Անմխիթար դպրոցի հետքերով. Ասիական զարգացման բանկը մասնագետներ կուղարկի

Աշտարակ քաղաքի՝ Վարդգես Պետրոսյանի անվան դպրոցի մանկավարժական կոլեկտիվը սեպտեմբերի 26–ին դասադուլ էր հայտարարել՝ պահանջելով դպրոցն անհապաղ հիմնանորոգել: Դասադուլը մեկ օր տևեց, քանի որ դպրոցի անձնակազմն ու պետական կառույցների ներկայացուցիչները որոշակի համաձայնության էին եկել: Արագածոտնի մարզի պատկան մարմինները հավաստիացրել էին, որ խնդրի շուրջ գործընթաց են սկսելու:

«Փաստ»–ը ևս անդրադարձել էր խնդրին: Փորձեցինք պարզել՝ այսօրվա դրությամբ բանավոր խոստումներից բացի ռեալ քայլեր ձեռնարկվե՞լ են:

«Ստուգվել է անմխիթար վիճակում գտնվող մեր երկհարկանի մասնաշենքի սեյսմակայունությունը: Երկու օրից մասնագետն իր գրավոր պատասխանը կհայտնի: Եթե շենքը սեյսմավտանգ ճանաչվի, նշանակում է՝ վերականգնման ենթակա է: Բացի այդ, մարզպետը մեզ ասել է, որ Ասիական զարգացման բանկի հետ պայմանավորվածություն ունեն: Առաջիկայում բանկն իր մասնագետներին է ուղարկելու, որպեսզի ուսումնասիրություն իրականացնեն: Բանկի մասնագետները դրանից հետո պետք է եզրակացություն տան՝ ամբողջ դպրոցը հիմնովին կառուցում են, թե ոչ»,– մեզ հետ զրույցում ասաց դպրոցի հայոց լեզվի և գրականության ուսուցչուհի Տաթևիկ Սարգսյանը՝ հայտնելով, որ ամենաուշը նոյեմբեր ամսին բանկի որոշումը պարզ կլինի:

«Եթե բանկը դրական եզրակացություն տա, երկու մասնաշենքն էլ կվերանորոգվի: Իսկ եթե պատասխանը բացասական լինի և գործընթացը չսկսի, ապա մարզպետարանն ու քաղաքապետը միասին խոստացել են, որ իրենց ջանքերով կարգի կբերեն դպրոցը»,– ընդգծեց ուսուցչուհին՝ հույս հայտնելով, որ այս անգամ լավատեսորեն են տրամադրված:
«Այս անգամ, այնուամենայնիվ, հուսալու հիմք ունենք, որովհետև դպրոցում սկսել են սանհանգույցները վերանորոգել: Մեզ նաև խոստացել են, որ հինգ ամսվա ընթացքում երկրորդ մասնաշենքը գործարկման ենթակա կլինի»,– նշեց Տաթևիկ Սարգսյանը:
Աննա Բադալյան