Եվրոպան հետապնդում է ամերիկյան տրանսազգային հսկաներին

Եվրոպան իսկական հետապնդում է սկսել ամերիկյան տրանսազգային կոորպորացիաների նկատմամբ, և դրա պատճառը մոնոպոլիաները, ամենատարբեր զեղծարարություններն ու թաքցվող հարկերն են՝ համոզված է Եվրոպական հանձնաժողովը: Վերջին շրջանում, իհարկե, ամենաշատը Բրյուսելի հետ բարդ հարաբերություններ ունեցող Google–ի մասին խոսվեց, որին տուգանեցին 2,4 մլրդ դոլարի չափով: Բայց չպետք է մոռանալ նաև Apple–ին, որին Իռլանդիայում ծավալած գործունեության համար տուգանեցին 13 մլրդ դոլարի չափով, այժմ նաև` Amazon.com Inc.–ին, որի եվրոպական գործունեությունը մանրամասնորեն ուսումնասիրվում է ԵՀ համապատասխան մարմնի կողմից:

Բրյուսելում բացատրում են, որ իրենք մեծ սխալ են գործել ամերիկյան տրանսազգային կոորպորացիաների դեպքում՝ ակնդետ չհետևելով արդարացի մրցակցության ու հարկային պարտավորությունների պատշաճ կատարման ողջ շղթային: Կոնկրետ Amazon–ի պարագայում՝ Եվրահանձնաժողովի հակամենաշնորհային մարմնի պաշտոնյա Գերտ Յեն Կուպմանը հայտարարում է, որ կարճ ժամանակամիջոցում Եվրոպայում բոլոր նմանատիպ հարթակներին մեկուսացնելու՝ ընկերության հաջողությանը հնարավոր էր միայն հարկային պարտավորությունների չկատարման պայմաններում հասնել: Եվ պնդում են, որ Բրյուսելում առկա մտահոգությունները պիտի ամենայն մանրամասնությամբ փարատվեն՝ առանց ուշադրություն դարձնելու ոմանց, այդ թվում՝ Եվրոպայի ներսում հնչող տեքստերին:

Ամենայն հավանականությամբ, Բրյուսելն այս դեպքում Լյուքսեմբուգի դքսությանը նկատի ունի, որն իր հարկային օրենսդրության միջոցով օտարերկրյա ընկերություններին տրվող արտոնությունների շնորհիվ ԵՄ հակամենաշնորհային մարմնի աչքի փուշն է դարձել: Եվրահանձնաժողովը Amazon ինտերնետ–ռիթեյլերի հաջողությունների մի մասը հենց լյուքսեմբուրգյան գործունեությանն է վերագրում՝ հիշելով դեռ 2003–ի դեպքերը, երբ նույն ընկերության դուստր–ձեռնարկությունը՝ EU Sarl–ին, ԵՄ հակամենաշնորհային մարմնի կողմից կասկածվեց տրանսֆերային գնագոյացման միջոցով հարկեր վճարելում: Ինչ է դա նշանակում՝ պարզ է. մի քանի անգամ նվազեցվում է շահույթը, նաև՝ վճարվելիք հարկերի չափը, և դա էլ իր հերթին տնտեսական գերազանցություն՝ մենաշնորհ է առաջացնում մյուս նմանատիպ ընկերությունների նկատմամբ: Այն ժամանակ բանը դատարան չհասավ, բայց այժմ, Amazon–ը, Starbucks Corp., Fiat SpA, Engie SA–ն և էլի շատերը չեն խուսափի դատական կարգով հետապնդումից: Կուպմանի խոսքով՝ Եվրոպայում իրենց համար հարկային դրախտ հայտնաբերած ամերիկյան հսկաների ու ավելի փոքր ընկերությունների թիվը մոտ 300–ի է հասնում: «Մեզ համար հարկերի վճարումից ու ազատ–արդար մրցակցությունից ավելի կարևոր բան չկա»,– երեկ նա բացատրել է Bloomberg–ին, որտեղ փորձել են հասկանալ, թե ինչ չափանիշերով են ընտրվում Բրյուսելի կողմից հետաքննվող ընկերությունները: Եվ չի էլ թաքցրել իր գոհունակությունն այն առիթով, որ Լյուքսեմբուրգն ու Իռլանդիան, նաև իրենց ժողովրդի ճնշման ներքո, տեղի են տվել Բրյուսելին՝ խոստանալով փոփոխել իրենց հարկային օրենսդրությունը: «Հնարավոր է՝ մենք դեռ նոր սկզբի վերջում ենք, հնարավոր է՝ մեզ ավելի խայտառակ բացահայտումներ են սպասվում: Բայց, վստահ եմ, հաղթանակը մերն է լինելու»,– հայտարարել է Կուպմանը՝ նման լավատեսությունը բացատրելով այն հանգամանքով, որ ԵՄ հակամենաշնորհային պայքարի թիկունքում են կանգնած եվրոպական այնպիսի ծանրաքաշներ, ինչպիսիք՝ Գերմանիան, Ֆրանսիան, Իտալիան և այլք:

Էջը պատրաստեց Գոհար Սիմոնյանը