Ֆրանկոֆոնիայի 8-րդ մարզամշակութային խաղերին ՀՀ պատվիրակությունը վերադարձել է բարձր պարգևներով

2017 թվականի հուլիսի 21-30-ը Կոտ դ’ Իվուարում կայացած Ֆրանկոֆոնիայի 8-րդ մարզամշակութային խաղերից Հայաստանի պատվիրակությունը վերադարձել է բարձր պարգևներով: Երկու մեդալ ստացել են մշակույթի ներկայացուցիչները, 7 մեդալ` սպորտի:

«Արմենպրես»-ի մամուլի սրահում հրավիրված ասուլիսում ՀՀ մշակույթի փոխնախարար Արև Սամուելյանը նշեց, որ, մշակույթի գծով  Հայաստանի պատվիրակությունը մասնակցել է «Երգ», «Պար», «Քանդակագործություն», «Նկարչություն», «Լուսանկարչություն», «Գրականություն», «Հեքիաթ» անվանակարգերում:

«Լուսանկարչություն» անվանակարգում Անուշ Բաբաջանյանն արժանացել է արծաթե մեդալի, իսկ «Գրականություն» անվանակարգում Աննա Բաղդասարյանն արժանացել է հատուկ մրցանակի, ինչպես նաև ստացել է Ֆրանկոֆոնիայի միջազգային կազմակերպության կողմից Ֆրանսիայի Լիոն քաղաքում պատմավեպի հրատարակության հրավեր: Մասնակցությունը շատ կարևոր է մեզ համար: Մենք նույնիսկ Հովհաննես Թումանյանի հեքիաթը ներկայացրեցինք ֆրանսերենով»,-ասաց Արև Սամուելյանը:

Եթե Ֆրանկոֆոնիայի մարզամշակութային խաղերին մշակույթի գծով մեր մասնակիցներն առաջին անգամ էին մրցանակներ ստանում, ապա սպորտի գծով սա արդեն երրորդ անգամ էր: ՀՀ սպորտի և երիտասարդության հարցերի փոխնախարար Գաբրիել Ղազարյանը հրավիրված մամուլի ասուլիսում նշեց, որ ի տարբերություն նախորդ տարիների, այս անգամ մեր մարզիկներն ավելի շատ մեդալների արժանացան: Ազատ ոճի ըմբշամարտում հանդես եկած Խաչատուր Պապիկյանն իր քաշային կարգում արժանացավ ոսկե մեդալի և դրամական խրախուսման, նույն ոճի տարբեր քաշային կարգերում Մարզպետ Գալստյանը, Վարուժան Կաջոյանը և Մխիթար Գրիգորյանն արժանացան արծաթե մեդալների, Վաղինակ Մաթևոսյանը, Աշոտ Վելիցյանը ստացան բրոնզե մեդալներ, իսկ ձյուդո մարզաձևից բրոնզե մեդալի շահեց Գրիգոր Սահակյանը:

«Մենք մասնակցել ենք 4 մարզաձևից, ազատ ոճի ըմբշամարտ, հեծանվասպորտ, ձյուդո, ատլետիկա, ընդհանուր առմամբ ունեցել ենք 7 մեդալ, մասնավորապես 1 ոսկե, 3 արծաթե, 3 բրոնզե: Ես կարծում եմ, որ սա լավ ցուցանիշ է, մեր մարզիկները շատ լավ ելույթ ունեցան»,- ասաց փոխնախարար Գաբրիել Ղազարյանը:

Ֆրանկոֆոնիայի մարզամշակութային խաղերին մասնակցում էր 87 երկիր, Հայաստանն ընդհանուր մեդալների հաշվարկով զբաղեցրել է 12-րդ հորիզոնականը:

Ֆրանկոֆոնիայի միջազգային կազմակերպությունը հիմնադրվել է 1970 թվականին, որում ընդգրկվել են 57 լիիրավ, 3 ասոցացված և 20 դիտորդի կարգավիճակ ունեցող պետություններ: Ֆրանկոֆոնիայի խաղերն անցկացվում են 4 տարին մեկ անգամ մշակույթի և սպորտի ոլորտներում: