Հայաստանը պատրաստ է տարեկան երեք միլիոն զբոսաշրջիկ ընդունել

Այս տարվա առաջին կիսամյակի՝ հունվար–հուլիս ամիսների տվյալների համաձայն՝ Հայաստանում ներգնա զբոսաշրջային այցելությունների թվի աճ ենք ունեցել, որը 24,2%–ով ավել է նախորդ տարվա նույն ժամանակահատվածում գրանցված ցուցանիշների նկատմամբ: Բացարձակ թվով ընդհանուր զբոսաշրջային այցելությունները կազմել են 622 հազար 381: Աճ ապահովող երկրների թվում են եղել Ռուսաստանը, Վրաստանը, Եվրամիության երկրները, Իրանը: Միաժամանակ հեռավոր արևելյան երկրներից այս տարի նույնպես նկատելի ու հետաքրքրիր դինամիկա կա, և նրանք նույնպես մասնակից են այս աճին: Մասնավորապես Չինաստանի, Կորեայի, Ճապոնիայի և Ֆիլիպինների քաղաքացիներն են Հայաստան շատ այցելել:

Այս մասին Past.am-ին պատմեց Զբոսաշրջության պետական կոմիտեի նախագահի առաջին տեղակալ Մեխակ Ապրեսյանը: Հարցին, թե ինչո՞վ է պայմանավորված այս տարվա նման ակտիվությունը, Ապրեսյանը պատասխանեց, որ սա համալիր միջոցառումների և այդ երկրներում նպատակային, ակտիվ մարքեթինգային միջոցառումների իրականացման արդյունք է:

Պատճառներից է թե՛ այդ երկրների քաղաքացիների համար Հայաստանի հասանելիության բարձրացումը, թե՛ սահմանային անցման գործընթացի դյուրացումը և թե՛ այստեղ գալու մատչելիությունը:

Ըստ Ապրեսյանի՝ այս շարքում առաջին տեղը զբաղեցնում է Ռուսաստանը, ինչի պատճառներից մեկն էլ հասանելիությունն է. ՌԴ քաղաքացիների համար Հայաստանում գործում է առանց վիզայի մուտքի ռեժիմ, բացի դրանից այս տարվանից լրացուցիչ հնարավորություն տրվեց նրանց ներքին անձնագրով Հայաստան գալու: Ըստ մեր զրուցակցի՝ մոտ ապագայում այս ամենն իր զգալի ազդեցությունը դեռ ունենալու է:

Ապրեսյանը նաև պատմեց, որ տարեսկզբից Հայաստանը դրսում ներկայացնելու և ճանաչելի դարձնելու ուղղությամբ մեծ աշխատանքներ են տարվել: Այդ նպատակով արդեն իսկ բազմաթիվ միջոցառումներ են իրականացվել: Նրա ներկայացմամբ՝ այս տարվա ընթացքում Հայաստանի մասին մի քանի ֆիլմեր են նկարահանվել ռուսների կողմից:

«Վերջերս համագործակցել ենք երեք հեղինակավոր հեռուստաընկերությունների հետ՝ ЮТВ, НТВ և ОРТ: ЮТВ–ի հետ նկարահանվել է «Посольство красоты» ֆիլմը, որը հոկտեմբերին կհեռարձակվի: НТВ–ին աջակցել ենք նկարահանելու հայկական թարխունի, ռեհանի, դրանից պատրաստվող եթերային յուղի, խտանյութի և օշարակի մասին պատմող ֆիլմ: Սա երկրի իմիջի, ինչու չէ նաև զբոսաշրջության ցուցանիշների բարձրացման առումով շատ կարևոր է:

ОРТ–ին աջակցել ենք հայ երկարակյացների մասին ֆիլմ նկարահանելու գործում, որը սեպտեմբերի 10–ից եթեր կգնա «Теория заговора» ծրագրի շրջանակներում»,– նշեց նա:

Բացի սրանից ֆիլմեր են նկարահանվել ֆիլիպինցիների ու կորեացիների կողմից ևս: Սրան զուգահեռ Իսրայելից ու Ուկրաինայից տուրօպերատորների այցեր են իրականացվել:

Հարցին, թե ծով, մերձարևադարձային բնություն ունեցող երկրներին Հայաստանն ի՞նչ կարող է առաջարկել կամ ի՞նչ փորձեր են արվում մեկ անգամ Հայաստան այցելած մարդուն կրկին այստեղ բերելու համար, Ապրեսյանը պատասխանեց.

«Մեր քաղաքականության հիմնական խնդիրներից է հայկական զբոսաշրջային արդյունքի դիվերսիֆիկացումը, նոր մրցունակ զբոսաշրջային արդյունքների ձևավորումը, շուկաների դիվերսիֆիկացումը, դրանց պատշաճ փաթեթավորումը և այդպիսի մրցունակ արդյունքներով Հայաստանի ներկայացումը համաշխարհային շուկայում»: Հարցին էլ, թե կոմիտեի կողմից գոյություն ո՞ւնի մի հաշվարկ, որը ցույց կտա, թե Հայաստանը տարեկան որքան զբոսաշրջիկ կարող է ընդունել, մեր զրուցակիցն ասաց, որ ոչ միայն հաշվարկ կա, այլև իրենք նպատակ ունեն առաջիկա 5 տարիների ընթացքում դեպի Հայաստան ներգնա զբոսաշրջային այցելությունների տարեկան թիվը հասցնել 3 միլիոնի: Ընդ որում 2016 թ. այդ թիվը կազմել է 1 միլիոն 260 հազար դրամ:

Նշենք նաև, որ ըստ հետազոտությունների` մեկ վիճակագրական զբոսաշրջիկը Հայաստանում մեկ այցելության դեպքում միջինում ծախսում է 700–800 ԱՄՆ դոլար: Ըստ այս հետազոտության՝ կարող ենք ասել, որ այս տարի միայն զբոսաշրջության շնորհիվ ունեցել ենք ավելի քան 460 միլիոն դրամի եկամուտ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ