Ընտրություններ դիսկո ակումբներում, անասնաբուժարաններում և Օհանյանի տանը

Past.am-ը տեղեկացնում է. Նոյեմբերի 5–ին Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերում կայանալիք ՏԻՄ ընտրությունների նպատակով կազմավորվել է 527 տեղամասային կենտրոն:

Ըստ Կենտրոնական ընտրական հանձնաժողովի կայքի հրապարակումների՝ նոյեմբերին կայանալիք ընտրությունների տեղամասերը մեծավ մասամբ տեղակայված կլինեն դպրոցների, մշակույթի տների, մանկապարտեզների ու ակումբների շենքերի տարածքում:

Բայց նախատեսված են նաև այլ վայրեր` քաղաքացիական պարտքը կատարելու համար: Օրինակ՝ դիսկո ակումբի, ՔԿԱԳ–ի, անասնաբուժարանի շենքերը և Օհանյանի բնակարանը:

Հատկապես հետաքրքիր է վերջին տվյալը: Ո՞ր Օհանյանի: Թե ո՞վ է այդ Օհանյանը, հայտնի չէ: Ըստ ԿԸՀ կայքի՝ այն գտնվում է Սյունիքի մարզի Թանահատ համայնքում:

Այս ընտրություններին կունենանք 486 հազար 840 ընտրող: Ամենից շատ ընտրողներ ունենք Կապանում՝ 35 հազար 98 քաղաքացի, իսկ ամենից քիչը արձանագրվել է Արագածոտնի մարզի Դդմասար համայնքում` ընդամենը 130 ընտրող:

Առաջիկա ընտրություններին որպես համայնքի ղեկավար իրենց թեկնածությունն են առաջադրել 153 հոգի, իսկ որպես ավագանու անդամ՝ 993 հոգի: Ընդ որում, բոլոր համայնքներում միասին վերցրած ավագանու անդամի 685 «տեղ» կա:

ԿԸՀ կայքից նաև տեղեկանում ենք, որ նոյեմբերյան ընտրությունների անաչառությունը կվերահսկի 5 կազմակերպության 701 ներկայացուցիչ: Այսպես, ընտրություններին դիտորդական առաքելություն իրականացնող տեղական հասարակական կազմակերպություններն են՝ «Միացյալ առաջնորդների պալատը»– 102 դիտորդ, «Ժողովրդավարության իրավունքի միջազգային կենտրոնը»` 200 դիտորդ, «Համահայկական երիտասարդական ասոցիացիան»` 199 դիտորդ, «Ազատ երիտասարդական խորհուրդը»` 100 դիտորդ և «Հաղթանակի զավակները»` 100 դիտորդ: Սրանցից համեմատաբար վերջերս են ստեղծվել «Միացյալ առաջնորդների պալատ»–ը՝ 2015 թ. և «Ժողովրդավարության իրավունքի միջազգային կենտրոն»–ը՝ 2014 թ.: