Քաթարին ուղղված պահանջները կրճատվել են

МЕЖДУНАРОДНОЕ 20 Июль, 2017 22:04

Մինչ Թուրքիայի Ռեջեփ Թայիփ Էրդողանը մտադրվում է հուլիսի 23–24–ին դիվանագիտական շրջագայության մեկնել Քաթար, Քուվեյթ և Սաուդյան Արաբիա՝ նպատակ ունենալով բարելավել հարաբերությունները Քաթարի ճգնաժամում ներգրավված երկրների միջև, հայտնի դարձավ, որ Սաուդյան Արաբիայի, Եգիպտոսի, Միացյալ Արաբական Էմիրությունների և Բարհրեյնի ներկայացուցիչները Կահիրեում հրավիրված հանդիպման ընթացքում կրճատել են Քաթարին ուղղված վերջնագրում ներառված 13 պահանջները՝ դրանց թիվը հասցնելով 6–ի:

Իսրայելական լրատվամիջոցները երեկ մեջբերում էին ՄԱԿ–ում Սաուդյան Արաբիայի ներկայացուցիչ Աբդալլա ալ–Մուալիմի խոսքը, ըստ որի՝ այժմ արաբական աշխարհն ավելի շատ կենտրոնացած է ահաբեկչության ու անջատողականության դեմ պայքարի, ահաբեկչության ֆինանսավորման դադարեցման և ահաբեկիչներին ապաստան տալու խնդիրների վրա: «Քաթարը պետք է դադարեցնի նման գործունեությունը և հեռու մնա սադրանքներից»,– հայտարարել է ՄԱԿ–ում Արաբիայի ներկայացուցիչը՝ հավելելով, թե վստահ է, որ այդ սկզբունքները ընդունելի կլինեն բոլորի համար: Միաժամանակ՝ դիվանագետը շեշտը դրել է հատուկ վերահսկողական մեխանիզմի ներդրման անհրաժեշտության վրա, որի արդյունքում միայն բոլորը կհամոզվեն Քաթարի հետագա անմեղության հարցում և նշել է, թե «դա սկզբունքային հարց է, որի շուրջ չեն կարող զիջումներ լինել»:

Ալ–Մուալիմը նաև նշել է, թե Ծոցի երկրները մի կողմ են դրել նաև Քաթարի Ալ–Ջազիրա հեռուստակայանի փակման նախապայմանը, և քանի որ նրա խոսքը հնչել է հայտարարության, ոչ թե հարցազրույցի մակարդակում, բնականաբար, որևէ լրագրող ի վիճակի չի եղել հակադարձել՝ հիշեցնելով, որ Ալ–Ջազիրան փակելու նախապայմանի վերացումը ոչ թե Ծոցի բռնապետների բարեհոգության, այլ ՄԱԿ–ի կտրուկ արձագանքի արդյունքն էր: Դեռ այս ամսվա սկզբին ՄԱԿ–ի գերագույն հանձնակատար Զեիդ Ռաադ ալ–Հուսեյնը կոշտ կերպով անդրադարձավ այս հարցին՝ իր ներկայացուցչի շուրթերով դիմելով արաբական քառյակին: «Անկախ նրանից՝ դուք դիտում եք այն, հավանում եք, համաձայն եք դրա խմբագրական դիրքորոշումների հետ, թե ոչ, Ալ–Ջազիրայի արաբական ու անգլիական ալիքներն օրինական հեռարձակում են ապահովում և ունեն միլիոնավոր դիտողներ: Դրանք փակելու պահանջն անընդունելի հարձակում է խոսքի ու կարծիքի ազատ արտահայտման իրավունքի նկատմամբ»,– ճեպազրույցի ընթացքում ասել էր Հուսեյնի վարչության աշխատակից Ռուպերտ Քոլվիլը՝ հուսալով, որ ուղերձը հասցեատերերին կհասնի: պաշտոնապես չէր անդրադարձել այս հայտարարությանը:

Դրանից մեկ օր առաջ անդրադառնալով «Վաշինգտոն պոստում» հրապարակված լուրին, թե՝ ԱՄԷ–ն է կոտրել Քաթարի կառավարության կայքը և այնտեղ կեղծ հայտարարություն տարածել Իրանին տարածաշրջանային անվտանգության երաշխավոր դիտարկելու վերաբերյալ, Քաթարի հանրային կապերի գրասենյակի տնօրեն Սեյֆ Բեն Ահմեդ Ալե Սանին ասել է, որ «դա միջազգային օրենքների, Պարսից ծոցի համագործակցության խորհրդի, Արաբական պետությունների լիգայի, Իսլամական համագործակցության կազմակերպության և ՄԱԿ–ի համաձայնությունների խախտում է, ինչի կապակցությամբ դատախազության հետաքննությունը կշարունակվի, և այդ քայլի հեղինակների դեմ անհրաժեշտ քայլեր կձեռնարկվեն»: Հետաքրքիր է, որ անմիջապես հետո ԱՄԷ–ի արտաքին հարցերով խորհրդատու նախարար Անվար Ղարղաշը և ԱՄՆ–ում Էմիրությունների դեսպան Յուսեֆ Ալ–Աաթիբեն հերքեցին այս մեղադրանքը, բայց, ինչպես երևում է, այս խմորը դեռ շատ ջուր կտանի:

Գոհար Սիմոնյան