Աշխատուժի առաջարկը 2016–ին նախորդ տարվա համեմատ աճել է 21%–ով

ЭКОНОМИКА 26 Июль, 2017 14:08

Զբաղվածության պետական գործակալությունը մի ուսումնասիրություն է կատարել, որից տեղեկանում ենք, որ 2016 թ. հունվար ամսվա դրությամբ ՀՀ–ում աշխատուժի պաշտոնական առաջարկը կազմել է 89 հազար 405 անձ, որոնցից 77 հազար 528 գործազուրկ են: Ընդ որում, ՀՀ–ում աշխատուժի պաշտոնական առաջարկը 2016 թ. հունվարի նախորդ տարվա նույն ամսի համեմատ աճել է 21,7 %–ով: Միևնույն ժամանակ, 2016 թ. հունվարին աշխատուժի պահանջարկը կազմել է 1517 անձ, ինչը նախորդ տարվա նույն ժամանակահատվածի նկատմամբ նվազել է 0,2%–ով: Այս պայմաններում, մեկ թափուր աշխատատեղի ծանրաբեռնվածությունը կազմել է 59։

Հետազոտության համար իրականացվել է հարցում, որին մասնակցել են ընդհանուր 2536 գործատուներ, որոնցից 24,2%–ը (կամ 613 գործատու) ներկայացնում են պետական հատվածը, իսկ 73,2%` (կամ 1857 գործատու) ոչ պետական: Կազմակերպությունների 2,6%–ը չեն նշել այս հարցի պատասխանը: Կազմակերպությունների 59,7%–ը եղել են առևտրային, 30,4%–ը` ոչ առևտրային, ևս 9,9%–ը չեն ցանկացել նշել իրենց կարգավիճակը: Առևտրային կազմակերպությունների կեսից ավելին` 59,1%–ը եղել են ՍՊԸ–ներ են, 9,3%–ը` ՓԲԸ–ներ, 3,2%–ը` ԲԲԸ–ներ և 28,5%–ը` ունեցել են այլ կարգավիճակ: Ոչ առևտրային կազմակերպություններից 4,4%–ը ունեցել են ՀԿ–ի կարգավիճակ, 12,2%–ը` հիմնադրամի, 0,6%–ը իրավաբանական անձանց միության, իսկ մնացած 82,7%–ը` այլ կարգավիճակներ: Կազմակերպությունների գործունեության միջին ժամանակահատվածը կազմել է մոտ 24 տարի: Կազմակերպությունների 73,7%–ը իրենց գործունեությունը իրականացրել է քաղաքային համայնքներում, իսկ 26,3%–ը գյուղական համայնքներում: Կազմակերպությունների` ըստ մարզերի բաշխումը համապատասխանում է սույն հաշվետվության երկրորդ գլխում բերված ընտրանքին:

Ըստ ուսումնասիրության՝ թվով 2536 կազմակերպություններում ընդգրկված են 89 հազար 844 աշխատողներ, միջինը մեկ կազմակերպությունում` մոտ 35 աշխատող: Աշխատողների 43%–ը ունեն բարձրագույն մասնագիտական կրթություն, 36%–ը` միջին կամ նախնական մասնագիտական կրթություն, իսկ մնացած 21%–ը` մասնագիտական կրթություն չունեն: Կազմակերպությունում աշխատողների 58%–ը կանայք են , իսկ 42%–ը` տղամարդիկ: Աշխատողների տարիքային բաշխումը ունի հետևյալ տեսքը. 16–29 տ.` 16%, 30–44 տ.` 40%, 45–63 տ.` 39%, 63–ից բարձր` 6%:

Կազմակերպությունները ըստ աշխատողների թվաքանակի բաշխվել են հետևյալ կերպ` գերփոքր (մինչև 10 աշխատող)` 26.5%, փոքր (11–50 աշխատող)` 51,2%, միջին (51–150 աշխատող)` 14,2% և խոշոր (151 և ավելի աշխատող)` 8,1% (վերջին երկուսը միասին` 22,3%): Հարցազրուցավարների կողմից արձանագրվել են բազմաթիվ դեպքեր, երբ մեծ և միջին կազմակերպությունները ուղղակի հարցման կեսից դադարեցրել են աշխատանքը` պատճառաբանելով զբաղվածությունը, պահանջելով հարցազրուցավարներից լրացուցիչ թույլտվություն հարցում անցկացնելու համար կամ բերել այլ պատճառաբանություններ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ