Ճոճվող կամուրջ, սանդուղքներ, իսկ շուտով նաև ֆունիկուլյոր

Խնձորեսկ գյուղում «Հին Խնձորեսկ» պատմամշակութային արգելոցի ծրագրի զարգացման շրջանակներում «Հայհիդրոէներգանախագիծ» ինստիտուտի կողմից նախատեսվում է ֆունիկուլյորի կառուցում:

Տնտեսական զարգացման և ներդրումների նախարար Սուրեն Կարայանի ներկայությամբ, հոկտեմբերի 8–ին «Հայհիդրոէներգանախագիծ» ինստիտուտի և «Դոփփելմեյր Գարավենտա» խմբի վերազգային ընկերության անդամ «Գարավենտա ԱԳ» շվեյցարական ընկերության միջև ստորագրվել էր պայմանագիր։ Հայաստան էին ժամանել «Գարավենտա ԱԳ» ընկերության մարքեթինգի և վաճառքների մասով նախագահ Ֆիլիպ Բիները և վաճառքների գծով տնօրեն Թոմաս Կուրտը:

Ըստ նախարարության պաշտոնական հաղորդագրության՝ ֆունիկուլյորի կառուցման սկզբնական փուլում ներդրումները կկազմեն 6 միլիոն 100 հազար ԱՄՆ դոլար։ Սուրեն Կարայանը պայմանագրի ստորագրումը և ծրագրի իրականացումը համարում է Սյունիքի զբոսաշրջային ենթակառուցվածքների զարգացման և գրավչության բարձրացման նախադրյալներից մեկը:

Ֆունիկուլյորը ճոպանաքարշով ռելսուղի է՝ նախատեսված կտրուկ վերելքով ուղևորների և բեռների փոխադրման համար։ Կիրառվում է քաղաքներում, առողջարանային կենտրոններում, ինչպես նաև լեռնային շրջաններում, արդյունաբերական ձեռնարկություններում։ Ֆունիկուլյորը կարող է լինել մեկ կամ երկու վագոններով: Անվտանգության համար վագոնները հանդերձվում են արգելակման վթարային հարմարանքներով, ինչպես նաև ազդանշանման, կապի և բլոկավորման միջոցներով։ Ֆունիկուլյորի թողունակությունը չի անցնում ժամում 600 մարդուց։ Ֆունիկուլյորը՝ որպես ուղևորային տրանսպորտ, առաջին անգամ օգտագործվել է Իտալիայում և Ավստրիայում։ ԽՍՀՄ–ում ֆունիկուլյորներ են եղել Կիևում, Թբիլիսիում, Բաքվում, Սոչիում, Կաունասում, Վլադիվոստոկում։ Շատ շուտով Սյունիքի տարածաշրջանի գեղեցկուհի Խնձորեսկը կհամալրի այս շարքը:

Մեկ տարի է անցել Խնձորեսկ համայնքի խոշորացումից: Խնձորեսկի նախկին գյուղապետ, այժմյան վարչական ղեկավար Սերյոժա Հայրապետյանի ներկայացմամբ, ֆունիկուլյորը ուղղված է տարածաշրջանում զբոսաշրջության զարգացմանը: Ասում է, թե մոտավորապես երևում է՝ որտեղ պիտի կառուցվի:

«Նախագիծ էլ կա, բայց դեռ լուրջ քննարկումներ չեն եղել: Ամեն դեպքում նպատակը տուրիզմի զարգացումն է: Այստեղ է նաև ճոճվող կամուրջը, սանդուղքները, զոհվածների հուշահամալիրը»,– նշեց նա:

Հարցին՝ հայտնի է, թե երբ կլինի կառուցումը, պատասխանեց, որ դեռ պարզ չէ, դա չի քննարկվել, սակայն նախագծային աշխատանքներ են տարվում: Վարչական ղեկավարի ներկայացմամբ՝ ֆունիկուլյորը կառուցելու գաղափարը պատկանում է իրենց համագյուղացի, երիտասարդ գործարար Սենիկ Ջուլհակյանին: Հայրապետյանը կարծում է, որ հենց նա է ներգրավել պատկան մարմիններին նման նախագիծը կյանքի կոչելու:

Past.am-ը համայնքի վարչական ղեկավարից նաև հետաքրքրվեց, թե ինչպես է ընթանում խոշորացված գյուղում կյանքը, արդյո՞ք համամիտ է այն գյուղապետերի հետ, ովքեր նշում են, թե խոշորացվող համայնքները կարող են անտեսվել: Հայրապետյանը դժվարացավ հստակ պատասխան տալ, բայց ընդգծեց, որ խոշորացումից անցել է ընդամենը մեկ տարի. «Սկզբանական շրջանն է, տարբեր նախընտրական փուլերում ենք եղել, դեռ չեմ զգացել միանգամից վատ է, թե լավ է: Ժամանակը ցույց կտա»: