Հացպանյան. «Աթեշյանը փորձում է համայնքի միամիտ անձանց վրա հենվելով՝ լեգիտիմացնել իր թեկնածությունը դնելու հնարավորությունը»

ОБЩЕСТВО 26 Июль, 2017 12:07

Երեկ տարածաշրջանային հարցերով փորձագետ–վերլուծաբան Սարգիս Հացպանյանը լրագրողների հետ հանդիպման ժամանակ ներկայացրեց, որ օրեր առաջ Ֆեյսբուք սոցիալական ցանցում հայտնվել է Արամ Աթեշյան (արքեպիսկոպոս) անունով թուրքերեն էջ: Հացպանյանը դիտելով էջը և Աթեշյանի բառապաշարին ծանոթ լինելով՝ հասկացել է, որ իր ընթերցածները Արամ Աթեշյանի հետ որևէ կապ չունեն: Ըստ Հացպանյանի՝ եթե էջը Աթեշյանի անունով է, դա դեռ չի նշանակում, որ վերջինս է այն վարում ու իրեն ուղղված հարցերին պատասխանում: Ըստ Հացպանյանի՝ Աթեշյանի էջում բազմաթիվ գրառումներ կային, որտեղ ասվում էր, թե չար լեզուներն իրենից բամբասում են ու վարկաբեկում:

«Աթեշյանի էջում կարդում եմ՝ «Ասում են, որ 11 հատ կնիկ ունեմ, չէ ես 8–ն ունեմ 11–ի տեղը: Ասում են, որ ես ամեն երկրում մի քանի հատ զավակ ունեմ»: Անհեթեթ, անլուրջ բաներ: Գրառումներ կան, թե իբր ինքը պոռնո վեբ–կայքեր հաճախելու համար ոստիկանության կողմից ձերբակալվել է, իսկ Աթեշյանն ասում է՝ գնացեք Թուրքիայի ոստիկանություն և հարցրեք՝ Արամ Աթեշյանի անունը առնչվե՞լ է նման բաների հետ,– ասաց Հացպանյանը՝ շարունակելով,– նման մեղադրանքներ չեն էլ եղել երբևէ: Չգիտեմ հորինում է, թե չէ: Ասում է՝ չար լեզուներն ասում են, որ... ու տակը շարում է: Գրում է, թե ինքը այդպիսի բաներ չի արել, սակայն ամեն ինչում իրեն մեղադրում են, բայց ինքն է Աղթամարի եկեղեցին վերականգնել, խաչը ինքն է դրել, պատարագներն ինքն է մատուցել, ինչը լրիվ հեքիաթ է: Լրիվ հակառակն է. խաչը չդրվեց հենց իր պատճառով, պատարագները չմատուցվեցին իր պատճառով: Այնքան շատ մեղքեր ունի այս մարդը»:

Հացպանյանը նշում է, որ «Մարմարա» օրաթերթի փոխխմբագիր Մաքրուհի Հակոբյանի ձեռագիրն է տեսնում այս ամենի մեջ: Բայց ասում է, թե նման կիրթ անձնավորությունն այսպիսի անկիրթ բան չէր անի՝ հավելելով, որ տիկին Մաքրուհին ուներ մի եղբայր, ով Թուրքիայից էր փախել, որի պատճառները այս շաբաթ կհրապարակվեն:

«Դրանից հետո հավանաբար տիկին Մաքրուհին էլ փախուստի կդիմի եղբոր մոտ՝ Լոս Անջելես: Գևորգ Հակոբյան անունով անձնավորությունը այս էջի հիմնական հեղինակն է: Այսինքն՝ Արամ Աթեշյան էջը չի պատկանում Արամ Աթեշյանին, ասեմ ավելին՝ Աթեշյանը չի հասկանում համակարգչից, չի կարող միացնել այն, գրառում անել: Ասում են՝ չարիքներից ամենամեծը տգիտությունն է, և դժբախտաբար վերջին 9 տարիներին Կ.Պոլսի պատրիարքարանը տառապում է այս միանձնյա բռնազավթում կատարած մարդուց»,– նշում է նա:

Սարգիս Հացպանյանը այս ամենի հետ կապված իր ենթադրություններն ունի: Ասում է, որ Կ.Պոլսում շատերի հետ է խոսել, և բոլորը միաբերան նշում են, որ Աթեշյանի կողմից արված այս քայլը՝ ֆեյսբուքյան էջ ստեղծելը, մի նպատակ ունի. Աթեշյանն այսօր հասկանում է, որ այլևս անգամ 0,01% շանս չունի պատրիարքական ընտրություններին մասնակից դառնալով քվե ստանալ:

«Եթե թեկնածությունն առաջադրեց, դա իր վերջին խայտառակությունն է լինելու: Ասում են՝ խեղդվողը փրփուրներից է կախվում: Երևի սա իր վերջին ճիգն է: Փորձում է իր ով լինել դեռևս չբացահայտած համայնքի միամիտ անձանց վրա հենվելով մեկ կամ երկու պատգամավորի հարց լուծել, որ գոնե լեգիտիմացնի իր պատգամավորության թեկնածությունը դնելու հնարավորությունը:

Ես երեկ եղել եմ Մայր Աթոռ Սուրբ Էջմիածնում և հանդիպել եմ Կ.Պոլսի պատրիարքական տեղապահ Գարեգին արքեպիսկոպոս Բեկչյանի հետ: Ժամեր շարունակ խոսել ենք, ինքը ևս զարմացած էր: Ասում է՝ Աթեշյանը շաբաթը 2–3 օրով գալիս է պատրիարքարան ու իր փոքրիկ սենյակում փակվում, զանգում է այստեղ–այնտեղ, 40 րոպե ժամավաճառ լինելուց հետո թողնում, գնում է: Իրեն ոչ ոք չի բարևում, բոլորից անտեսված է»,– նշեց նա:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ