ԱՄՆ-ն «վերցնում» է հայկական բանակը

ԱՄՆ-ն Հայաստանի ինքնիշխանացման գլխավոր գործիքն է համարում բանակը

Հայաստանում ԱՄՆ դեսպան Ռիչարդ Միլզն առաջին անգամ չէ, որ հայտարարում է, որ իր երկիրը ցանկանում է Հայաստանին գործիքներ տալ, որոնք թույլ կտան ինքնիշխան որոշումներ կայացնել: «Բայց պետք է հստակ լինեմ՝ պարզորոշ ասել ենք, որ մեր նպատակն է համոզված լինել, որ Հայաստանը կարող է իր ինքնիշխան որոշումները կայացնել, թե որ ուղին է ընտրում, որ տնտեսական, քաղաքական մոդելն է ընտրում: Մենք ցանկանում ենք Հայաստանին գործիքներ տալ՝ շարունակելու կայացնել ինքնիշխան որոշումներ և վստահ լինել, որ Հայաստանը մյուսների կողմից ճնշման չի ենթարկվի՝ հետևելու մի ուղու, դեպի ուր Հայաստանը չի ցանկանում գնալ», ասել է նա Ազատություն ռադիոկայանին տված հարցազրույցում:

ԱՄՆ-ն ի՞նչ գործիքներ է առաջարկում Հայաստանի ինքնիշխանացման համար: Առաջին հայացքից գլխավոր ուղղությունն էներգետիկան է, որտեղ ԱՄՆ-ն առաջարկում է ներդրումներ, ազատականացում, տրանզիտ: Հայաստանն այս առաջարկներին դեռ չի պատասխանում, ընդհակառակը, ապամենաշնորհացման փոխարեն Բարձրավոլտ էլեկտրացանցերը նույնպես կառավարման են փոխանցվել Տաշիր ընկերությանը, որը Հայկական էլեկտրացանցերի սեփականատերն է: Ըստ երեւույթին, ԱՄՆ-ին հասկացնել են տվել, որ իրենց այդ ոլորտ չեն թողնի մտնել: Կարճ ասած, մյուսները նույնպես: Օրինակ, չնայած Հակակոռուպցիոն խորհրդի ստեղծմանն ու մի շարք օրենքների ընդունմանը, որոնց ԱՄՆ-ն աջակցել ու խրախուսել է, կոռուպցիայի դեմ պայքարը տեղից չի շարժվել:

Մի քանի ուղղություններ էլ կան: Օրինակ, ԱՄՆ-ն ու Հայաստանը մտադիր են չեղարկել կրկնակի հարկումը: Ինչպես նշում է ֆինանսների նախարար Վարդան Արամյանը, այս հարցը քննարկվելու է հոկտեմբերին: Բացի այդ, ԱՄՆ Կոնգրեսում հայկական կոկուսի անդամ Ադամ Շիֆը հայտարարել է, որ մտադիր է դիմել ԱՄՆ վարչակազմին՝ կոչ անելով Հայաստանը ներառել «Հազարամյակի մարտահրավերների» կրթական ծրագրում:

Սակայն, երեում է ԱՄՆ-ն ինքնիշխանացման գլխավոր գործիքն է համարում բանակը:

«Կարծում եմ, լավ օրինակ ունենք Հայաստանի ունակության առումով՝ հավասարակշռելու իր շահերը և աշխատելու Միացյալ Նահանգների հետ: Դա Հայաստանի մասնակցությունն էր Վրաստանում կայացած ՆԱՏՕ-ի «Ազնիվ գործընկեր» զորավարժություններին, որոնք այս օգոստոսի սկզբին էին», - ասել է Ռիչարդ Միլզը: Նա հիշեցրել է, որ այս տարվա մարտին ամերիկյան կողմի աջակցությամբ Հայաստանի ՊՆ «Զառ» ուսումնական կենտրոնում վերանորոգման աշխատանքներ են սկսել, որտեղ մարզվելու է հայկական խաղաղապահ գումարտակը:

«Հայաստանի խաղաղապահ բրիգադը և նրա ներգրավվածությունը Աֆղանստանում, Կոսովայում, Լիբանանում միջազգային դիվանագիտության մեջ Հայաստանի աճող կարևորության և միջազգային անվտանգության համար արված Հայաստանի ներդրման իրական չափանիշն է: Մեր ռազմական համագործակցությունն ավելի լայն է, քան վարժանքների այդ կենտրոնի շուրջ աշխատանքներն են կամ մեր աշխատանքը հայաստանյան խաղաղապահ բրիգադի հետ: Մենք կենտրոնացած ենք Հայաստանի զինված ուժերի հետ համագործակցության լայն շրջանակի ուղղությամբ»,- ասել է դեսպանը: Նա նշել է համագործակցության երեք հիմնական ուղղությունները՝ ռազմական կրթություն, ֆինանսական, ռազմական, ինչպես նաեւ մարդասիրական օգնություն:

Արկադի Տեր-Թադեւոսյանի տվյալներով՝ ԱՄՆ-ն հայկական բանակին նորագույն սարքավորումներ է տրամադրել, որը կարող է խորքային հետախուզություն իրականացնել: Այդ սարքավորումը փոխել է ուժերի դասավորությունը Ղարաբաղում եւ հնարավորություն տվել կանխել Ադրբեջանի կողմից ռազմական սադրանքները:

2014 թվականին, երբ ադրբեջանական կողմը խփել էր սահմանին ուսումնական թռիչք կատարող հայկական ուղղաթիռը, ամերիկյան կողմը չէր թաքցնում, որ օգնել է երեք հայ օդաչուների մարմինները տարհանելու գործում:

ԱՄՆ-ն ու Հայաստանը կխորացնե՞ն համագործակցությունը ռազմական ոլորտում: Սա, թերեւս, ինքնիշխանացման գործիքներից ամենահզորն է: