Siemens–ը գայթակղության քար է դարձել շատերի համար

МЕЖДУНАРОДНОЕ 22 Июль, 2017 22:03

Գերմանական Siemens ընկերությունն այնպիսի սկանդալի կենտրոնում է հայտնվել, որ դժվար թե կարողանա շատ արագ վերականգնել իր բարի համբավը: Արևմտյան մեդիայի և հատկապես ամերիկյան մամուլի փոխանցմամբ՝ այստեղ դեռ 1 տարի առաջ են արհամարհել լուրերն այն մասին, որ Կրեմլը այս ընկերության գործունեությունը ՌԴ–ում ծառայեցնում է սեփական նպատակներին և, անտեսելով պատժամիջոցները, Siemens–ից ձեռք բերված սարքավորումները ծառայեցնում է բոլորովին այլ նպատակների: Սկանդալի առիթը, հատկապես 4 գազային տուրբինները դարձան, որոնք ռուսները 2016–ին էին ներկրել Կրասնոդարի երկրամաս և, ինչպես այժմ նաև Siemens–ն է պնդում, ապօրինաբար տեղափոխել Ղրիմ, ինչը երկկողմանի պայմանագրի, ինչպես նաև՝ Ռուսաստանի նկատմամբ ԵՄ պատժամիջոցների հիման վրա հաստատված առևտրային կանոնների կոպտագույն խախտում է:

Գերմանական մամուլը 2 մասի է բաժանվել: Մի մասը պնդում է, որ ԱՄՆ–ի հատուկ ջանքերով Եվրոպայում պրոպագանդված այս պատժամիջոցները պիտի ընդհանրապես վերացնել, որովհետև դրանք Պուտինին չեն փոխում և փոխարենը միայն ՌԴ–ի հետ առևտրաշրջանառությունն են կիսով չափ կրճատելու, մյուս մասն էլ պնդում է, թե հակաամերիկանիզմը չպետք է որևէ մեկի ուղեղը մթագնի այնքան, որ չհասկանա ագրեսիվ Կրեմլին պատժելու անհրաժեշտությունը: Կա նաև վերջին խմբի շրջանակներում ձևավորված, այսպես կոչված, սուբ–խումբ, որին հարողները կարծում են, թե Պուտինին պիտի պատժել, բայց նաև հիմարություն է Siemens–ին մեղադրել այն բանի համար, որ նա ՌԴ–ում կրնկակոխ բոլորին չի հետևել՝ դրանով իսկ հեռանալով բիզնեսից և քաղաքականացնելով ընկերության գործունեությունը:

Ինչ կապ ունի այստեղ հակաամերիկանիզմը՝ դեռ կանրադառնանք: Առայժմ նշենք, որ սկանդալի կենտրոնում հայտնված Siemens դադարեցրել է սարքավորումների մատակարարումը ռուսական ընկերություններին, որոնք վերահսկվում են պետության կողմից, ինչպես նաև հայտարարել է, որ դուրս է գալիս ռուսական Интеравтоматика և Siemens технологии газовых турбин ընկերությունների հետ ձևավորած համատեղ ձեռնարկությունից: Ավելին՝ հայտարարել է, որ կշարունակի դատական կարգով հետապնդել իր հաճախորդ Технопромэкспорт–ին, որն էլ հենց տուրբինները Ղրիմ տեղափոխող կապալառուն է, ինչպես նաև՝ կշարունակի դատը Մոսկվայի արբիտրաժային դատարանում՝ ձգտելով հասնել արդեն իսկ Ղրիմ տարված տուրբինների վերադարձին և նոր առաքումներ անելու պլանների խափանմանը:

Դե ասեք՝ մի՞թե նորմալ է, որ բիզնես–ընկերությունն ամերիկյան դեմոկրատների ոճով գործի՝ հարցնում են նրանք, որոնք ինչպես վերևում նշեցինք՝ հակաամերիկյան տրամադրություններ ունեն, և բացատրենք՝ ինչու: Խնդիրն այն է, որ Վաշինգտոնի նկատմամբ հակակրանքի արմատները հիմնակում գալիս են ձախ թևից և Սառը պատերազմի ժամանակներից, որի ընթացքում Գերմանիայում խաղաղասիրական ավանդույթներ ձևավորվեցին: Խոշոր հաշվով, իհարկե, դա 2–րդ համաշխարհային պատերազմում պարտված և աշխարհի նկատմամբ իրեն մեղավոր զգացող Գերմանիայի, իսկ ավելի ստույգ՝ ձախերի դիրքորոշումն էր, որը շատ արագ տարածում գտավ երիտասարդության շրջանում: Ուսանողները հակաամերիկյան ցույցեր էին անում բոլոր դեպքերում՝ Վիետնամական, աֆղանական պատերազմների ընթացքում, շահական Իրանի ռեժիմի՝ ամերիկյան պաշտպանության օրերին, իսկ Ռեյգանի ռեժիմն առհասարակ Եվրոպայի անվտանգության հիմնական սպառնալիք էր դիտարկվում:

Գերմանիան, որը հավակնություն ուներ նոր Շվեյցարիա դառնալու, դեմ դուրս եկավ երկու գերտերությունների՝ ԱՄՆ–ի ԽՍՀՄ–ի ռազմադաշտը դառնալու սպառնալիքին, և սա իշխող տրամադրություն է նույնիսկ այս օրերին: Ընդ որում՝ թե՛ երիտասարդության, թե՛, այսպես կոչված, խաղաղասիրական դպրոցի վետերանների մոտ: 87–ամյա վետերան ակտիվիստ Էրհար էփփլերն, օրինակ, որը Բիլի Բրանտի կաբինետի նախարարներից էր, Der Spiegel–ում ուղիղ արհամարհանքով հակադարձեց ԱՄՆ դեմոկրատների այն տագնապներին, թե՝ Պուտինը միակն էր, որը Ղրիմում խախտեց միջազգային իրավունքը: Երբևէ մեկի մտքով կանցնե՞ր միջազգային իրավունքի խախտմամբ վարված իրաքյան պատերազմի պատճառով արգելքներ դնել ձեզ վրա՝ գրեց Էփփլերը, հավելելով, թե սխալ է, իհարկե, այն մտայնությունը, որ փողը հոտ չունի, բայց նաև սխալ է գործարարից ոչ թե մաքուր հաշիվ, այլ ամերիկյան դեմոկրատի պաթետիկ կեցվածք ակնկալելու պահվածքը: