Նոր օրենքը թանգարաններին կօգնի զերծ մնալ հնարավոր ցնցումներից

Կառավարությունը դեռևս նախորդ՝ 5–րդ գումարման ԱԺ–ի քննարկմանն է ներկայացրել իր հեղինակած «Թանգարանների և ՀՀ թանգարանային ֆոնդի մասին» օրենքի նախագիծը, որն արդեն այս գումարման ԱԺ–ի պատգամավորների կողմից քննարկվել և արդեն իսկ ուղարկվել է կառավարություն:

ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Վարդան Բոստանջյանը «Փաստի» հետ զրույցում նշեց, որ ներկայացված օրենքի նախագիծն ունեցել է խոցելի և անհստակ ձևակերպումներ: Օրենքն անթերի դարձնելու և նման բացերը հնարավորինս շտկելու համար այն արդեն քննարկման նախնական փուլ է անցել մշտական հանձնաժողովում: Դրան հանձնաժողովի անդամներից բացի մասնակցել են նաև շահագրգիռ կազմակերպությունների ներկայացուցիչներ, թանգարանների տնօրեններ:

«Առաջարկությունները բազմաթիվ են եղել, բայց բոլորն էլ ուղղված են օրենքի արդյունավետության բարձրացմանն ու կատարելագործմանը: Օրենքով նախատեսվում է հստակեցնել պետական, մասնավոր, համայնքային թանգարանների գործառույթները, հավատարմագրման պայմանները և այլն: Առաջարկվող օրենքի նախագծով բոլոր թանգարաններն իրենց արժեքային ամբողջ տիրույթով ու համակարգով պետք է ամրագրված լինեն համապատասխան պետական ռեեստրում:

Երկրորդ կարևոր հարցը թանգարանային իրերի օտարման և տեղաշարժի ինստիտուտի հստակեցմանն է վերաբերում, ինչը կարևոր է մեր մշակութային արժեքների անվտանգության պահպանման տեսանկյունից: Հաջորդ հարցը, որը կրկին շատ կարևոր է, վերաբերում է այն շենքերի օտարմանը, որտեղ տեղակայված է թանգարանը»,– ասաց Վ. Բոստանջյանը:
Ի դեպ, նախորդ Սահմանադրությամբ իրավունք կար պետական կարիքների անվան տակ օտարել ցանկացած շինություն: Եվ ցանկացած շենքի վրա «աչք» ունեցող փողատեր կարող էր «կազմակերպել», որ այս կամ այն շինություն, այդ թվում նաև թանգարանի շենք, պետական կարիքների անվան տակ հայտնվեր օտարման ցանկում: Նման դեպքերը հնարավորինս բացառելու և հետագայում նման փորձության առջև չկանգնելու համար, անհրաժեշտ է եղել նաև նշված օրենքի նախագծում հստակություն մտցնել:

Հանձնաժողովի նախագահը խոսելով օրենքի նախագծում ներառված թանգարանային նմուշների օտարման իրավունքի մասին դրույթներին նշեց, որ օտարել, չի նշանակում վաճառել, այլ թանգարանային մեկ առարկան կարող է փոխանակվել մեկ այլ թանգարանում պահվող մեկ այլ առարկայով, որոնց նյութական արժեքները համարժեք են միմյանց: Նման փոխանակումները նույնպես պետք է իրականացվեն ոչ թե սիրողական մակարդակով, այլ՝ մասնագիտական խմբերի կողմից տրված եզրակացությունների հիման վրա, որտեղ հստակ նշված կլինեն փոխանակում իրականացնելու կամ մերժելու գիտական հիմնավորումները:

«Օրենքի նախագծում բազմաթիվ պահեր կան, որոնք հարկավոր է հստակեցնել: Պետք է հնարավորինս սահմանենք բոլոր կարևոր դրվագները, ստացել ենք բազմաթիվ առաջարկություններ, որն ամբողջացրել և ներկայացրել ենք Մշակույթի նախարարությանը: Օրենքի անհրաժեշտությունը ակնհայտ է, սակայն այն կծառայի ոլորտի արդյունավետ կառավարմանը, եթե հնարավորինս անթերի լինի և նպաստի ոլորտի զարգացմանը: Եվ այդ է պատճառը, որ ամեն ջանք գործադրել են, որպեսզի նախագիծն առավել լայն քննարկվի ոլորտի մասնագետների կողմից»,– ասաց Վ. Բոստանջյանը:

ԱԺ մշտական հանձնաժողովին կարող են առաջարկություններ ներկայացնել բոլոր թանգարանները և այն կազմակերպությունները, որոնք ամբողջությամբ պատկերացնում և տիրապետում են թանգարանային արվեստի նրբություններն ու առանձնահատկությունները:

Խոսելով համայնքային թանգարանները զբոսաշրջային փաթեթներում ներգրավելու և այդ ճանապարհով այդ ինստիտուտը զարգացնելու մասին Վ. Բոստանջյանն ասաց, որ մինչ օրս համայնքային թանգարանները եղել են այս կամ այն անհատի նախաձեռնության արդյունք, բայց նոր օրենքը նպատակ է հետապնդում նաև, որպեսզի նման թանգարանները նույնպես հնարավորություն ունենան ներգրավվելու տարբեր ձևաչափերում և բարելավեն իրենց դիրքերը, բոլոր առումներով:

«Այդ հարցը շատ կարևոր է և տուրօպերատորները պետք է աշխատեն այդ ուղղությամբ, քանի որ մեր համայնքներում գործող թանգարանները նույնպես իրենցից մեծ արժեք են ներկայացնում: Եվ հարկավոր է, որ զբոսաշրջիկների համար համայնքային այցելություններ կազմակերպելու ժամանակ հաշվի առնվի նաև այս հանգամանքը: Համայնքային թանգարաններում պահվող ցուցանմուշները նույնպես իրենցից մեծ արժեք են ներկայացնում և հարկավոր է այնտեղ կուտակված ինֆորմացիան հետաքրքիր մատուցելով նրանցից ստանալ մեծ լիցք և դրան զուգահեռ բարձրացնել նաև հեռավոր մարզերում գործող թանգարանների աշխատանքի արդյունավետությունը»,– ասաց Վ. Բոստանջյանը:

 «Փաստ»