Ոսկին գնում են նեղ օրվա կամ լոմբարդում դնելու համար

Ազգային վիճակագրական ծառայության հրապարակած տվյալների համաձայն՝ Հայաստանում աճել են ադամանդի և ոսկերչական իրերի արտադրության ծավալները: 2017 թվականի հունվար–օգոստոսին հանրապետությունում արտադրվել է 118 հազար 958 կարատ ադամանդ՝ նախորդ տարվա նույն ժամանակահատվածի համեմատ աճելով 62,1 տոկոսով: Ըստ ԱՎԾ–ի՝ 2016 թ. Հայաստանում արտադրվել էր շուրջ 73 հազար 392 կարատ ադամանդ:

Ինչ վերաբերում է ոսկերչական իրերին, ապա այս տարվա հունվար–օգոստոսին արտադրվել է 1489,9 կգ ոսկերչական արտադրանք, ինչը 2016 թ. նույն ժամանակահատվածի համեմատ 3 անգամ ավելի է: 2016 թ. հունվար–օգոստոսին արտադրվել է 500,4 կգ ոսկերչական արտադրանք:

Ոսկերչությամբ զբաղվող անհատ ձեռներեց Արմեն Բաբայանը չի բացառում, որ արտադրության ծավալների աճի վրա կարող էին ազդել ոսկու համաշխարհային գների տատանումները:

«Միջազգային շուկայում որոշ ժամանակ առաջ գները նվազեցին, իսկ հիմա բարձրացում է նկատվում: Հնարավոր է, որ այդ տատանումը կարող էր նման արդյունքների բերել, ինչի հետևանքով էլ նաև էժանացում նկատվեց: Առհասարակ արտադրությամբ զբաղվողները պայմանագրեր ունեն մի շարք երկրների հետ: Իրենք հումքը բերում են այստեղ, մշակում ու արտահանում: Այս առումով ևս հնարավոր է ծավալների աճ գրանցվի, բայց փոքր ձեռներեցությամբ զբաղվողների վրա այդ ցուցանիշը որևէ էական ազդեցություն չի ունեցել: Ես չեմ բացառում նաև այն հանգամանքը, որ թվերն ուղղակի կարող են ուռճացված լինել»,–ասաց Արմեն Բաբայանը:

Վերջինիս դիտարկմամբ՝ եթե միջազգային շուկայում ոսկու գնի նվազման շրջանում տեղական ապրանքը կարելի էր 25 կամ 26 դոլարով գնել, ապա հիմա մի քիչ բարձրացել է. «Հիմա գինը 27, 5 կամ 28 դոլարի սահմանում է տատանվում: Իսկ ինչ վերաբերում է զարդերին, բնական է, որ զարդերի վրա աշխատանքը մի քիչ ավելի շատ է, զարդերը մի քիչ ավելի թանկ գնով են վաճառվում»:

Ոլորտի ներկայացուցիչն ընդգծեց, որ ՀՀ–ում ոսկերչական իրերի վաճառքն այդքան էլ հուսալի իրավիճակում չէ:

«Ի տարբերություն խոշոր ընկերությունների՝ փոքր և միջին ձեռներեցությամբ զբաղվողներն (ՓՄՁ) իրենց գործունեությունը միայն ՀՀ շուկայի ներսում են իրականացնում: ՀՀ շուկայի հույսն էլ հիմնականում արտերկրից ժամանած մարդիկ են ու սեզոնային գնումները: Հարսանիքների սեզոնին է մի քիչ շարժ լինում, բայց վերջին շրջանում այդ աշխուժությունն էլ չկա: Իսկ արտասահմանից եկողների մեծամասնությունը Հայաստանից այլևս ոսկի չի գնում: Պատճառը կրկին գներն են: Օրինակ, եթե ՀՀ–ի գները համեմատում ենք Ռուսաստանի գների հետ, տեսնում ենք, որ գրեթե հավասարվել են: Իսկ ինչ վերաբերում է մեր քաղաքացիներին, ապա ոսկի գնելու նպատակը հիմնականում մեկն է՝ շատ հաճախ գնում են նեղ օրվա համար: Առնում են ու տանում լոմբարդում դնում»,– ընդգծեց մեր զրուցակիցը:

Արմեն Բաբայանի խոսքով, ՓՄՁ–ների գործունեության առումով ոլորտում էական առաջընթաց չի գրանցվել:

«Միգուցե խոշոր կազմակերպություններում լինի այդ առաջընթացը, բայց ՓՄՁ–ների շրջանառությունն այնքան մեծ չէ, որ զգանք այդ տարբերությունը: Իրենց հնարավորություններն ավելի մեծ են, բայց մեզ համար հույսը մեր շուկայի նվազ շրջանառությունն է՝ օրվա հացի փողը»,–ասաց նա:

Արմեն Բաբայանը նշեց, որ ՓՄՁ–ներին աջակցելու Կառավարության քաղաքականությունը ևս տեսանելի չէ:

«Աջակցություն, որպես այդպիսին, չկա: Կոնկրետ ես չեմ տեսել, որ օրինակ՝ ՊԵԿ–ից գան ու մարդկանց ուղղություն ցույց տան: Մարդիկ իրենց ինտուիցիայի վրա են հիմնված: Իրենք իրենցով աշխատել ու մինչև հիմա էլ աշխատում են»,– եզրափակեց ոլորտի ներկայացուցիչը:

Աննա Բադալյան  «Փաստ»