Քննչական կոմիտեն առաջարկում է պահպանություն իրականացնող մարմիններին հստակ տարանջատել պատմության ու մշակույթի հուշարձանների տարածքները

 Հայաստանի Հանրապետությունում 2014 թվականին հոկտեմբերի 1-ից մինչև 2017 թվականի 1-ին կիսամյակի ընթացքում պատմության ու մշակույթի հուշարձանների ոչնչացնելու կամ վնասելու և առանձնակի արժեք ունեցող առարկաներ հափշտակելու դեպքերի առթիվ հարուցվել է 25 քրեական գործ: «Արմենպրես»-ի հաղորդմամբ` օգոստոսի 8-ին ՀՀ քննչական կոմիտեի կողմից նախաձեռնած տարբեր գերատեսչությունների հետ համատեղ պատմամշակութային հուշարձանների պահպանության, դրանց վերաբերյալ քրեական գործերի մասին  խորհրդակցության ժամանակ այս մասին ասաց Հայաստանի Հանրապետության քննչական կոմիտեի տարածքային քննչական վարչությունների գործունեության վերահսկողության գլխավոր վարչության պետ Թաթուլ Պետրոսյանը:

 Նրա խոսքով` 25 քրեական գործերից 8-ը հարուցվել է Արագածոտնի մարզի քննչական վարչության կողմից, 5-ը` Սյունիքի, 3-ը` Կոտայքում  և այլ տարածաշրջաններում:

«Հարուցված քրեական գործերից 5-ը մեղադրական եզրակացությամբ ուղարկվել են դատարան, որոնցից մեկը բժշկական բնույթի հարկադրական միջոցներ կիրառելու որոշմամբ:  Քրեական գործերից 7-ի  վարույթը կարճվել է , 9-ը քրեական գործ կասեցվել է հանցագործություն կատարած անձի ինքնությունը հայտնի չլինելու հիմքով, իսկ 4 քրեական գործի  նախաքննությունը դեռևս ընթացքում է գտնվում»,- ասաց Պետրոսյանը:

 Ըստ Հայաստանի Հանրապետության քննչական կոմիտեի տարածքային քննչական վարչությունների գործունեության վերահսկողության գլխավոր վարչության պետի` ուսումնասիրությունները ցույց են տվել, որ այս բնույթի հանցագործությունների բացահայտման հետ կապված կան որոշակի բարդություններ:

«Խոսքն առաջին հերթին վերաբերում է դեպքի վայրերի ոչ հստակ տարանջատմանը,  քանզի պատմամշակութային տարածքները հարակից հողատարածքներից չեն տարանջատվում, և չկան որևէ տարբերանշաններ: Քննարկվող հանցագործությունների կանխարգելման, կատարվող հանցագործությունների բացահայտման ուղղությամբ Քննչական կոմիտեն առաջարկում է պատմության և մշակույթի հուշարձանների պահպանություն իրականացնող լիազոր մարմիններին հնարավորինս տարանջատել այդ տարածքները, տեղադրել համապատասխան նախազգուշական տարբերանշաններ, ձեռնարկել համապատասխան միջոցառումներ այդ տարածքների պահպանության ուղղությամբ: Քննչական ստորաբաժանումների հետ կապված աշխատանքները ակտիվացնելու առումով և այս բնույթի հանցագործությունների քննության տակտիկային և մեթոդիկային առավելագույնս տիրապետելու նպատակով քննիչների համար անցկացնել մասնագիտական պարապմունքներ»,- նշեց Պետրոսյանը:

Նրա խոսքով` պատմամշակութային հուշարձանների պահպանության վերաբերյալ քրեական գործերի մասին խորհրդակցության ժամանակ հաշվի են առնվելու բոլոր գերատեսչությունների կողմից ներկայացված առաջարկություններն ու դիտարկումները և քննարկման արդյունքները ներկայացվելու են համապատասխան պետական մարմին:

ՀՀ քրեական օրենսգրքում պատմության ու մշակույթի հուշարձանների ոչնչացնելու կամ վնասելու վերաբերյալ նախատեսված է երկու քրեական հոդված.

Հոդված 180.Առանձնակի արժեք ունեցող առարկաներ հափշտակելը

1. Պատմական, գեղարվեստական կամ մշակութային առանձնակի արժեք ունեցող առարկաներ կամ փաստաթղթեր հափշտակելը պատժվում է ազատազրկմամբ՝ երեքից հինգ տարի ժամկետով:

Հոդված 264. Պետության պահպանության տակ գտնվող պատմության, մշակույթի հուշարձանները, ինչպես նաեւ պատմական կամ մշակութային առանձնակի արժեք ունեցող առարկաները կամ փաստաթղթերը ոչնչացնելը կամ վնասելը՝պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ուղղիչ աշխատանքներով՝ առավելագույնը մեկ տարի ժամկետով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով: