«Օշական» մանկական վերականգնողական կենտրոնը և «Հատուկ պոլիկլինիկա»-ն լուծարվեցին. կխնայվի 147 մլն դրամ

Կառավարությունը հավանություն տվեց  «Օշական» մանկական վերականգնողական կենտրոն» և «Հատուկ պոլիկլինիկա» փակ բաժնետիրական ընկերությունները լուծարելու մասին որոշման նախագծին: Առողջապահությաննախարար Լևոն Ալթունյանը նշեց, որ «Օշական» մանկական վերականգնողական կենտրոն» ՓԲԸ-ում ապահովվում է հենաշարժական և մտավոր խնդիրներով` գերազանցապես հաշմանդամ երեխաների վերականգնողական բուժօգնություն` առողջարանային ռեժիմով և լուծարման արդյունքում ընկերության կողմից մատուցվող ծառայությունները մատուցվելու են այլ նմանատիպ մասնագիտացված կենտրոնների կողմից։

«Ուսումնասիրությունները ցույց են տվել, որ ընկերության եկամտի միակ աղբյուրը պետական պատվերով մատուցվող ծառայություններն են: Ընկերությունը փաստացի որևէ տիպի վճարովի ծառայություն չի մատուցում՝ ի տարբերություն մրցակից այլ նմանատիպ կազմակերպությունների: Ընկերության ծախսերը խիստ ոչ օպտիմալ են, այդ թվում՝ սննդի, կոմունալ ծախսերի և աշխատավարձի մասով»,-  ասաց նախարարը:

Ըստ նախագծի, ներկայումս նմանատիպ ծառայություններ մատուցվում են մի շարք այլ մասնագիտացված կենտրոններում, և ընկերությունը չի համարվում  հանրապետական նշանակության բժշկական օգնություն և սպասարկում իրականացնող բժշկական կազմակերպություն: Ընկերությունն ունի ներդրումների խիստ անհրաժեշտություն` կապված տարածքային պայմանների բարելավման, վերազինման հետ, ինչի արդյունքում այն կլինի առավել մրցունակ:

Ընկերության լուծարման արդյունքում խնայողությունը կկազմի 47 մլն դրամ:

Ինչ վերաբերում է «Հատուկ պոլիկլինիկա» ՓԲԸ-ին, ապա այն սպասարկում է Երևանի պետական բարձրագույն ուսումնական հաստատություններում սովորող` Երևան քաղաքի, Հայաստանի Հանրապետության մարզերի, ինչպես նաև Լեռնային Ղարաբաղի Հանրապետությունից ու Վրաստանի Հանրապետության Ջավախքի տարածաշրջանից եկած ուսանողներին, որոնց այդպիսով հնարավորություն է ընձեռվում պետության կողմից երաշխավորված անվճար բժշկական օգնություն և սպասարկում ստանալ իրենց մշտական բնակության վայրից դուրս: Սպասարկում են շուրջ 60 000 ուսանողի:

Ընկերության հետագա գործունեության դադարեցման արդյունքում նախատեսվում է իրականացնել հետևյալ քայլերը` երևանաբնակ ուսանողների արտահիվանդանոցային բժշկական օգնությունը և սպասարկումը կազմակերպել այն պոլիկլինիկաներում, որտեղ ուսանողը օրենսդրությամբ սահմանված կարգով ընտրել է առողջության առաջնային պահպանման ծառայություններ մատուցող բժիշկ և գրանցվել վերջինիս մոտ` կատարելով համապատասխան փոփոխություններ և լրացումներ գործող չափորոշչում: ՀՀ մարզերից, Արցախի Հանրապետությունից ու Վրաստանի Հանրապետության Ջավախքի տարածաշրջանից եկած ուսանողների արտահիվանդանոցային բժշկական օգնությունը և սպասարկումը չափորոշչով սահմանված ծավալների շրջանակներում, ինչպես նաև վճարովի հիմունքներով սպասարկվող արտերկրի ուսանողների արտահիվանդանոցային բժշկական օգնությունը և սպասարկումը կազմակերպել Երևան քաղաքի պոլիկլինիկաներում` կատարելով համապատասխան փոփոխություններ և լրացումներ գործող իրավական ակտերում: ՀՀ կառավարության աշխատակազմին սպասարկող` կառավարության առաջին մասնաշենքում տեղակայված բուժկետի գործունեությունը ապահովել օրինակ՝ «Սուրբ Գրիգոր Լուսավորիչ բժշկական կենտրոն» ՓԲԸ-ի միջոցով: 9 բուհերում գործող բուժկետերը հանձնել համապատասխան բուհին` գործող օրենսդրության շրջանակում: «Սպորտային բժշկության» բաժանմունքը պատվիրակել ՀՀ սպորտի և երիտասարդության հարցերի նախարարության համապատասխան կառույցին կամ ՀՀ առողջապահության նախարարության ենթակայության բժշկական հաստատություններին:

Ընկերության լուծարման արդյունքում խնայողությունը կկազմի 100 մլն դրամ:

Առողջապահության նախարարի խոսքով, նշված ընկերություններին ուղղված ֆինանսական միջոցները կտրամադրվեն այլ կազմակերպությունների՝ բժշկական օգնությունն ու սպասարկումն առավել արդյունավետ իրականացնելու նպատակով: