Քիմ Քարդաշյանի էվոլյուցիան. Փերիս Հիլթոնի օգնականից մինչեւ ոճի կուռք

Այսօր իր ծննդյան 35-ամյակն է նշում աշխարհում ամենահայտնի հայուհիներից մեկը` Քիմ Քարդաշյանը, որի առեղծվածը միշտ էլ հետաքրքրում է իր միլիոնավոր երկրպագուներին։ Ինչպե՞ս Փերիս Հիլթոնի օգնական Քիմը դարձավ համաշխարհային ոճի կուռք։

Քիմը՝ 2006-ին

Քիմը նորաձեւությամբ սկսել է հետաքրքրվել պատանեկության տարիներից։ Նա ոգեշնչված էր «Clueless» ֆիլմով, որը եթեր է հեռարձակվել 1995-ի հոկտեմբերի 21-ին՝ իր ծննդյան 15-ամյակի օրը։ Աստիճանաբար Քիմը սկսում է հետեւել ֆիլմի ոճային հերոսուհիներից մեկին՝ Շեր Հորովիցին (Ալիսիա Սիլվերսթոուն), որը հմայիչ էր, հայտնի եւ հարուստ։ Եվ ինչպես Շերը, նա մեծ ուշադրություն էր դարձնում իր արտաքին տեսքին, հագուստին, զարդերին, աքսեսուարներին եւ այլն։ Սակայն Քիմն իր հայկական արմատների պատճառով երբեք էլ չէր կարող նմանվել շիկահեր Շերին։ 

Ավելին, 35-ամյա հայուհին սկսում է աշխատել հագուստի լավագույն բուտիկներից մեկում, քանի որ սիրում էր մշատպես տեղյակ լինել նորաձեւության վերջին միտումներից։

Քիմը՝ 2007-ին

Սակայն Քիմի մեծ սերը դեպի նորաձեւությունն ավելի ակնհայտ դարձավ, երբ հանդես եկավ որպես ոճաբան։ Նա սկսեց աշխատել Սինդի Քրոուֆորդի եւ Սերենա Ուիլյամսի հետ, այնուհետեւ դարձավ երգչուհի Բրենդիի եւ Փերիս Հիլթոնի անձնական ոճաբանը, քանի որ վերջիններս ամեն օր լուսանկարվում էին տարբեր ֆոտոշարքերում եւ նրանց հարկավոր էր մեկը, որը մշտապես գեղեցիկ տեսք կապահովեր իրենց։

Ժամանակի ընթացքում ռեալիթի աստղ Քիմը հայտնվեց «Երբ պարում են աստղերը» նախագծում, որում նա ամեն անգամ ներկայանում էր ճիշտ եւ մտածված կերպարներով։ Աստիճանաբար Քարդաշյանը սկսեց մեծ փառք վայելել: Նրա ընտրած զգեստներն ու արտաքին տեսքն ավելի գրավիչ ու գայթակղիչ էին, քան նրա ներկայացրած պարերը։

Քիմը՝ 2008-ին

Քիմին սկսեցին ասոցացնել սեքսի հետ «Keeping Up with the Kardashains» ռեալիթի շոուի այն սերիաներից հետո, երբ գեղեցկուհին նկարահանվում էր Playboy-ի համար։ 2003-ին՝ իր ծննդյան 23-ամյա հոբելյանի նախորդ օրը Քիմը նկարահանեց իր սեքս-հոլովակը, որը համացանցում հայտվեց 2007-ին։ Հոլովակը, որում ռեալիթի շոուի հանրահայտ աստղը ցուցադրում էր իր մարմնի բնական գեղեցկությունը, միանգամից նրան դարձրեց ամենահարուստ մեգաաստղերից մեկը, որը սկսեց գրավել ամբողջ աշխարհը։

Քիմը՝ 2014-ին

Այո, իր մարմինը ճիշտ ցուցադրելով՝ Քիմ Քարդաշյանը կարողացավ հասնել նման փառքի։ Չնայած վերջին քսան տարիների ընթացքում նրա կազմվածքը բազմիցս փոփոխվել է (սկզբում Քիմը նրբիրան եւ բարեկազմ կին էր, իսկ այժմ նա բավականին փարթամ կազմվածք ունի), միեւնույնն է, ռեալիթի շոուի հանրահայտ աստղն ունի մեկ գրավիչ հատկանիշ՝ ինքնավստահություն, որը նա երբեք չի կորցնում։

Քիմն՝ այսօր

 

Աղբյուրը՝ NEWS.am STYLE