Տարիներ շարունակ սփյուռքահայ ներդրողները բախվել են դեպքերի, որ ազդել են ՀՀ հեղինակության վրա. այդ բացասական հետքերը մաքրելու համար ՀՀ-ն պետք է լուրջ հետաքննություն տանի. տնտեսագետ

Հայաստանը փոքր շուկա ունեցող պետություն է: Օտարերկրյա ներդրումների ոլորտում հաջողության հասնելու համար Հայաստանը պետք է մրցակցային առավելություններ առաջարկի ներդրողներին: Tert.am-ի հետ զրույցում այս մասին ասաց տնտեսագետ Վիլեն Խաչատրյանը:

Տնտեսագետն ասաց, որ ներդրողները ներդրում կատարելու որոշում են կայացնում մի շարք գործոններից ելնելով, իսկ Հայաստանը ներդրում իրականացնելու պոտենցիալ պետությունների շարքում չկա, որովհետև նրանց հետ չի մրցակցում:

«Եթե մենք կարողացանք մրցակցային առավելություններ ունենալ այլ պետությունների նկատմամբ, մենք հաջողություն կունենանք: Խոսքը հարկային արտոնությունների, էժան աշխատուժի, կապիտալի ցածր տոկոսադրույքի և այլնի մասին է: Եթե, օրինակ, Վրաստանի նկատմամբ չունենանք մրցակցային առավելություն, Հայաստանում ներդրում չեն անի»,- ասաց Վիլեն Խաչատրյանը:

Տնտեսագետի դիտարկմամբ՝ կա հնարավոր ներդրողների մի խումբ՝ սփյուռքահայ նվիրյալները, որոնք բախվում են հայկական իրականությանը, ինչի մասին նրանցից ոմանք  պատմեցին «Հայաստան-Սփյուռք» 6-րդ համաժողովի շրջանակներում, ասելով, որ կորցրել են իրենց բիզնեսը, որ իրենց «թալանել են» և այլն:

Վերջինս նշեց, թե նորմալ է, որ կառավարությունը միջազգային հանրությանը չի ներկայացնում ոլորտի թերությունները, խոսում է բացառապես այն մասին, որ ներդրումներ կատարելու համար ՀՀ-ն նպաստավոր երկիր է: Բայց իրականությունը, ըստ Վիլեն Խաչատրյանի, փոքր-ինչ այլ է, ինչի վկայությունը սփյուռքահայ ներդրողներն են, ովքեր դժգոհում են ներդրումային միջավայրից:

«Այս մարդկանց խումբն իր աչքի առաջ պատմություն ունի: Տարիներ շարունակ տեղի են ունեցել որոշակի իրադարձություններ, որոնք ազդել են Հայաստանի ներդրումային հեղինակության վրա, ձևավորվել է ներդրումային պատմություն: Սա շատ կարևոր հանգամանք է: Նրանք փոխում են իրենց վարքագիծը, երբ բախվում են իրականության հետ»,- ասաց Վիլեն Խաչատրյանը:

Հարցին՝ տպավորություն չունի՞, որ Հայաստանն իր առջև, կարծես, օտարերկրյա ներդրողին գրավելու խնդիր չի դրել, հույսը՝ սփյուռքահայերն են, Վիլեն Խաչատրյանը պատասխանեց, որ մեկ այլ բան է՝ խնդիրն առջևում դնելն ու լուծել չկարողանալը, իսկ մեկ այլ հարց է՝ խնդիրն առհասարակ չդնելը:

«Հայաստանի պարագայում խնդիրն այն է, որ Հայաստանն է այլ երկրներում ներդրում կատարող: Եթե մենք գումարներ ունենք, որոնք չենք ծախսում Հայաստանում, ինչո՞ւ օտարերկրացին պետք է ներդրում կատարի Հայաստանում»,- ասաց Վ. Խաչատրյանը:

Իսկ այն հարցին, թե այլևս ուշ չէ՞ վերականգնել Հայաստանի ներդրումային վարկանիշը, հանդես գալ ներդրումային դրական պատմությամբ, տնտեսագետը պատասխանեց, որ դա կախված է մի քանի գործոններից: «Ներդրումային պատմությունը կարող է կերտվել մի քանի մարդկանց կողմից և որոշակի իրավիճակների արդյունքում: Պատմության հետքերը մաքրելու համար պետք է տարվի լուրջ հետաքննություն, ներդրողների շահերը պետք է պաշտպանվեն մինչև վերջին լուման և սա կբարձրացնի Հայաստանի հեղինակությունը: Բայց ես վստահ չեմ, որ մենք ի զորու ենք սա անել»,- շեշտեց տնտեսագետը: