Ավարտվեց «Միասնության ուժ» ուսանողական, երիտասարդական, ռազմահայրենասիրական առաջին հավաքը

Պոլիտեխնիկի, ՀՀ և ԼՂՀ բարձրագույն ուսումնական այլ հաստատությունների ուսանողները օգոստոսի 2-8-ը Հանքավանի «Պոլիտեխնիկ» ուսումնամարզաառողջարարական ճամբարում արդեն երկրորդ անգամ մասնակցել են «Միասնության ուժ» երիտասարդական-ուսանողական հավաքին: Հավաքը կազմակերպվում է Հայաստանի ազգային պոլիտեխնիկական համալսարանի, ՀԱՊՀ ուսանողական խորհրդի և Հայաստանի երիտասարդական հիմնադրամի ջանքերով:

Ինչպես «Արմենպրես»-ին տեղեկացրին ՀԱՊՀ հասարակության հետ կապերի և լրատվության բաժնից, «Միասնության ուժ» ուսանողական-երիտասարդական հավաքը ՀՀ և ԼՂՀ բարձրագույն ուսումնական հաստատությունների և այլ կառույցների երիտասարդ ուսանողներին հնարավորություն է ընձեռում ոչ միայն մասնակցել մշակութային, ինտելեկտուալ և մարզական մրցույթների, այլև ընկերական մթնոլորտում ծանոթանալ, շփվել տարեկիցների հետ:

«Ազգ-բանակ» նախաձեռնության շրջանակում այս անգամ հավաքը մեկ հարկի տակ է համախմբել ինտելեկտուալ երիտասարդներին՝ ցույց տալով «Ազգ-բանակ»-ի միասնության ուժը: «Հզոր ենք, երբ միասին ենք» կարգախոսի ներքո այս տարի նույնպես շուրջ 210 երիտասարդ մրցեցին 3 ճակատներում, որոնք անվանակոչվել են Արցախյան և Քառօրյա պատերազմի պոլիտեխնիկցի հերոսներ Կարոտ Մկրտչյանի (Կարմիր ճակատ), Կարեն Ներսիսյանի(Կապույտ ճակատ) և Արամ Աբրահամյանի (Ծիրանագույն ճակատ) անուններով: Հավաքի պաշտոնական բացմանը ներկա էին Կարոտ Մկրտչյանի, Կարեն Ներսիսյանի և Արամ Աբրահամյանի ընտանիքների անդամները, հարազատները, Պոլիտեխնիկական համալսարանի ղեկավարությունը՝ ռեկտոր Ոստանիկ Մարուխյանը, ռեկտորի տեղակալ, ուսանողական խորհրդի նախագահ, հավաքի տնօրեն Գոռ Վարդանյանը,պրոռեկտորներ, պրոֆեսորադասախոսական անձնակազմի ներկայացուցիչներ։ Հրավիրված էին ՀՀ սպորտի և երիտասարդության հարցերի նախարար Հրաչյա Ռոստոմյանը, ՀՀ ԱԺ պատգամավոր, ՀԵՀ-ի Հոգաբարձուների խորհրդի համակարգող Կարեն Ավագյանը, ՀՀ և ԱՀ բարձրագույն ուսումնական հաստատությունների ներկայացուցիչ ուսանողական խորհուրդների նախագահներ:

Բացման արարողությունից հետո երիտասարդները ճաշել և քննարկումներ են ունեցել բարձրաստիճան հյուրերի հետ։ Հավաքի երրորդ օրը ճամբարականներին այցելել է ՀՀ ՊՆՎիգեն Սարգսյանը։ Ողջունելով ճամբարի մասնակիցներին` պաշտպանության նախարարը կարևորել է նման հավաքների նշանակությունը և հորդորել ազատ ժամանակն օգտագործել հայրենաճանաչողության ու լրացուցիչ գիտելիքներ ձեռք բերելու համար: Հանդիպման ընթացքում ՀՀ պաշտպանության նախարարը ներկայացրել է «Ազգ-բանակ» գաղափարախոսության հիմնադրույթները, անդրադարձել զինվորական ծառայության նոր պայմաններ առաջարկող «Ես եմ» և «Պատիվ ունեմ» ծրագրերին: Նախարարը ներկա է գտնվել նաև ճամբարականների ցուցադրական խաղերին, լսեց Արցախյան ազատամարտի և քառօրյա պատերազմի հերոսներ Կարոտ Մկրտչյանի,Կարեն Ներսիսյանի և Արամ Աբրահամյանի անունները կրող ճակատների անդամների հեղինակած նոր երգը և պատասխանեց ուսանողների բազմաբնույթ հարցերին: Հավաքի վեց օրում ճամբարականները մրցել են 15 մարզաձևերում, սովորել ռազմահայրենասիրական երգեր և պարեր։