Նավթի շուկան արձագանքել է քրդական հանրաքվեին

Past.am     Այս շաբաթ նավթի համաշխարհային գները, վերջին երկու տարիների կտրվածքով, իրենց պատմական առավելագույնին հասան: Նյու Յորքի և Լոնդոնի բորսաներում «Բրենթ» տեսակի նավթի գինը 1 բարելի համար կազմեց 59,31 ԱՄՆ դոլար, ինչն, իհարկե, ուղիղ կերպով է պայմանավորված Իրաքյան Քուրդիստանում անցկացված անկախության հանրաքվեով: Բնական է, շուկան չէր կարող չարձագանքել նավթառատ Քուրդիստանի անկախության հանրաքվեին, միջազգային հանրության տագնապին, Բաղդադի, Իրանի, վերջապես՝ Թուրքիայի նախագահ Ռեջեփ Թայիփ Էրդողանի հնչեցրած սպառնալիքներին, որ վերաբերում էին ինքնավարության շրջափակմանը, և, իհարկե, նաև հնարավոր ռազմական բախումներին, որոնք հնչող զգոնության կոչերի ֆոնին էլ են շատ իրական թվում:

Այլ կերպ ասած՝ նավթի թանկացման հարցում սպեկուլյացիայի գործոնն այս պահին քիչ հավանական է թվում՝ ինչպես առանձին փորձագետներ են, այնուամենայնիվ, պնդում, մեջտեղ բերելով սիրիական պատերազմը, նույն անհանգիստ Իրաքը, Ծոցի ճգնաժամը, դրան հակառակ՝ նավթի տևական ցածր գները, և այն փաստը, որ չնայած ամեն օր իրաքյան Քուրդիստանից թուրքական խողովակաշարերով հարյուր հազարավոր տոննա նավթ է արտահանվում դեպի Եվրոպա, այդուհանդերձ, հատկապես Իրանի իրանական նավթի՝ դարձյալ շուկայում հայտնվելու պարագայում, իրաքյան նավթի արտահանման կասեցումը նույն Եվրոպային կոլապսի չի հանգեցնի: Ընդ որում, այս համատեքստում որպես կոնկրետ փաստարկ է բերվում քրդական նավթն ամենաշատը ներմուծող Գերմանիայի օրինակը, որի ընդհանուր սպառման մեջ այն ընդամենը 5% է կազմում:
Անշուշտ, վերոնշյալ փաստարկները ճշմարտությունից զուրկ չեն թվում: Միևնույն ժամանակ՝ առավել համոզիչ են այն վերլուծությունները, որոնք հիմնված են տարածաշրջանի անորոշ և շատ անհանգիստ իրադրության նկատմամբ՝ շուկայի իրական արձագանքի և սպասողական տրամադրությունների վրա: Տվյալ դեպքում, իհարկե չեն բացառվում նաև նավթի գնագոյացման վրա ազդած այլ գործոններ նույնպես, որոնք պարզապես համընկել են այս ժամանակահատվածի հետ (օրինակ՝ ներկայումս թուլացած դոլարը կարող էր ավելացնել նավթի պահանջարկը և, որպես հետևանք, շուկայում բարձրացնել նավթի գինը), բայց որ աճն այս դեպքում, մեծավ մասամբ, պայմանավորված է քրդական հանրաքվեով ու դրա հետևանքների նկատմամբ՝ շուկայում ձևավորված տագնապալի սպասումներով, կասկածից վեր է:

Էջը պատրաստեց Գոհար Սիմոնյանը