Բագրատյանի առաջարկը «Ելքի» առաջարկի հակառակ ծայրահեղությունն է. Կոմկուսի առաջնորդ

Past.am-ը զրուցել է Հայաստանի Հանրապետության Կոմունիստական կուսակցության (ՀԿԿ) ղեկավար Տաճատ Սարգսյանի հետ` բոլշևիկների անունները կրող փողոցների վերանվանման, Բագրատյանի գրառման, ԵԱՏՄ-ին Թուրքիայի անդամակցման խոսակցությունների շուրջ:

- Հասկանալի է, որ Կոմկուսը դեմ կլինի բոլշևիկ գործիչների անունները կրող երևանյան փողոցները վերանվանելուն: Ինչպե՞ս կհակադարձեք «Ելք» դաշինքին:

- Մոդա դարձավ այդ հարցը: Ուրիշ գործ չունենք: Պետք է անունները փոխենք, որ հանրապետությունը «փրկենք»: Անկախության առաջին տարիներին էլ մենք դեմ էինք հնի ջարդել-փշրելուն: 27 տարի անց ի՞նչ նպատակով դա հիշեցին: Դրանից ո՛չ սոցիալական կյանքն է լավանում, ո՛չ արտագաղթն է կանգնում:

- Որոշ գործիչներ այս ամենը փորձում են հակառուսականության ներքո ներկայացնել: Ծայրահեղություն չե՞ն նման պնդումները:

- Ես համաձայն եմ նման այդ կարծիքների հետ: Դա արևմուտքի թելադրանք է՝ խաթարելու հայ և ռուս ժողովուրդների բարեկամությունը: Օրինակ՝ Միկոյանին են քննադատում, բայց այդ մարդու աշխատանքը պետք է հարգել: Միկոյանն աշխարհը փրկեց 3-րդ համաշխարհայինից: Մյուսները՝ Խանջյան, Մյասնիկյան, նույնպես խոշոր անհատականություններ եղել: Հիմա, եթե քաղաքական իրավիճակ փոխվի, այսօրվա փողոցնե՞րն են փոխելու: Պետք չէ հակադրել բոլշևիկներին, դաշնակներին, Արցախի համար իրենց կյանքը տված ազատամարտիկներին: Դրանով նաև սերունդների անջրպետն է խորանում: Ավելի կարևոր հարցեր կան, հարկավոր է դրանցով զբաղվել:

- Ձեր կարծիքով՝ այսօր ի՞նչն է Երևանում առավել օրհասական:

- Թող հեռանկարային ծրագիր կազմեն: Արդյունաբերական հզոր քաղաք էր Երևանը: Թող ուսումնասիրեն, թե ինչպես քանդվեցին մեր արդյունաբերական ձեռնարկությունները: Դպրոցներ փակվեցին քաղաքի կենտրոնում, ո՞վ սեփականաշնորհեց այդ տարածքները: «Ելքի» մեր երիտասարդ ընկերներին խորհուրդ կտամ, որ զբավեն դրանով, որպեսզի սոցիալական հոգսերը թեթևանան:

- Հրանտ Բագրատյանն էլ առաջարկում է, որ Հայաստանն Արմենիա անվանենք, կո՞ղմ եք:

-Նա սխալ է, երբ ասում է՝ լեզուն աղքատ է: Տեխնիկան զարգանում է, պետք է նոր բառերով լեզուն համալրել, տեխնիկական բառարան ստեղծել: Իսկ Արմենիա անվանելը «Ելքի» ասածի մյուս ծայրահեղությունն է: Ինչ է ակնկալում Բագրատյանը՝ Արմենիա ասելով: Չեմ կասկածում նրա գիտելիների վրա: Թող ժամանակին ճիշտ ղեկավարեր:

- Սարգսյան-Պուտին վերջին հանդիպմանը հետևե՞լ եք: Մեզ համար այս հանդիպումների արդյուվետությունն ու օգուտը ո՞րն է:

-Ռուսաստանը մեր ռազմավարական գործընկերն է: ԵԱՏՄ անդամ ենք: Արտաքին հարցեր կան, Արցախի հարցը կա: Իհարկե, այցերն արդարացված են: Բայց մամուլից կցկտուր ենք տեղեկանում, մնացածն իրենք կիմանան:

-Թուրքիայի անդամակցությունը ԵԱՏՄ-ին իրատեսակա՞ն եք համարում: Շատացել են այդ մասին խոսակցությունները:

-Թուրքիայի հարաբերություններն ԱՄՆ-ի և Եվրոպայի հետ լարվել են, դրա համար էլ առաջ են եկել նման հարցեր: Չգիտեմ, թե որքանով է արդիական, բայց բացառված չէ: Աշխարհում նոր դասավորվածություններ են տեղի ունենում, Անգլիան դուրս է գալիս Եվրամիությունից, իսկ Թուրքիան ոչ կերպ չի կարողանում մտնել: Գուցե Եվրոպային հակադրվելու համար են այս խոսակցությունները:

-Մենք անհանգստանալու բան ունե՞նք:

-Ռուսաստանը մեր բարեկամն է: Ինչպես ասում են՝ իմ բարեկամի բարեկամը նույնպես իմ բարեկամն է: Մեր հարևանը, եթե մեր բարեկամի հետ լավ լինի, մեր օգուտը կլինի: Մենք էլ նույն միության մեջ պետք է շփում ունենանք: Մնացածն արդեն ժամանակի հարց է:

Հարցազրույցը՝ Լևոն Փանոսյանի