Սպառազինության ոլորտում Իրանի հետ գործակցությունը ձեռնտու է թե՛ Հայաստանին, թե՛ Իրանին և ոչ ոք չի կարող արգելել մեզ զարգացնել այն. Վ. Ոսկանյան

Իրանի պաշտպանության նորանշանակ նախարար, գեներալ Ամիր Հաթամիի հայտարարությունը, ըստ որի՝ իրենց գերատեսչության համար առաջնային նպատակ է իրենց դաշնակից պետություններին զենքի մատակարարումը, իրանագետ Վարդան Ոսկանյանի խոսքով, առաջին հերթին վերաբերում է Մերձավոր Արևելքի երկրներից Սիրիային, Լիբանանին, Աֆղանստանին և այլն: 

Tert.am-ի հետ զրույցում, սակայն, նա նշեց, որ չի բացառվում, որ Իրանի ՊՆ-ի ղեկավարը նկատի է ունեցել նաև Կովկասի տարածաշրջանում Հայաստանին զենք մատակարարելը:

«Այստեղ կա միայն մի նրբություն. հայկական բանակն իր սպառազինությունը հիմնականում ձեռք է բերում թե՛ Ռուսաստանի հետ երկկողմ, թե՛ ՀԱՊԿ-ի հետ համագործակցության շրջանակներում՝ գնելով զենքը ավելի մատչելի գնով: Եվ չեմ կարծում, որ Հայաստանն այս պահին իրանական զենքի կամ սպառազինության կարիքն ունի»,- ասաց նա՝ հավելելով, որ այնուհանդերձ հնարավորությունը բաց է, և իրանցիները Հայաստանը դիտարկում են որպես վստահելի գործընկեր, երկիր, որի հետ կառուցում են առանձնահատուկ հարաբերություններ:

Հիշեցնենք, որ Իրանի պաշտպանության նորանշանակ նախարար, գեներալ Ամիր Հաթամին հայտարարել է, որ գերատեսչության համար առաջնային նպատակ է երկրի հրթիռային ծրագրի զարգացումը, ինչպես նաև դաշնակից պետություններին զենքի մատակարարումը։

«Երբ երկիրը թուլանում է, մյուս պետությունները թև են առնում ու փորձում ներխուժել: Անհրաժեշտության դեպքում մենք զենք կմատակարարենք դաշնակից պետություններին, որպեսզի ապահովենք տարածաշրջանային անվտանգությունն ու կանխենք պատերազմները»,-ասել է Հաթամին:

Վարդան Ոսկանյանի խոսքով՝ եթե Հայաստանի և Իրանի ռազմական ոլորտի պատասխանատուները որոշում կայացնեն, ապա իրանական զենքը կարող է մատակարարվել նաև Հայաստան: «Դրա համար որևէ քաղաքական խոչընդոտ չկա, զուտ նպատակահարմարության խնդիր կարող է լինել»,- նշեց նա:

Իրանագետը նկատեց, որ երկու երկրների՝ պաշտպանական և անվտանգային ոլորտներում գործակցությունը հասել է բավականին բարձր մակարդակի: 

«Այս տարվա սկզբին մեր պաշտպանության նախարարն այցելեց Իրան:Հիմա, իհարկե փոխվել է Իրանի պաշտպանության նախարարը, բայց Իրանն այն երկրներից է, որտեղ անձերի փոփոխությամբ քաղաքականությունը չի փոխվում: Բնական է, որ Հայաստանի՝ այս ոլորտում գործակցությունը ձեռնտու է թե՛ Հայաստանի, թե՛ նաև իրենց համար»,- ասաց նա՝ նշելով, որ այս համատեքստում խոսք է գնում անօդաչու թռչող սարքերի դեմ պայքարի մասին: 

Վարդան Ոսկանյանը հավելեց, որ հաշվի առնելով, որ ոլորտը վերաբերում է անվտանգությանը՝ նուրբ թեմա, շատ մանրամասներ երկու երկրների նախարարների քննարկումներից չեն հրապարակվի:

«Պաշտպանության նախարարի մակարդակով հանդիպում էր, և չէին կարող չքննարկվել կարևոր խնդիրներ, և չէին կարող ձեռք չբերվել կարևոր համաձայնություններ»,- նշեց նա:

Վարդան Ոսկանյանը մատնանշեց՝ իսրայելական արտադրության անօդաչու թռչող սարքերն օգտագործվում են Ադրբեջանական Հանրապետության կողմից: «Դրանք կիրառվում են մեր դեմ և կիրառվում են նաև Իրանի դեմ՝ թե՛ ադրբեջանցիների կողմից ուղղակիորեն, թե՛ անուղղակիորեն՝ Իսրայելի կառավարողների կողմից: Բնական է, որ այս խնդիրները Հայաստանն ու Իրանը քննարկել են»,- նշեց նա:

Նրա խոսքով՝ բացի վերը նշվածներից՝ իրանցիներն ունեն բավականին մեծ փորձառություն թիկունքի անվտանգության պահպանման ոլորտում, և նրանց փորձառությունը կարող է օգտակար լինել մեզ համար: 

«Պետք է հաշվի առնել մի կարևոր հանգամանք. Հայաստանը փորձում է կառուցել բազմավեկտոր քաղաքականություն նաև անվտանգության ոլորտում թե ՀԱՊԿ-ի, թե, ինչո՞ւ չէ, ՆԱՏՕ-ի հետ համագործակցության համատեքստում»,- նշեց նա՝ շեշտելով, որ եթե իրանական կողմից լինի առաջարկ և այդ առաջարկը համապատասխանի մեր ստանդարտներին, ապա որևէ խոչընդոտ չի կարող Հայաստանի՝ Իրանից զենքի ձեռքբերման ժամանակ:

Անդրադառնալով դիտարկումներին, թե Ռուսաստանը մշտապես խոչընդոտում է Հայաստանին Իրանի հետ տարբեր ոլորտներում համագործակցելու հարցում, նա պատասխանեց. «Անշուշտ, Ռուսաստանի ներկայությունն այստեղ կա, անշուշտ այստեղ այդ պետությունն ունի շահեր, բայց շատ դեպքերում ռուսական շահերը չեն բախվում մեր շահերին՝ Իրանի հետ համագործակցության ոլորտում։ Որևէ մեկը չի արգելում և չի էլ կարող արգելել մեզ Իրանի հետ զարգացնել գործակցություն, հատկապես եթե հաշվի առնենք այն հանգամանքը, որ Հայաստանը գտնվում է շրջափակման մեջ, և կա մեր կենսունակությունն ապահովելու խնդիր: Որևէ մեկը չի կարող Իրանի հետ մեր համագործակցությունը սահմանափակել, մինչև չի լուծվել մեր՝ շրջափակումից դուրս գալու հարցը»: