ՀԱԿ-ը չի կարող երկար ժամանակ այսպես պասիվ մնալ, երկրի վիճակը ծայրահեղ ծանր է. Վարդան Մալխասյան

Հայ ազգային կոնգրես կուսակցությունն առաջիկա մոտ մեկ ամսվա ընթացքում նախատեսում է վարչության նիստ գումարել՝ Հայաստանում տիրող քաղաքական, տնտեսական և սոցիալական իրավիճակը քննարկելու նպատակով: Այս մասին Tert.am-ի հետ զրույցում տեղեկացրեց ՀԱԿ վարչության անդամ, ազատամարտիկ Վարդան Մալխասյանը:

«Մենք գտնում ենք, որ մեր երկրում վիճակը ծայրահեղ ծանր է և իրավունք չունենք անտարբեր նստելու, որովհետև Հայաստանը ոչ թե կործանման եզրին է, այլ կործանվում է ժամ առ ժամ: Գիտենք, որ պրկվել է իրավիճակը Ղարաբաղի հետ կապված հարցերում, պրկվել է իրավիճակը նաև աշխարհաքաղաքական հարցերում և հնարավոր է, որ ցնցումներ լինեն, ֆորս-մաժորային իրավիճակներ լինեն: Նման պարագայում մենք պետք է ոչ թե նստենք ու սպասենք, թե փլատակների տակից ոնց ենք փախչելու, այլ կանխարգելիչ քայլեր պետք է ձեռնարկվեն. տարբեր մարդիկ տարբեր բաներ են ասում, օրինակ՝ Ժիրայր Սեֆիլյանը  ցուցակ է հրապարակել , թե՝ ելեք ոտքի, զենք վերցրեք և այլն և այլն, մենք նման բաներ չենք ասում, բայց երկրի վիճակը  շատ լուրջ պետք է քննարկենք և որոշենք նաև մեր առաջիկա անելիքները»,- նշեց Վարդան Մալխասյանը:

Վերջինս վստահ է, որ առանց ժողովրդի գիտակից աջակցության որևէ կուսակցություն, որևէ քաղաքական առաջնորդ չի կարող հաջողությունների հասնել: Նրա խոսքով՝ իրենք այժմ պետք է կարողանան ժողովրդին  հասկացնել, որ իրենց կողմից առաջ քաշված խնդիրները ճիշտ են:

«Մարդիկ կան, որ Լևոն Տեր-Պետրոսյանի ասածները խորքային չեն հասկանում, ոմանք հայտարարում են, թե դրանք պարտվողական խոսքեր են, ՀԱԿ-ը տարածքներ է հանձնում, հայրենիքն է վաճառում և այլն, բայց ոչ թե մենք ենք հայրենիք վաճառում, այլ իշխանությունը բռնազավթածներն են դա անում. եթե արտագաղթի տեմպերն այս ձևով շարունակվեն, ապա ոչ միայն Ղարաբաղը կամ Ղարաբաղի կողքի շրջաններն ենք կորցնելու, այլ ամբողջ Հայաստանը հետը վերցրած»,– նշեց Մալխասյանը` ընդգծելով, որ իրենք գտնում են` կարելի է Ղարաբաղի հարցը բերել օրակարգ և այս կիսապատերազմական վիճակի հարցը լուծել, բայց քչերն են սա հասկանում, իսկ մնացածն ասում են, թե մենք ուզում ենք հողեր ծախել:

«Երբ մեր ասածը հասկանալի կդառնա ժողովրդին, այդ ժամանակ, իմանալով, որ եթե կոչ անենք, ժողովուրդը մեր հետևից դուրս կգա փողոց, այդ ժամանակ էլ հենց մենք կոչ կանենք ու դուրս կգանք հրապարակ, բայց, քանի դեռ ժողովուրդը մեր ասածը չի հասկացել, մենք միայնակ մեր կուսակցության անդամներով դուրս գանք փողոց ի՞նչ անենք»,- ասաց Մալխասյանը:

Բանախոսի դիտարկմամբ՝ շատ սխալ է, որ համապետական ընտրություններից հետո տարբեր կուսակցություններ այս ամիսների ընթացքում պասիվություն են դրսևորում կամ անտարբերության են մատնել հայաստանյան քաղաքական զարգացումները:

«Արտախորհրդարանական այդ ուժերը շատ լավ գիտեն, որ եթե նրանք ինչ-որ օրակարգ ասպարեզ բերեն, ապա դա կդառնա ձայն բարբառո հանապատի, այսինքն՝ կուսակցությունները, թերևս, այս փուլում գերադասում են լռել, որովհետև ցանկացած կուսակցություն էլ գիտի, որ եթե իրենց առաջ քաշած օրակարգը հաջողության չի հասնելու, ապա լավագույն տարբերակը լռելն է, բայց ես կոնկրետ այդ լռությունը բացարձակ սխալ մոտեցում եմ համարում: Դրա փոխարեն պետք է իրավիճակից դուրս գալու ելքեր փնտրել»,- կարծում է ՀԱԿ անդամը:

Նրա կարծիքով՝ իրենց այսօր ընդդիմություն հորջորջող կուսակցությունների մի մասը կեղծ ընդդիմադիրներ են և ղեկավարվում են Բաղրամյան 26-ից, իսկ մյուս մասը՝ կառույցներ չունեցող մարդ-կուսակցություններ են և եթե նրանք որևէ հայտարարություն էլ անեն, ապա որևէ մեկը նրանց չի հետևելու:

Դիտարկմանը, որ ՀԱԿ-ը ևս համապետական ընտրություններից հետո պասիվություն է ցուցաբերում քաղաքական դաշտում, Վարդան Մալխասյանը պատասխանեց.

«Պատճառն աշխարհաքաղաքական զարգացումներն են։ Բացի դրանից` Ղարաբաղի հարցն է պրկվել և Լևոն Տեր-Պետրոսյանն էլ հայտարարել է չէ՞, որ եթե Ղարաբաղին վտանգ է սպառնում, ապա ինքն իր ակտիվությունը փոխելու է պասիվության , որպեսզի վերջում մեր հասցեին մեղադրանքներ չհնչեն, թե, իբրև, մենք էինք մեղավոր»:

ՀԱԿ վարչության անդամն այս համատեքստում հավելեց, սակայն, որ ՀԱԿ-ը չի կարող և չի պատրաստվում երկար ժամանակահատված այսպես պասիվ էլ մնալ:

«Ես իմ կարծիքն եմ հիմա ասում, որ մենք ուշ թե շուտ պիտի դուրս գանք փողոց, այլ ճանապարհ չկա և ժողովրդին էլ պետք է հասկացնենք, որ համատեղ ուժերով պետք է սրբենք այս երկրի հանրապետադաշնակցական աղբը: Համոզված եմ, որ մեր կուսակցության վարչության մեծամասնությունն էլ է այս կարծիքին »,-եզրափակեց Մալխասյանը:


Դիանա Դավթյան