Վաճառքի արգելք՝ «Միրինդա խնձոր» ըմպելիքի վրա

ՀՀ ԳՆ սննդամթերքի անվտանգության պետական ծառայության կողմից իրականցված պետական վերահսկողության արդյունքում «Ջերմուկ Ինթերնեյշնլ Պեպսի կոլա Բոթլեր» ՍՊԸ-ում հայտնաբերվել են «Միրինդա խնձոր» տեսակի գազավորված ըմպելիքներ, որի մակնշման մեջ նշված է՝ գունանյութ E102 (տատրազին), սակայն բացակայում է պարտադիր նախաշգուշացնող գրառումը՝ «պարունակում է գունանյութ (գունանյութեր), որը կարող է ունենալ բացասական ազդեցություն երեխաների ակտիվության և ուշադրության վրա»:

Ընկերության պահեստում առկա ողջ խմբաքանակի՝ 0.33լ – 19512 շիշ, 0.5լ – 13549 շիշ, 1.25լ – 3892շիշ և 2լ – 3846 շիշ, իրացումը կասեցվել է, տրվել է շուկայից «Միրինդա խնձոր» տեսակի արտադրանքի հետկանչի կարգադրագիր:

Այսինքն, մինչ այս, շատերը չեն իմացել, որ խանութում վաճառվող այս ըմպելիքը վտանգավոր է երեխաների և, ընդհանրապես, մարդկանց առողջության համար, իսկ անտեղյակ սպառողն այսքան ժամանակ պատշաճ տեղեկացված չի եղել, թե գազավորված այս ըմպելիքի հետ որքան վտանգավոր նյութ է կուլ տալիս:

Ոչ ոք չգիտի նաև, թե օրական կամ ամսական քանի «Միրինդա խնձոր» տեսակի գազավորված ըմպելիք է սպառվում: Կարճ ասած՝ քանի մարդ է արդեն հասցրել թունավորվել, պարզ չէ:

Հանուն անկեղծության նշենք, որ ոչ բոլոր սպառողները գիտեն, թե առողջության համար ինչքանով են վտանգավոր E-երով կամ այլ տառերով սկսվող հավելանյութերը: Մյուս կողմից էլ հնարավոր չէ ամեն վայրկյան խոշորացույցը ձեռքին ման գալ ու հետևողականորեն հաշվարկել, թե սննդամթերքի հետ օրական քանի գդալ E-անման թույն ենք ընդունում:

Ու եթե հանկարծ մի օր էլ պարզվի, որ դրանց քանակությունն առօրյա սննդակարգի չափաբաժնում այնքան է եղել, որ կարող էր նույնիսկ ծանր հետևանքներ առաջացնել մարդկանց ու նրանց սերունդերի առողջությանը, ապա այդ ժամանակ ո՞ւմ պետք է ուղղեն իրենց մեղադրանքները՝ արտադրողի՞ն, թե արտադրանքի պիտանելիությունը ստուգող պատկան պետական կառույցներին:

Արմինե Գրիգորյան