ՀՀ կառավարության որոշմամբ մարզերի առաջնահերթ հիմնախնդիրները լուծումներ կստանան

 ՀՀ վարչապետ Հովիկ Աբրահամյանի ղեկավարությամբ հոկտեմբերի 22-ին տեղի է ունեցել ՀՀ կառավարության հերթական նիստը: Ինչպես տեղեկացրին ՀՀ կառավարության տեղեկատվության եւ հասարակայնության հետ կապերի վարչությունից, կառավարությունն ընդուն ել է համապատասխան որոշում, որով մարզպետարաններին հատկացված միջոցների շրջանակում նախատեսված ծրագրերի պայմանագրերի կնքման արդյունքում տնտեսված 264 մլն դրամը կվերաբաշխվի այլ ծրագրերի միջև: Կարգավորման նպատակն է ՀՀ մարզերում իրականացնել կապիտալ և այլ բնույթի ծրագրեր, որոնց արդյունքում լուծում կտրվեն բնակչության և համայնքների  սոցիալական նշանակություն ունեցող հիմնախնդիրներին:

Գործադիրի որոշմամբ` Արագածոտնի մարզի Ապարանի Վ.Եղիազարյանի անվան թիվ 1 հիմնական դպրոցից հետ է վերցվել սեփականության իրավունքով տրված մասնաշենքը, օժանդակ շինությունը և  նվիրաբերվել  Ապարան քաղաքային համայնքին՝ վերակառուցման և որպես նախադպրոցական ուսումնական հաստատություն օգտագործելու պայմանով: Ապարան քաղաքի մանկապարտեզի շենքը 1988թ. երկրաշարժի հետևանքով դարձել է 4-րդ աստիճանի վթարային և չի շահագործվում, իսկ համայնքի երկու մանկապարտեզները գործում են վարչական շենքերի առաջին և կիսանկուղային հարկերի ոչ հարմարավետ տարածքներում:  

Կառավարության պահուստային ֆոնդից 7 մլն դրամ կհատկացվի Կոտայքի մարզի Սևաբերդ համայնքի համայնքային կենտրոնի շենքի վերանորոգման համար: Համայնքային կենտրոնի շենքում տեղավորված են բժշկական կետը, համայնքային գրադարանը, հանդիսությունների սրահը և այլ սպասարկող ծառայությունների տեղամասերը, ուստի անհրաժեշտություն է առաջացել հատկացնել որոշակի միջոցներ՝ խնդրին լուծում տալու համար:

Մարզպետարաններից աշնանացան ցորենի առաջին վերարտադրության սերմացուի ներկայացված պահանջարկը բավարարելու նպատակով կառավարությունը որոշել է փոփոխություններ կատարել նախկինում ընդունած որոշումներից մեկում: Պայմանավորված եղանակային բարենպաստ պայմաններով՝ մարզպետարաններից ներկայացվել է ևս 420 տոննա աշնանացան ցորենի լրացուցիչ պահանջարկ. այն կհատկացվի Արագածոտնի, Լոռու, Շիրակի, Վայոց ձորի և Տավուշի մարզերին: Սերմացուի հատկացման արդյունքում ցանքատարածությունները կավելանան 1400 հետկտարով: 

Գործադիրի որոշմամբ կառավարության պահուստային ֆոնդից գումար կհատկացվի Հայաստանի մի շարք գյուղական համայնքներում ՏԻՄ  հերթական ընտրությունների նախապատրաստման և անցկացման ծախսերը ֆինանսավորելու համար:  Ընտրությունները կայանալու են դեկտեմբերի 6-ին:

Կառավարությունը կշարունակի փոխհատուցել սիրիահայ ուսանողների ուսման վարձավճարները

Սիրիահայ երիտասարդության՝ հայաստանյան հանրություն ինտեգրելուն ուղղված ծրագրերն ու միջոցառումները, նրանց հիմնահարցերը շարունակում են մնալ կառավարության ուշադրության կենտրոնում: Ուսման վարձավճարի փոխհատուցումը սիրիահայ ընտանիքների, երիտասարդների սոցիալական, թերևս, ամենահրատապ և շարունակական լուծում պահանջող հիմնահարցերից մեկն է: Կառավարության որոշմամբ սիրիահայ ուսանողների 2015-2016թթ. ուստարվա վարձավճարի մասնակի փոխհատուցման համար պետբյուջեից կհատկացվի 24,656.0 հազ.  դրամ:

Փախստական ընտանիքները կապահովվեն բնակարաններով

Կառավարությունն ընդունել է «1988-1992թթ.-ին Ադրբեջանի Հանրապետությունից բռնագաղթած և Հայաստանի Հանրապետության քաղաքացիություն ստացած անձանց կողմից զբաղեցրած բնակելի տարածքները սեփականաշնորհելու մասին» որոշում, որի նպատակը երկար տարիներ հանրակացարաններում բնակվող փախստական ընտանիքներին բնակարանով ապահովելն է: Որոշմամբ՝ Արարատ քաղաքի Աբովյան փողոցի 12 հասցեում գտնվող հանրակացարանի բնակիչները կսեփականաշնորհեն իրենց կողմից զբաղեցրած բնակելի տարածքները:

Կառավարությունը հաստատել է Շիրակի և Արմավիրի մարզերում բնակարաններ ստացող բնակիչների ցանկը: Մարզպետները, որոշումն ուժի մեջ մտնելուց հետո հինգօրյա ժամկետում, նշված ընտանիքների հետ պետք է կնքեն ֆինանսական աջակցություն տրամադրելու վերաբերյալ պայմանագրեր:

Բարձրլեռնային վայրերում աշխատելու համար կտրվի լրավճար

Կառավարությունը սահմանել է, որ պետական և տեղական ինքնակառավարման մարմին չհամարվող պետական բյուջետային հիմնարկների աշխատողներին բարձրլեռնային վայրերում աշխատելու համար տրվում է լրավճար, որի չափը աշխատաժամանակի նորմալ կամ կրճատ տևողության դեպքերում կազմում է ամսական 8000 դրամ: Որոշմամբ առաջարկվում է պահպանել  պետական և տեղական ինքնակառավարման մարմին չհանդիսացող բյուջետային հիմնարկների աշխատողներին բարձրլեռնային վայրերում աշխատանքի համար լրացուցիչ վարձատրություն ստանալու երաշխիքը՝ որպես լրավճար:

Կարգավորիչ գիլյոտինը շարունակում է կրճատումներն ու պարզեցումները

Կառավարության նիստում հավանության են արժանացել Օրենսդրության կարգավորման ազգային կենտրոնի մի շարք առաջարկներ, որոնք վերաբերում են պետական և ծառայողական գաղտնիք պարունակող գյուտերի, արդյունաբերական նմուշների գաղտնիության աստիճանի որոշմանը: Մասնավորապես, առաջարկվել է կրճատել իրավասու մարմնի կողմից տրվող գրավոր եզրակացության, արդյունաբերական սեփականության օբյեկտի գաղտնազերծման դեպքում այդ մասին իրավատիրոջը ծանուցելու ժամկետները, ինչպես նաեւ սահմանել Մտավոր սեփականության գործակալության կողմից պետական կամ ծա ռայողական գաղտնիք կազմող տեղեկությունների առկայության ստուգման ժամկետ՝ հայտը ստանալուց հետո յոթ աշխատանքային օրվա ընթացքում:

Տնտեսական գործունեության պետական կարգավորման արդյունավետության բարձրացման, գործարար միջավայրի  զարգացմանը խոչընդոտող դրույթների վերացման նպատակով  կենտրոնը ուսումնասիրել է ձեռնարկատիրական ոլորտը կարգավորող իրավական ակտերի շրջանակը, դրանցում առկա բիզնես գործընթացները: Ըստ այդմ, առաջարկվել է ուժը կորցրած  ճանաչել 2002թ.-ի դեկտեմբերի 5-ի «Բորսային (ոչ ֆոնդային) առևտրի կազմակերպման գործունեության լիցենզավորման կարգը և բորսային (ոչ ֆոնդային) առևտրի կազմակերպման գործունեության լիցենզիայի ձևը հաստատելու մասին»  որոշու մը, քանի որ   «Լիցենզավորման մասին» ՀՀ օրենքում 2005թ.-ին կատարված փոփոխությունների արդյունքում նման  լիցենզիա չի նախատեսվում:

Մշակութային օջախները կկրեն իրենց հիմնադիրների անունները

Կառավարության որոշմամբ Համազգային թատրոնը կվերանվանվի հիմնադրի՝ ԽՍՀՄ և ՀՀ ժողովրդական արտիստ Սոս Սարգսյանի անունով: Նա թատրոնը հիմնադրել է 1991թ.-ին և ջանք ու եռանդ չի խնայել, որպեսզի ապահովի թատրոնի կայացման դժվարին աշխատանքը: Ս.Սարգսյանի մահից հետո Համազգային թատրոնը շարունակեց իր գործունեությունը՝ պահպանելով ու զարգացնելով իր հիմնադրի գաղափարներն ու ստեղծագործական մոտեցումները։ Այժմ էլ թատրոնի ստեղծագործական կազմը հենվում է սարգսյանական ավանդույթների վրա։

Մեկ այլ որոշմամբ բեմարվեստի ազգային փորձարարական «Գոյ» կենտրոնը կանվանակոչվի ՀՀ արվեստի վաստակավոր գործիչ Արմեն Մազմանյանի անունով: Նա

«Գոյ» փորձարարական թատրոնը հիմնադրել է 1988թ.-ին: Ա. Մազմանյանը որպես հիմնադիր և բեմադրող ռեժիսոր, մեծ դերակատարություն է ունեցել կենտրոնի կայացման և զարգացման գործում, նպաստել  թատրոնի և կինոյի զարգացմանը:

Միջազգային համագործակցություն

ԱՊՀ տարածքում միջազգային էլեկտրակապի հետագա զարգացման անհրաժեշտությունից ելնելով՝ գործադիրը համաձայնություն է տվել  «ԱՊՀ մասնակից պետություններում միջազգային էլեկտրոնային հաղորդակցության ծառայությունների մատուցման ժամանակ օպերատորների միջև փոխադարձ հաշվարկների իրականացման պայմանների մասին» համաձայնագրի կնքման առաջարկությանը:  

Կառավարությունը համաձայնություն է  տվել նաև ««Անկախ պետությունների համագործակցությունում ապրանքների ծագման երկրի որոշման մասին» 2009 թվականի նոյեմբերի 20-ի համաձայնագրում փոփոխություններ կատարելու մասին» արձանագրության կնքման առաջարկությանը, որով կպարզեցվի ապրանքի ծագման որոշման կարգը, ինչպես նաև հնարավորություն կտրվի առավել պարզեցված ընթացակարգերով մաքսազերծումներ անցկացնել ԱՊՀ երկրների միջև:

Այլ որոշումներ

Կառավարության որոշմամբ ամրագրվել է կալանավորված անձանց և դատապարտյալներին ծանրոցներ, փաթեթներ հանձնելու նոր արդյունավետ եղանակ՝ համացանցի միջոցով ուղարկելու հնարավորությունը։ Ներկայումս դրանք  հիմնականում ընդունվում են քաղաքացիների կողմից քրեակատարողական հիմնարկներ բերելու միջոցով, ինչն ավելորդ  դժվարություններ է առաջացնում։ Դատապարտյալներին և կալանավորված անձանց ծանրոցներ, փաթեթներ հանձնելու արդյունավետ միջոց է համացանցի միջոցով պատվերներ կատարելը։ Միջազգային փորձը վկայում է, որ դատապարտյալների կամ կալանավորված աÕ �ձանց համար առցանց եղանակով կարող են ձեռք բերվել միայն այն սննդամթերքը, առարկաները կամ իրերը, որոնք արգելված չեն:

Գործադիրը հավանություն է տվել սոցիալական պաշտպանության ոլորտի միասնական «Էլեկտրոնային սոցիալական ծառայություններ» տեղեկատվական համակարգի ներդրումն ապահովող միջոցառումների ժամանակացույցին:

Կառավարությունը նախկինում ընդունած որոշումներից մեկում կատարել է փոփոխություն, ինչի արդյունքում կկանոնակարգվեն Հայաստանի տարածքում հասարակական, կամավորական փրկարարական շարժման ձևավորման ու զարգացման հետ կապված հարաբերությունները, կվերանա կամավորական շարժմանն աջակցման հիմնադրամի ստեղծման անհրաժեշտությունը:

Կառավարության որոշմամբ վտանգավոր թափոնների վերամշակման, վնասազերծման, պահպանման, փոխադրման և տեղադրման լիցենզիաներ են տրվել  «Գրաֆեն-Շին» և «Առողջ սունկ» ՍՊԸ-ներին:

Նիստի վերջում հայտարարությունով հանդես է եկել ՀՀ պաշտպանության նախարար Սեյրան Օհանյանը և նշել, որ հանրապետությունում անցկացվում են  Հայաստանի ազգային հերոս Թաթուլ Կրպեյանի ծննդյան 50 ամյակին նվիրված միջոցառումներ, որոնց շրջանակում հոկտեմբերի 28-ին Ա.Սպենդիարյանի անվան օպերայի և բալետի ազգային ակադեմիական թատրոնում կկայանա հուշ-հանդիսություն: