Երգչուհի Մաշա Մնջոյանը նորություն ունի (լուսանկար)

Երգչուհի Մաշա Մնջոյանի ձեռքբերումների թիվը ևս մեկով է ավելացել: Օրերս  երգչուհին գերազանց ավարտել է Երևանի Կոմիտասի անվան պետական կոնսերվատորիան, ինչը նրան տվել է էլ ավելի վստահություն իր ուժերին և նոր գիտելիքներով առաջ շարժվելու մեծ հեռանկարներ:

Life.panorama.am-ի հետ զրույցում Մաշան պատմեց, որ չնայած ուսման տարիներին իր մեծ զբաղվածությանը, բայց նրան հաջողվեց ցանկալի արդյունքի հասնել. «Ուրախ եմ, որ իմ գործունեության համար շատ կարևոր մի աշխատանք արդեն արված է: Չնայած իմ մեծ զբաղվածությանն ու հաճախ երկարաժամկետ քաղաքից բացակայությանը՝ ուսման տարիներին ես ամեն ինչ արել եմ՝ հնարավորինս շատ բան սովորելու ու յուրացնելու: Երևանի Կոմիտասի անվան պետական կոնսերվատորիան ավարտեցի կարմիր դիպլոմով, ինչը խոսում է այն մասին, որ կարողացել եմ գոհացնել նաև իմ դասախոսներին»:

«Շատ տպավորիչ ուսանողական տարիներ եմ ունեցել, որոնք դեռ երկար եմ հիշելու: Պետք է նկատեմ նաև, որ դիպլոմների հանձնումը հետաքրքիր արարողությամբ կատարվեց: Նախ` քահանան օծման արարողություն իրականացրեց, ապա մեզ բարի ճանապարհ մաղթեց նոր կյանքում, իսկ հետո Երվանդ Երզնկյանը հանձնեց դիպլոմները»,-հավելեց երգչուհին:

Արդեն բակալավրի կոչում ունեցող երգչուհին մտադրություն ունի ուսումը շարունակել կոնսերվատորիայի մագիստրատուրայում: Ավելին՝ Մաշան ծրագրերում է նաև ուսում ստանալ արտերկրում, սակայն այդ ուղղությամբ դեռևս հստակ քայլեր չի անում:

Մաշա Մնջոյանը հայտնի դարձավ, երբ դեռ ընդամենը 17 տարեկան էր և դպրոցում էր սովորում: Սակայն երգչուհին իր առջև հստակ էր դրել՝ անկախ հայտնի ու սիրված լինելուց, իրեն մնայուն գիտելիքներ են պետք իր սիրելի ոլորտում:

Խոսելով մասնագիտական կրթություն ստանալու անհրաժեշտության մասին՝ Մաշան նշեց. «Մարդիկ տարբեր են իրենց մտածելակերպով, ոմանք տեսնում են սովորելու անհրաժեշտությունը, ոմանք՝ ոչ: Ինքս շատ եմ կարևորում ուսումը: Կարծում եմ՝ յուրաքանչյուր բարձրագույն ուսումնական հաստատություն մարդուն պետք է կայացած լինելու և կյանքում իր ճիշտ տեղը գտնելու համար: Գուցե այսօր ես ճանաչված եմ, սիրված, բայց վստահ եմ, այս ուսման կարևորությունը ես զգալու եմ տարիներ հետո: Երգիչը վստահ չի կարող լինել, թե ինչ կլինի իր ձայնի հետ հետո, իսկ ուսումը այդ հարցում մեծ նշանակություն կարող է ունենալ»:

Անդրադառնալով առաջիկա ծրագրերին՝ երգչուհին պատմեց, որ այս օրերին հիմնականում հանգստանում է. «Վերջին ամիսներին բավականին ակտիվ համերգային գործունեություն եմ ծավալել, այդ ակտիվությունը կշարունակվի արդեն աշնանը: Առհասարակ, ամառն ավելի պասիվ շրջան է մեր մասնագիտության համար: Վերջերս Հայաստան էին եկել իմ՝ Ավստրալիայի հարազատները: Եթե մշտապես ես էի իրենց հյուր գնում, այս անգամ հյուրընկալողի դերում էի: Միասին շատ լավ ժամանակ ենք անցկացրել հայրենիքում: Հիմա նրանք այստեղ չեն, ես շարունակում եմ վայելել ամառային գեղեցիկ օրերը և գուցե ամռան վերջին ես էլ փոքրիկ հանգսիտ կազմակերպեմ»,- ավարտեց երգչուհին: