Օդագնացության միջազգային փառատոն՝ Երևանում

Լրագրողների հետ հանդիպմանը Երևանի քաղաքապետարանի աշխատակազմի արտաքին ձևավորման և գովազդի վարչության պետ Արազ Բաղդասարյանն ասաց, որ փառատոնը հետաքրքիր կդարձնի մայրաքաղաքը զբոսաշրջիկների համար: «Մենք Երևանի ծննդյան օրը ցանկանում ենք մեր մայրաքաղաքը ցույց տալ երկնքից, քանի որ Երևանը երկնքից ևս շատ լավ տեսք ունի»,– ասաց նա:

Արազ Բաղդասարյանի խոսքով` փառատոնի օրերին մայրաքաղաքի երկնքում կլինի 14 օդապարիկ:

«Skayball» ընկերության տնօրեն Նաիրի Բարսեղյանն էլ հավելեց, որ փառատոնին կմասնակցի հինգ երկիր՝ Հայաստանը, Բուլղարիան, Լիտվան, Ռուսաստանը և Բելառուսը: «Փառատոնի ընթացքում կանցկացվեն մի շարք մրցույթներ: Օդապարիկով հոկտեմբերի 14–ին իրավունք կունենան թռչել միայն լրատվամիջոցների նկարահանող խմբերը, ովքեր հնարավորություն կունենան 1,5 ժամվա թռիչքի ընթացքում նկարահանել մայրաքաղաքը երկնքից»,– ասաց նա:

Մայրաքաղաքի բնակիչներն ու հյուրերը, սակայն, հնարավորություն կունենան օդապարիկով երկինք բարձրանալ հոկտեմբերի 15–ին՝ մասնակցելով և հաղթելով Հանրապետության հրապարակում անցկացվելիք մրցույթներին:
Միջոցառումների ժամանակացույցը

Հոկտեմբերի 14

15:30 Հանրապետության հրապարակ. փառատոնի պաշտոնական բացումը:
16:40 Օդապարիկների նախապատրաստումը թռիչքի:
17:00 Թռիչք Երևանի երկնքում՝ 1,5 ժամ տևողությամբ:

Հոկտեմբերի 15

07:00 Հանրապետության հրապարակ կամ Ազատության հրապարակ (կախված եղանակային պայմաններից). մեկնարկ և օդապարիկների միաժամանակյա թռիչք Երևանի երկնքում:
17:00 Հանրապետության հրապարակ. թռիչքներ և երաժշտական ծրագիր:
19:00 Օդապարիկների՝ լուսավորությամբ ուղեկցվող շոու:

Հոկտեմբերի 16, 17

Թռիչքներ Գառնու և Ապարանի ջրամբարի հարակից տարածքներում` կախված եղանակային պայմաններից:

Հարկ է նշել, որ հոկտեմբերի 15–ին նախատեսված թռիչքներին, որոնց ընթացքում օդապարիկները ճոպաններով կապված լինելու պատճառով կհասնեն միայն որոշակի բարձրության, կարող են մասնակցել նաև քաղաքացիները` նախապես անցկացվող մրցույթներում հաղթելու պարագայում: Ամենայն հավանականությամբ փառատոնը կդառնա ավանդական` ընդլայնելով մասնակից երկրների ցանկը: Մինչ այդ, կազմակերպիչներն անմոռանալի զգացողություններ են խոստանում 1–ին փառատոնի մասնակիցներին և հույս հայտնում, որ այդ օրերի համար կանխատեսված բարենպաստ եղանակային պայմանները չեն փոփոխվի: