինալի Յըլդըրըմի ու մի շարք թուրք նախարարների անուններ:

Շվեդահայ փաստաբան Մարկ Սաֆարյանը նկատեց, որ թուրք-շվեդական հարաբերությունները մշտապես լավ են եղել, դրանք սրվել են վերջին տարիներին:

«Հայոց ցեղասպանությունն ընդունելուց հետո Շվեդիայի հետ Թուրքիայի հարաբերությունները լարվել են: Դրան էլ հաջորդել է Շվեդիայի՝ գյուլենականներին ընդունելը, ինչը նույնպես զայրացրել է Էրդողանին»,- նկատեց նա:

Մարկ Սաֆարյանի խոսքով՝ այս պահի դրությամբ միայն Շվեդիայի խորհրդարանի պատգամավորները մեղադրանք են ներկայացրել, բայց դեռ ոչ մի դատախազ քրեական գործ մեղադրանքի հիման վրա չի հարուցել:

«Դեռ ոստիկանություն մեղադրանք է ներկայացվել, հայց է, ոչ մի դատախազ դեռևս դրա հիման վրա գործ չի հարուցել: Եթե դատախազը որոշի, որ հիմք կա գործ հարուցելու, բնականաբար Էրդողանին սպասվում է դատ»,- ասաց նա՝ նշելով, որ բավականին լուրջ մեղադրանք է ներկայացված և եթե քրեական գործ հարուցվի, հնարավոր է՝ Էրդողանը կալանավորվի:

Շվեդահայ փաստաբանը նշեց, որ այնուամենայնիվ չի կարծում, որ օրենսդիրների մեղադրանքի հիման վրա քրեական գործ կհարուցվի: Նրա կարծիքով՝ Շվեդիայի իշխանություններն այդքան հեռու չեն գնա, քանի որ չեն ցանկանա վերջնականապես խզել իրենց հարաբերությունները Թուրքիայի հետ:

«Երբ Շվեդիայի խորհրդարանը ճանաչեց Հայոց ցեղասպանությունը, արտաքին գործերի նախարարը ներողություն խնդրեց և ասաց, որ ամաչում է այդ որոշման համար, ինչը շատ տարօրինակ էր. կառավարությունը պետք է լոյալ լիներ խորհրդարանի որոշումներին, չպետք է ամաչեր: Դա նշանակում էր, որ այդ երկրների հարաբերությունները շատ բարձր մակարդակի վրա են: Ինձ համար անակնկալ էր, որ օրենսդիրները նման նախաձեռնությամբ հանդես եկան: Եղելությունը սկանդալային կլինի, սակայն այն ժամանակ, երբ դատախազը գործ հարուցի, և Շվեդիայում նրան ձերբակալելու բոլոր հիմքերը լինեն»,- ասաց նա:

Մարկ Սաֆարյանի խոսքով՝ Շվեդիայի օրենսդիրների նախաձեռնությունը նոր թափ է տալիս Հայոց ցեղասպանության ճանաչման մասին քննարկումներին: 

«Շվեդները բավականին տեղեկացված են Հայոց ցեղասպանությունից: Հայերի նկատմամբ էլ միշտ այստեղ դրական վերաբերմունք է եղել: Այս միջադեպն էլ առիթ է տալիս մտածելու, որ եթե Թուրքիան չի պատժվել նախկինում արածի համար, շատ մեծ ռիսկ կա, որ դա կկրկնվի: Իսկ քրդերի նկատմամբ հիմա կատարվողը անցյալի կրկնությունն է: Թուրքիան Արևմուտքից ստացել է կանաչ լույս՝ անելու այն, ինչ ցանկանում է, և քանի որ նրան չեն պատժում, ինքը շարունակում է իր քաղաքականությունը: Բայց ես կարծում եմ, որ Թուրքիան պետք է պատժվի, հատուցի իր արածների համար: Շվեդ պատգամավորների քայլն էլ դրան է ուղղված»,- ասաց նա: