Ավելի շատ ներմուծել, քան արտահանել

Ըստ Ազգային վիճակագրական ծառայության պաշտոնական կայքում հրապարակված ՀՀ սոցիալ–տնտեսական վիճակը բնութագրող վիճակագրության, այս տարվա օգոստոսին Հայաստան է ներկրվել ավելի քան 355 միլիոն ամերիկյան դոլար արժողությամբ ապրանք:

Ըստ կառավարությանն առընթեր պետական եկամուտների կոմիտեից ստացված և հավաքագրված տվյալների՝ ՀՀ արտաքին և փոխադարձ առևտրի ցուցանիշները 2017թ. օգոստոսին և հունվար–օգոստոսին նախորդ ամիսների կամ նախորդ տարվա նույն ժամանակահատվածների հետ համեմատելիս հիմնականում ավելացել են:

Առևտրաշրջանառությունը օգոստոսին կազմել է 533 միլիոն 800 հազար ԱՄՆ դոլար, որից 335 միլիոն 700 հազար դոլարը եղել է ներմուծումը, իսկ 198 միլիոն 100 հազարը՝ արտահանում: Ընդ որում առևտրաշրջանառությունը նախորդ տարվա նույն ժամանակահատվածի համեմատությամբ ավելացել է 15,6%–ով: Առանձին–առանձին ներմուծումն ու արտահանումը նախորդ տարվա օգոստոս ամսվա համեմատությամբ աճել են համապատասխանաբար 12,2 և 21,8%–ներով:

Այս տարվա հուլիս ամսվա հետ համեմատության մեջ դնելու ժամանակ էլ տեսնում ենք, որ առևտրաշրջանառությունը ավելացել է միայն 0,4%–ով, և եթե արտահանումը այս դեպքում կրկին աճել է՝ 3,6%–ով, ապա ներմուծումը՝ հակառակը, նվազել է մոտ 1,5%–ով: Այս թվերը կարող են չնչին թվալ, սակայն երբ վերածում ենք դրանք ըստ իրենց արժեքների, ապա բնավ էլ չնչին գումարների մասին չէ խոսքը:

Ընդհանուր առմամբ, հունվար–օգոստոս ամիսներին առևտրաշրջանառությունը կազմել է, ոչ ավել ոչ պակաս, 3 միլիարդ 880 միլիոն 572 հազար ԱՄՆ դոլար, ինչը նախորդ տարվա նույն ժամանակահատվածի համեմատությամբ ավելացել է 24,4%–ով:

Ըստ վիճակագրության՝ Հայաստանն իր առևտրի առյուծի բաժինը իրականացնում է Ռուսաստանի Դաշնության հետ: Միայն այս տարվա ութ ամիսների ընթացքում Ռուսաստանի հետ իրականացված առևտրաշրջանառության ծավալները կազմել են օգոստոս ամսվա ընթացքում կատարվող առևտրաշրջանառության գրեթե կրկնակին, այն է՝ 991 միլիոն 766 հազար ԱՄՆ դոլար: Ընդ որում, նախորդ տարվա հետ համեմատելիս, այս տարի Ռուսաստանի հետ իրականացված առևտրի ծավալները ավելացել են 25,6%–ով: Նույն ցուցանիշը, բայց արդեն 24,4%–ով ավելացել է ԵՄ երկրների հետ իրականացված առևտրի արդյունքում, որն այս տարվա առաջին ութ ամիսների ընթացքում կազմել է 947 միլիոն 446 հազար ամերիկյան դոլար:

ՀՀ արտաքին առևտրի բաշխվածությունն ըստ մարզերի և Երևանի ցույց է տալիս, որ մայրաքաղաքը երկուսի դեպքում էլ առաջատար է: Երևանից այս տարվա հունվար–օգոստոս ամիսներին իրականացված արտահանման ծավալները կազմել են 706 միլիոն 791 հազար ԱՄն դոլար, իսկ մերմուծումը՝ 2 միլիարդ 6 միլիոն 599 հազար ԱՄՆ դոլար: Ի դեպ նշենք, որ Երևանից հետո արտահանման ծավալներով աչքի է ընկնում Սյունիքի մարզը, որտեղից այս տարվա առաջին ութ ամիսներին կատարվել է 261 միլիոն 673 հազար ԱՄՆ դոլարի հասնող առևտուր: