ՍԱՊԾ լաբորատոր կենտրոնի ազատված փոխտնօրենը հաղթել է դատարանում. «Փաստ»

«Փաստ» օրաթերթը գրում է.

Գեորգի Ավետիսյանը, ով ՍԱՊԾ հանրապետական անասնաբուժասանիտարական և բուսասանիտարական լաբորատոր ծառայությունների կենտրոն ՊՈԱԿ–ի լաբորատոր գործունեության և հասարակայնության հետ կապերի գծով փոխտնօրենն էր, բայց անցյալ տարվա դեկտեմբերին ՍԱՊԾ նոր պետ՝ Իշխան Կարապետյանի նշանակումից հետո ազատվել էր աշխատանքից իր դիմումի համաձայն, իրեն վերականգնելու և փոխհատուցում տրամադրելու պահանջով դիմել էր առաջին ատյանի դատարան: Եվ ահա հունիսի 2–ին դատարանը բավարարել է նրա դիմումը, իսկ ՍԱՊԾ–ն այն բողոքարկելու նպատակով դիմել է Վերաքննիչ դատարան:

«Շատ ծիծաղելի և անգրագետ էր Վերաքննիչի դիմումը: Այնտեղ գրված էր՝ «Այս վճիռը 190 աստիճանով տարբերվում է այլ վճիռներից»: Անգամ չգիտեին, որ ոչ թե 190, այլ 180 աստիճան պետք է գրեին: Ինչևէ, բայց ես համոզված եմ, որ հաղթելու եմ: Նույնիսկ մեծ ցանկության դեպքում անգամ որևէ դատավոր չի կարող հակառակ վճիռ կայացնել, քանի որ ակնհայտ է օրենքի խախտումը: Նման քայլերի վերջը առնվազն պետք է Իշխան Կարապետյանի պաշտոնանկությունը լինի, եթե ավելի լուրջ քրեորեն պատժելի արարքներ տեղի չեն ունեցել, որից ես տեղեկություն չունեմ»,– ասաց Գ. Ավետիսյանը:

Եթե նորմալ աշխատանքային պայմաններ լինեին, ապա նա նոր պետի նշանակումից ու նոր ղեկավարության հետ կշարունակեր համագործակցել: Ի դեպ, լաբորատոր ծառայությունների տնօրենի տեղակալը ոլորտում հայտնի է որպես պրոբլեմների մասին բարձրաձայնող և ոչ թե սուտը ճշտի անվան տակ «մատուցող» և այսպես ասած ընդդիմադիր կեցվածք ունեցող մասնագետ: Եվ տրամաբանորեն նոր ղեկավարությունը պետք է որ նրա հետ ավելի արդյունավետ աշխատեր, քանի որ եկել էր ոլորտում ինչ–որ բան փոխելու, սակայն առաջին իսկ օրվանից նրանց ջրերը մեկ առվով չեն հոսել:

«Բայց ես շեշտում եմ, որ գնալու եմ, աշխատելու եմ և իմ գործունեությունն իրականացնելու եմ գրավոր՝ զեկուցագրերի «լեզվով», որովհետև ներկայի ղեկավարները բանավոր ասված լավ խոսքը չեն հասկանում և չեն էլ կարողանում ընկալել»,– ասաց Գ. Ավետիսյանը:

Նրա տեղեկացմամբ ոլորտում նշանակված նոր մասնագետների մեջ մասնագետներ չկան: Եվ թե՛ ՍԱՊԾ նոր պետը, թե՛ նրա բերած մասնագետները ոլորտի հետ որևէ կապ չունեն:

«Ամենօրյա աշխատանքը պատշաճ իրականացնելու համար հարկավոր է բազային կրթություն ունենալ: Դա վերաբերում է բոլոր ուղղություններին՝ սննդամթերքի անվտանգություն, անասնապահություն, հիվանդություններ, համաճարակաբանություն, հետազոտություններ:

Այսինքն, այս ամեն ինչի մասին մարդը պետք է էլեմենտար բազային գիտելիք ունենա, բայց ոչ ՍԱՊԾ նոր ղեկավարությունը, ոչ էլ իրենց բերած մարդիկ նման կրթություն չունեն:

Նրանք նույնիսկ տեղյակ չեն, որ եթե մարդիկ քաղծառայության օրենքով են աշխատանքի ընդունվել, ապա տնօրինությունը չի կարող հենց այնպես սեփական կապրիզից ելնելով ստիպել, որ դիմում տան ու ազատվեն աշխատանքից»,– ասաց Գ. Ավետիսյանը:

Սակայն այնպես էլ չէ, որ եթե նախկինում ՍԱՊԾ–ում մասնագետներ են աշխատել, ապա ոլորտը փայլել է իր թափանցիկությամբ կամ արդյունավետությամբ: Այս կառույցը մշտապես հայտնի է եղել իր սուբյեկտիվությամբ, իրականությունը թաքցնելու վարպետությամբ և ցանկացած նեղ մասնագիտական բանավեճի ժամանակ դժվար թե կարողանար հաղթող ճանաչվել: Ոլորտում եղել են նաև կաշառք պահանջելու կամ վերցնելու համար ձերբակալված աշխատակիցներ նույնպես: Այսինքն, ասել, որ այստեղ ամեն ինչ փայլուն էր, երբ քիչ թե շատ մասնագետներ էին աշխատում՝ կրկին միամտություն կլինի:

Զրույցի անասնապահության ոլորտին վերաբերող հատվածը կներկայացնենք հաջորդիվ:

 Շարունակությունը` «Փաստ» օրաթերթի այսօրվա համարում: