Ալագյազում վեց թեկնածուից ոչ մեկին էլ ՀՀԿ–ն չի սատարելու, անգամ իր կուսակիցներին

Նոյեմբերի 5–ին կայանալիք ՏԻՄ ընտրություններին Ալագյազ համայնքի բնակիչներն էլ կընտրեն իրենց նոր ղեկավարին: Մյուս համայնքներից այն առանձնանում է նրանով, որ խոշորացման ժամանակ Ալագյազին է միացել 10 համայնք, իսկ ղեկավարի պաշտոնում ընտվելու համար նախապես գրանցվել էր 7 թեկնածու: Նրանից մեկը, սակայն, արդեն ինքնաբացարկի դիմում է ներկայացրել և թեկնածուների թիվն այս պահին հասել է 6–ի: Այդ 6–ից 4–ը գյուղապետեր են, Հանրապետական կուսակցության անդամ, նախկինից իրար ճանաչում են, բայց համայնքների միանալուց հետո հիմա ստիպված են իրար դեմ պայքարել:

Համայնքի գործող ղեկավար Ազիզ Մհոյանը «Փաստի» հետ զրույցում նշեց, որ իրեն շշուկներ են հասել, որ ինքնաբացարկ հայտնող այլ թեկնածուներ նույնպես լինելու են, բայց ով կամ երբ, չգիտի:

«Ինքնաբացարկ հայտնելու ժամկետը մինչև հոկտեմբերի 26–ը ժամը 18.00–ն է, իմ տեղեկություններով երկու հոգի ինքնաբացարկ կտա: Ես արդեն 19 տարի է նույն համայնքի ղեկավարն եմ, բայց թե ինչպիսին կլինեն ընտրության արդյունքները, ժամանակը ցույց կտա»,– ասաց Ա.Մհոյանը:

Նա տեղեկացրեց նաև, որ իր տեղեկություններով ինքնաբացարկի դիմում կներկայացնեն ոչ թե անկուսակցական, այլ՝ ՀՀԿ–ական թեկնածուներից երկուսը: Ինչ վերաբերում է իշխող կամ այլ կուսակցությունների կողմից թեկնածուներին սատարելուն, Ա.Մհոյանն ասաց, որ իրենց նոր ձևավորված համայնքին որևէ մեկը, անգամ ՀՀԿ–ն չի սատարելու:
«Վերևից ասել են, որ ոչ մեկին էլ չեն սատարելու, ով հաղթեց, հաղթեց: Կուսակցությունը կոնկրետ ոչ մեկին չի սատարելու, դաշտը թողել են ազատ: Այնպես որ խառն է, շատ խառն է: Բոլորն էլ ասում են՝ մենք շատ ձայն ունենք, բայց ժամանակը կգա, կերևա, ում ձայներն են ամենաշատը եղել: Նոյեմբերի 6–ին կերևա»,– ասաց Ալագյազի համայնքապետը:

Միրաք համայնքի նախկին ղեկավար, ներկայում Ալագյազ համայնքի ղեկավարի թեկնածու Ալիկ Նամոյանը «Փաստի» հետ զրույցում ասաց, որ ինքը չի պատրաստվում ինքնաբացարկ հայտնել: Գնալու է մինչև վերջ, իսկ իրականում՝ որ թեկնածուների միջև կծավալվի հիմնական պայքարը, նա չկարողացավ ասել, բայցև նշեց, որ հարազատ կուսակցությունը ոչ մեկի թեկնածությունն էլ չի սատարելու:

«Ես ինքնաբացարկ չեմ ներկայացնելու և գնալու եմ մինչև վերջ: Անցանք՝ անցանք, չանցանք՝ ինչ անենք: Ես երկու անգամ ընտրվել եմ մեր համայնքի ղեկավար: Ես էլ, շատերն էլ համաձայն չէին, որ գյուղերն իրար միանան: Մեր պայմաններում ոչ մեկն էլ համաձայն չէր, քանի որ ձմռանը գյուղերի ճանապարհները 3–4 օրով փակվում են, ինչպես են գնալու հասնեն Ալագյազ՝ թոշակ, նպաստ ստանան: Մերը լեռնային գոտի է, գյուղերի միջև հեռավորությունը բավականին շատ է, օրինակ՝ մեր գյուղից Ալագյազ 8 կիլոմետր է, ու թե ինչ կլինի, այս պահին չեմ կարող ասել»,– ասաց Ա. Նամոյանը:

«Փաստ»

 Արմինե Գրիգորյան