Կևորկ Ափկարյան. «Մենք հայավարի չենք աշխատում.մենք եվրոպական որակ ենք ապահովում». «Փաստ»

«Փաստ» օրաթերթը գրում է.

1988 թվականի Սպիտակի աղետալի երկրաշարժից հետո ֆրանսահայ բժիշկները երկրաշարժի երկրորդն օրն արդեն Հայաստանում էին, իսկ երրորդ օրն արդեն սկսեցին տեղում վիրահատություններ կատարել և օգնել աղետից տուժած մեր հայրենակիցներին: Ֆրանսիայի «Փրիվ Նոռդ» (Prive Nord) հոսպիտալի անեսթեզիոլոգ–ռեանիմատոլոգ, «Նաիրի» ԲԿ–ի Թամարա Կազավի անվան օնկոլոգիական կենտրոնի հիմնադիր Կևորկ Ափկարյանը նույնպես այդ խմբի մեջ էր, ով հետագայում ընտրվեց Ֆրանսահայ բժիշկների միության նախագահ: Հետագայում արդեն, ֆրանսահայ բժիշկն, իր կոլեգաների հետ միասին, կարողացան մոբիլիզացնել համայնքի բոլոր հնարավորությունները և տարբեր բարեգործական ծրագրեր իրականացնել հայրենիքում: Այդ շրջանակներում «Էրեբունի» բժշկական կենտրոնում 1992–ին հիմնվեց քիթ–կոկորդի բաժանմունքը, որի համար բարերարների միջոցներից ծախսվեց 1,5 մլն ֆրանկ գումար (մոտավորապես 250000 եվրո):

«Տեսանք, որ բաժանմունքը շատ լավ է աշխատում: Բժիշկներին մենք ընտրեցինք, որոնք Ֆրանսիայում վերապատրաստվեցին: Հետագայում կինս հիվանդացավ քաղցկեղով: Դիագնոզը ես արեցի և նրան ասացի, որ թեև հիվանդ ես, բայց մենք գնում ենք Հայաստան»,– ասաց Կևորկ Ափկարյանը:

Մի օր Կ.Ափկարյանին է մոտենում մի քաղցկեղով հիվանդ ևս և խնդրում օգնել իր բուժումը Ֆրանսիայում կազմակերպել: Բայց երբ դեսպանատունը մերժում է նրան վիզա տրամադրել, նա ամուսնուն խնդրում է Հայաստանում քիմիաթերապիայի բարձրակարգ բաժանմունք հիմնել, որպեսզի օնկոլոգիական հիվանդները եվրոպական չափանիշներին համապատասխան պատշաճ բուժում կարողանան ստանալ:

«Երբ կինս հիվանդացավ, ես իմ բոլոր գործերը թողեցի և սկսեցի նրա բուժմամբ զբաղվել ու դարձա քիմիոթերապիայի մասնագետ: Նա այդ ժամանակ չգիտեր, որ ինքն էլ պետք է մահանա: Չգիտեր նաև, որ ես հետագայում պետք է իր խնդրանքը կատարեմ, բաժանմունք հիմնեմ և նրա անունով կոչեմ այդ բաժանմունքը»,– ասաց Կևորկ Ափկարյանը:

Բաժանմունքը հիմնելուց հետո երիտասարդ, ժամանակակից մտածող բժիշկ–մասնագետ պատրաստելու խնդիր է առաջացել: Մարդ, ով կկարողանար իր վրա վերցնել եվրոպական ստանդարտներին համարժեք քիմիաթերապիայի բուժում իրականացնել: Բաժանմունքի ղեկավարի ընտրության հարցն էլ փայլուն կերպով իրականացնելուց հետո արդեն 5 տարի է «Նաիրի» բժշկական կենտրոնում հիմնադրված և գործող բաժանմունքը կարողանում է բարձրակարգ որակ ապահովել:

«Ինձ համար շատ կարոր է բուժանձնակազմի հիվանդների, այցելուների հանդեպ վերաբերմունքը: Առաջին տեղում քաղաքավարության նորմերի պահպանումն ու հոգատարության ապահովումն է: Հայաստանում շատ հաստատություններում չեն կարողանում հեռախոսով պատշաճ պատասխանել մարդկանց, արագ հարցին պատասխանում են ու դնում լսափողը, առանց հաշվի առնելու, որ կարող է մարդը այլ հարց նույնպես ունենա: Դա կրթության պակասության հետևանք է, և այն մարդիկ, ովքեր այդպիսին են, շատ արագ հեռանում են մեր կոլեկտիվից: Մենք հայավարի չենք աշխատում: Մենք եվրոպական որակ ենք ապահովում: Բացի այդ բոլոր հիվանդների բուժումը նշանակվում է կոնսիլիումի կողմից, որն անվճար է իրականացվում: Հայաստանում նույնպես կամաց–կամաց հասկանում են, որ առանց կոնսիլիում հրավիրելու մեկ մասնագետի կողմից հիվանդի բուժումը նշանակելը հնարավոր չէ»,– ասաց Կևորկ Ափկարյանը:

Ֆրանսիայում բժիշկները միանձնյա որոշում կայացնելու և բուժում իրականացնելու իրավունք չունեն: Դա համարվում է ինքնագործունեություն: Առանց կոնսիլիումի հնարավորություն ապահովելու որևէ բուժհաստատություն չի կարող գոյատևել, քանի որ կզրկվի հավատարմագրումից: Մասնագետի խոսքով` Հայաստանում սա լուրջ խնդիր է, որը պետք է վերանայվի, քանի որ հիվանդության բուժման արդյունավետությունը մեծապես կախված է ճիշտ ախտորոշում և բուժում իրականացնելուց, ինչն անհնարին է մեկ մասնագետի միջոցով իրականացնել:

Նա նաև կոչ արեց Առողջապահության նախարարությանը ուշադրություն դարձնել այս ամենի վրա և միջոցներ ձեռնարկել, որ յուրաքանչյուր ինքնահռչակ «բժիշկ» չկարողանա սովորական ԱՁ–ի անվան տակ բժշկական կլինիկա բացել, ինքնագործունեությամբ զբաղվել և բժիշկների համբավն արատավորել:

Ինչ վերաբերում է «Թամարա Կազավի անվան օնկոլոգիական կենտրոնին», ապա հիմնադրման 5–ամյակի ընթացքում այն կարողացել է ամուր արմատներ գցել հայրենի հողում և զարգանալ: Դա նաև հույս է ներշնչում, որ «մահվան դատավճիռ» կոչվող այս հիվանդությանը հնարավոր կլինի հաղթել Հայաստանում նաև արտերկրում մասնագիտացած, որակյալ ու պատրաստված մասնագետների շնորհիվ:

Շարունակությունը` «Փաստ» օրաթերթի այսօրվա համարում: