Նորատուսցի Ալիկը չի ընդունում իրեն առաջադրված մեղադրանքը. պաշտպան

Շենգավիթ վարչական շրջանում գտնվող «Լիա» գեղեցկության սրահում մեկ տարի առաջ տեղի ունեցած սպանության գործով ամբաստանյալ Ալիկ Բանդուրյանը (Նորատուսցի Ալիկ) չի ընդունում իրեն առաջադրված մեղադրանքը: Այսօր՝ հուլիսի 20-ին, լրագրողների հետ զրույցում նրա շահերի պաշտպան Երեմ Սարգսյանը նշեց, որ  քրեական գործում իր պաշտպանյալի մեղադրանքը հիմնավորող բավարար ապացույցներ չկան:

«Դատաքննության ընթացքում կհամոզվեք, որ այդ մեղադրանքն ուղղակի աբսուրդ է, եւ այդ մեղադրանքը հիմնավորող ապացույցներ քրեական գործում չկան: Սա երեւի թե մշտական պրոցեսն է, որ հնչեղություն ունեցող գործերով ծանր մեղադրանքներին հնարավորինս ծանր որակումներ պետք է տրվեն: Օրենքն ասում է՝ մեղադրանքն ապացուցող բավարար հիմքեր, որպիսիք այս գործով չկան»,- նշեց նա:

Նրա խոսքով, քրեական գործում եթե ինչ-որ գաղտնալսում կա՝ գործի համար ապացույց չի կարող հանդիսանալ եւ չի կարող դրվել մեղադրանքի հիմքում:

 «Քրեական գործում գաղտնալսումներ առկա են, դրան կանդրադառնանք դատաքննության ընթացքում: Սակայն, եթե ինչ-որ գաղտնալսում կա, դա գործի համար ապացույց չի կարող հանդիսանալ եւ ընդհանրապես չի կարող դրվել մեղադրանքի հիմքում»:

Նշենք, որ գաղտնալսումները վերաբերում են Նորատուսցի Ալիկի եւ Չարբախցի Գեղամի հեռախոսային խոսակցություններին: Ըստ այդ խոսակցությունների՝ Ալիկը խոսելով սպանված Մուշեղ Մուշեղյանի մասին ասել է՝ դրան մորթեք, սատկացրեք, մահակներով ոտքերը ջարդեք:

Հիշեցնենք՝ 2016 թվականի նոյեմբերի 13-ին Երևանի Շենգավիթ վարչական շրջանում գործող «Լիա» գեղեցկության սրահում արձակված կրակոցների հետևանքով երկու անձ՝ Երևանի բնակիչներ Գ. Ավետիսյանը և Մ. Մուշեղյանը, ստացել են կյանքի հետ անհամատեղելի մարմնական վնասվածքներ և մահացել: Մուշեղյանի դիակի զննությամբ հայտնաբերվել էր նաև կտրող-ծակող առարկայով պատճառված մարմնական վնասվածք՝ որովայնի շրջանում։

Քրեական գործով ձեռնարկված մեծածավալ քննչական և օպերատիվ-որոնողական միջոցառումների արդյունքում պարզվել է միջադեպի շարժառիթը, անմիջական մասնակցություն ունեցած անձանց շրջանակը, անհատականացվել նրանց գործողությունները:

Մինչդատական վարույթում ձեռք բերված ապացույցների համակցությամբ՝ Պ. Իսրայելյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ա. Բանդուրյանին (մականունը՝ «Քյավառցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Ա. Գասպարյանին (մականունը՝ «Բդո»)՝ Քրեական օրենսգրքի 335-րդ հոդվածի 1-ին մասով: