Ադրբեջանում դժգոհողների քանակն ավելանում է, և դրա դեմ պայքարն անիմաստ է դառնում․ քաղաքագետ

Քաղաքագետ Հրանտ Մելիք-Շահնազարյանի խոսքով՝ Ադրբեջանի իշխանությունները շատ լավ էլ տեղյակ են երկրի հասարակական տրամադրություններից՝ երկրում առկա դժգոհության մեծ ալիքից, քանի որ  դա կանխատեսելի զարգացում էր:

Նա Tert.am-ի հետ զրույցում նկատեց՝ այն մարտավարությունը, որն ընտրվել է ադրբեջանական իշխանությունների կողմից՝ արտաքին սպառնալիքի, պատերազմի, վախի զգացում առաջացնելը, մի քանի ընտանիքների շահերի վերդասումը բնակչության շահերից, երկար ժամանակ հաջողություններ չէր կարող ունենալ և ուշ թե շուտ ստեղծելու էր մի իրավիճակ, երբ հասարակությունն էր ընդդիմանալու և չէր հավատալու պետական քարոզչամեքենային:

Անդրադառնալով իր կողմից հեղինակած վերջին «Ադրբեջանի հասարակությունը պահանջում է Ալիևից ընդունել պարտությունը» վերլուծականում եղած դիտարկումներին՝ նա պնդեց․ «Մենք հիմա տեսնում ենք հասարակության շրջանում բողոքի ալիքի մեծացման գործընթացի սկիզբ: Դժգոհություններ միշտ էլ եղել են, ժամանակներ են եղել, որ ադրբեջանական իշխանությունները փորձել են լռեցնել մարդկանց ձայները  և հաջողել են: Բայց հիմա դժգոհողների քանակն ավելանում է, և բնական է, որ դրա դեմ պայքարելն էլ է անիմաստ դառնում»:

Նա հիշատակեց Ադրբեջանի փոխնախարար, գնդապետ, հիմա Նորվեգիայում  քաղաքական էմիգրանտ համարվող Իսա Սադիգովի վիդեոբլոգում եղած քննադատությունները, որոնցով նա բացահայտում է Ադրբեջանի քաղաքական ղեկավարության չարաշահումները: «Նա Ադրբեջանի հասարակական տրամադրությունները արտահայտող հայտարարություններով է  հանդես գալու: Նա ասում է այն, ինչն ասելու կարիքը զգում են Ադրբեջանում, բայց ներսում արտահայտվելու ազատություն չունեն»,- նշեց նա:

Իր վերլուծականում հրապարակած Ադրբեջանի Զինված ուժերի գլխավոր շտաբի պետ Նաջմեդդին Սադիկովի՝ իրենց պաշտպանության նախարար Զաքիր Հասանովին հասցեագրած փաստաթղթի մասին էլ Հրանտ Մելիք-Շահնազարյանը ասաց՝ արժանահավատ է, իրական փաստաթուղթ: «Կայքը, որտեղ հրապարակվել է, մասնագիտացված է հենց Ադրբեջանի ռազմական գաղտնիքները, հակահայկական քաղաքականությունը բացահայտելու մեջ: Եվ եթե երկար ժամանակ հետևում ես, բնականաբար ձևավորվում են և՛ հատուկ աղբյուրներ, և՛ մարդիկ, որոնք ցանկանում են, որ ինչ-որ բաներ հայտնի դառնան, քանի որ իրենք չեն կարող դրա մասին հրապարակել: Նման ճանապարհով ձեռք բերված փաստաթուղթ է»,- ասաց նա՝ կրկնելով, որ փաստաթուղթը պարզապես Ադրբեջանում կատարվողին ուշադիր հետևելու արդյունք է:

Վերջերս Ադրբեջանի պաշտպանության նախարար Զաքիր Հասանովը եղել է Հայաստանին մոտ իրենց դիրքերում: Հրանտ Մելիք- Շահնազարյանը համաձայնեց այն դիտարկման հետ, որ  նման քայլերով ադրբեջանական ղեկավարությունը փորձում է պատերազմը դիտարկել որպես իշխանությունը պահելու ներքին ռեսուրս:

«Շարունակում է այն քաղաքականությունը, որը հետզհետե դուրս է գալիս իր հսկողության տակից, բայց շարունակում է:  Դա նաև պայմանավորված է նրանով, որ երկրի ներսում կան տարաձայնություններ նաև իշխանական ուժերի միջև: Գիտենք, որ նաև իրենց հատուկ ծառայությունների գրեթե ամբողջ ղեկավարությունը հեռացվեց պաշտոնից, շատերը ձերբակալվեցին, նոր կառույցներ են ստեղծվում: Հակասություններ կան նաև իրենց պաշտպանության նախարարության ղեկավարների միջև և այլն․․․Շատ խնդիրներ կան՝ դրանց գումարած ֆինանսական ճգնաժամը, նավթի գների անկումը և այլն: Ըստ այդմ, ադրբեջանական քաղաքական վերնախավը պետք է շարունակի իր մարտավարությունը՝ ժամանակ շահելու համար»,- նշեց նա:

Պատերազմի վտանգը, մշտապես Ադրբեջանի ձեռքում քարոզչական զենք է դառնում, որը, ըստ քաղաքագետի, այդ երկիրն օգտագործում է և՛ ներքին լսարանի, և՛ հայկական կողմի դեմ: «Ադրբեջանը հրետանին տեղակայում է բնակավայրերում և այնտեղից է հրետակոծումն հայկական սահմանները: Սկզբից կարծում էի, որ այդպես փորձում են պաշտպանվել իրենց բնակչության հետևում՝ հայկական կողմի հնարավոր պատասխաններից: Բայց արդեն ակնհայտ է դառնում, որ այդպես իրենք փորձում են իրենց հասարակությանը մշտապես վախի, պատերազմի մթնոլորտում պահել, որպեսզի ժողովուրդը չմոռանա, թե ինչ է պատերազմը: Այդտեղ ապրող ադրբեջանցիները փախչում են և իրենց խուճապը հաղորդում նաև հասարակության մնացած հատվածին»,- ասաց նա: