Նախ՝ ճշմարտություն, հետո՝ հարվածներ

Երեկ ՌԴ Պաշտպանության նախարարության ներկայացուցիչ Իգոր Կոնաշենկովը հայտարարեց, թե ԱՄՆ–ն առաջին անգամ հաստատել է Սիրիայի ահաբեկչական խմբավորումների՝ ոչ միայն քիմիական զենք ունենալու, այլև դրա գործածման փաստը: Այս մասին, ըստ ՊՆ ներկայացուցչի, ասված է ԱՄՆ պետդեպարտամենտի Travel Warning հայտարարություների բաժնում, որի միջոցով Սպիտակ տունն իր քաղաքացիներին մշտապես ուղղորդում է, թե ինչու չպետք է որևէ երկիր այցելել: Բնականաբար, այս անգամ խոսքը Սիրիայի մասին է: Եվ քանի որ խոսքը վերաբերում էր պաշտոնական փաստաթղթին՝ որոշեցինք ինքներս պարզել, թե կոնկրետ ինչ է գրված այնտեղ: Այսպիսով, ԱՄՆ պետքարտուղարությունն իր քաղաքացիներին շարունակում է զգուշացնել Սիրիա կատարելիք այցերի անցանկալիության մասին, իսկ նրանց, որոնք արդեն Սիրիայում են, խորհուրդ է տալիս անհապաղ լքել այդ երկիրը:

Բացատրությունը հետևյալն է. «...Սիրիայի ոչ մի հատված պաշտպանված չէ բռնությունից: Կրակոցներ, ինքնաշեն պայթուցիկներ, ավիահարվածներ, մարդկանց առևանգում, ձերբակալություններ, քիմիական նյութերի գործածում...Սիրիայում գործում են ահաբեկչական և բռնություն գործադրող այլ անջատողական խմբավորումներ, դրանց թվում՝ ԴԱԻՇ–ն ու Հայաթ Թահրիր աշ–Շամը, որում դոմինանտ են միջազգայնորեն ահաբեկչական խմբավորումներ ճանաչված Ալ Քաիդան ու Ջեբհաթ ան–Նուսրան: 2017–ի հուլիսին Հայաթ Թահրիր աշ–Շամն ամբողջությամբ կոնսոլիդացրեց իշխանությունը Իդլիբ նահանգում այն բանից հետո, երբ բախվեց մնացած զինված դեկարատարների հետ...Ավելին՝ Ռուսաստանը/և կամ սիրիական կառավարությունը սեպտեմբերին սկսեցին ավիահարվածներ հասցնել Իդլիբին, ինչը զգալի վնասներ հասցրեց բժշկական հաստատություններին և տասնյակ զոհերի բերեց քաղաքացիական բնակչության շրջանում: ԴԱԻՇ–ի, Հայաթ Թահրիր աշ–Շամի և այլ ահաբեկչական խմբավորումների մարտավարությունը ներառում է...նաև քիմիական զենքի գործածումը: Նրանք թիրախավորում են խոշոր քաղաքային կենտրոնները, սահմանային անցակետերը, անցումները, վարչական շենքերը, առևտրային հարթակները և Դամասկոսի, Հալեպի, Համի, Դարրայի, Հոմսի ու Դեյր էզ–Զորի նահանգների տարածքները... որոշ դեպքերում Սիրիայում ԱՄՆ քաղաքացիներ են անհետացել: Այդ մարդիկ առևանգել ու սպանել են ԱՄՆ քաղաքացիներին...փրկագին պահանջել...Սիրիայի անվտանգության հետ կապված իրավիճակի պատճառով՝ առևանգված/գերեվարված մեր քաղաքացիներին օգնելու՝ կառավարության հնարավորությունները խիստ սահմանափակ են»:

Ի դեպ, հարկ է նշել, որ սա դեռ ամբողջը չէ, և պետդեպարտամենտը, թերևս, այսպիսի երկարաշունչ և քաղաքականությամբ հագեցած նախազգուշացմամբ դեռ երբեք հանդես չէր եկել: Բայց, այս ամբողջի մեջ հատկապես կարևոր է այն, որ ԱՄՆ–ը, փաստորեն, ստել է՝ անցած տարվա ապրիլին սիրիական Իդլիբի Խան Շեյխուն բնակավայրում իրականացված քիմիական հարձակման մեջ Սիրիայի նախագահ Բաշար ալ–Ասադին մեղադրելով, ինչպես նաև՝ ահաբեկչական խմբավորումների կողմից քիմիական նյութերի ձեռքբերման հնարավորությունը հերքելով: Այդ երկիրը, Բրիտանիայի, Ֆրանսիայի, ինչպես նաև՝ ողջ մեդիա–դաշտի հետ միասին, ՄԱԿ–ի ԱԽ–ում նոր պատժամիջոցներ էին պահանջում կիրառել Ասադի և Սիրիայի դեմ, իսկ նախագահ Թրամփը իդլիբցիներին Ասադից փրկելու նպատակով Շաիրաթ ավիաբազայի ուղղությամբ հրթիռներ էր նետում՝ իր խորհրդական դուստր Իվանկայի արցունքներից ազդվելով:

Բնականաբար, կարիք չկա մեջբերել ՌԴ գեներալի հեգնանքը, որնԱՄՆ քաղաքացիների համար Սիրիան բացարձակապես անվտանգ վայր է դիտարկել՝ նկատի ունենալով ահաբեկիչներ–ԱՄՆ փոխադարձ հոգածությունը միմյանց նկատմամբ, որովհետև ռուսներն էլ իրենց հերթին ոտքներն ամպոտ հրեշտակներ չեն: Բայց պարզից էլ պարզ է, որ նաև ա՛յս միջադեպից դասեր քաղելով՝ աշխարհն այսուհետ չպետք է հաշտվի «Նախ՝ հարվածներ, հետո՝ ճշմարտություն» բանաձի հետ:

Էջը պատրաստեց Գոհար Սիմոնյանը