ԿԳՆ–ն կրթության և ուսուցման ոլորտի բարեփոխումների ծրագիր է ներկայացրել

ОБЩЕСТВО 22 Июль, 2017 18:03

Կրթության և գիտության նախարարության կողմից մշակվել և Իրավական ակտերի նախագծերի հրապարակման միասնական կայքում շրջանառության է դրվել նախնական մասնագիտական և միջին մասնագիտական կրթության(Ն(Ա)ՄՄԿ) և ուսուցման 2017–2020 թթ. բարեփոխումների ծրագիրը:

Ծրագիրն ուղղորդված է ապահովելու նախնական և միջին մասնագիտական կրթության և ուսուցման ոլորտի կայուն զարգացումը` նախանշելով ոլորտի բարեփոխումների հիմնական ուղղությունները: Ն(Ա)ՄՄԿ ոլորտի բարեփոխումներն ուղղված են կրթության բովանդակության և կառուցակարգերի արդիականացմանը, կառավարման արդյունավետության բարձրացմանն ու նյութատեխնիկական բազայի ամրապնդմանը՝ Եվրոպայում այդ համակարգի զարգացման միտումներին համապատասխան:

Ն(Ա)ՄՄԿ բնագավառում պետական քաղաքականության խնդիրներից է այդ համակարգի զարգացումը և մրցունակության բարձրացումը: 2016/2017 ուստարում հանրապետությունում գործել են Ն(Ա)ՄՄԿ ծրագրեր իրականացնող 56 պետական ուսումնական հաստատություններ, որոնցում սովորում են շուրջ 7300 ուսանողներ, այդ թվում 7191–ը՝ անվճար հիմունքներով:

81 միջին մասնագիտական պետական ուսումնական հաստատություններում ուսանողների թվաքանակը կազմել է 21 հազար 225, որոնց 46,3%–ը կանայք են: Վճարովի ուսուցման համակարգում սովորել է ուսանողների 36,2%–ը, իսկ անվճար` 63,8%–ը: Ուսանողների համախառն ընդգրկվածության ցուցանիշը կազմել է 7,2% (կանանց` 4,2%, տղամարդկանց` 9,8%): Ուսանողների 91,9%–ը ստացել է 4000 դրամից ավելի կրթաթոշակ:

Ծրագրով մշակվել են Ն(Ա)ՄՄԿ մասնագիտությունների և որակավորումների պետական կրթական 167 չափորոշիչներ, համապատասխան ուսումնական պլաններ ու մոդուլային ծրագրեր: Վերանայվել են նախկինում մշակված Ն(Ա)ՄՄԿ 40 մասնագիտությունների ու որակավորումների պետական կրթական չափորոշիչներ, որոնց համապատասխան կազմվել են ուսումնական պլաններ և մոդուլային ուսումնական ծրագրեր:

Ն(Ա)ՄՄԿ ուսումնական հաստատության ղեկավարման իրավունք (հավաստագիր) ստանալու նպատակով 2017 թ. կազմակերպվել է 4 վերապատրաստման և 4 հավաստագրման գործընթաց, որի արդյունքում 151 վերապատրաստված անձից 115 ստացել են ուսումնական հաստատության ղեկավարման իրավունք: Մասնագիտական կրթության համակարգի աշխատողների և այդ համակարգի աշխատանքներում ներգրավված այլ համակազմերի անձանց համար իրականացվել են վերապատրաստումներ, որոնց ընթացքում վերապատրաստվել է շուրջ 2500 անձ:

Ըստ նախագծի՝ Ն(Ա)ՄՄԿ ոլորտի զարգացման քաղաքականությունն ուղղորդված է ապահովելու որակյալ անհրաժեշտ և համապատասխան պատրաստվածություն ունեցող երիտասարդների ու մեծահասակաների թվաքանակի զգալի ավելացումը՝ վերջիններիս համար արժանապատիվ աշխատանք գտնելու, գործազրկությունը նվազեցնելու և գործարարությունը խթանելու նպատակով:

Այսպես, 5–ամյա ծրագրի շրջանակներում Ն(Ա)ՄՄԿ ոլորտի զարգացման հիմնական խնդիրներն են արհեստագործական և միջին մասնագիտական կրթության համակարգի ու ուսումնական հաստատությունների արդյունավետության բարձրացումը, բնակչության բոլոր խավերի համար նախնական և միջին մասնագիտական կրթության մատչելիության ապահովում, Ն(Ա)ՄՄԿ շրջանավարտների շարունակական կրթության ապահովում, միջազգային ցանցերում մասնակցության ընդլայնում և այլն: Ն(Ա)ՄՄԿ ոլորտի 2017–2021 թթ. բարեփոխումների իրականացման հիմնական ակնկալվող արդյունքներն են` ուսումնական հաստատությունների դասավանդողների և ուսուցման վարպետների մասնագիտական կարողությունների հզորացում, արտադրություններում աշխատող մասնագետների՝ Ն(Ա)ՄՄԿ ուսումնական հաստատություններ մուտքի խրախուսում և բոլոր դասախոսների համար համապատասխան կազմակերպություններում մասնագիտական վերապատրաստումների կազմակերպում:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ