ՀՀԿ–ականները վերջին պահին` ԳՄ նիստի ընթացքում կիմանան վարչապետի իրենց թեկնածուի մասին. Կարեն Քոչարյան

Քաղաքական տեխնոլոգ Կարեն Քոչարյանի խոսքով՝ ինքը հավատում է Հայաստանի Հանրապետական կուսակցության անդամների խոսքերին, որ դեռևս կուսակցության ներսում քննարկումներ չեն եղել վարչապետի թեկնածուների մասին:

Նա Tert.am-ի հետ զրույցում նշեց, որ ինքը համոզված է այդ հարցում: «Ես համոզված եմ, որ դեռևս ոչ մի բան արված չէ: Եթե քննարկվում է վարչապետի հարցը, ապա դա արվում է երկուսի միջև՝ Կարեն Կարապետյանի և Սերժ Սարգսյանի: Թե նրանք ինչ են խոսում, ոչ ոք չի կարող իմանալ, մնացած քննարկումները սուտ են»,- ասաց նա:

Կարեն Քոչարյանը նաև նշեց, որ քաղաքագիտությունը ենթադրում է վերլուծություններ փաստերի հիման վրա, իսկ փաստերը, ըստ նրա, այն են, որ օրինակ՝ Կարեն Կարապետյանն արդեն «78 անգամ ասել է, որ ցանկանում է մնալ վարչապետ», և մեկ այլ փաստ էլ այն է, որ Սերժ Սարգսյանը դեռևս 2014 թվականին հայտարարել է, որ չի ցանկանում լինել վարչապետ և նախագահ, բայց նաև մի քանի ամիս առաջ ասել է, որ շարունակելու է իր ներդրումն ունենալ Հանրապետական կուսակցության քաղաքականության մեջ:

«Փաստերը դրանք են: Իսկ դրանք վերլուծելով՝ առայժմ ոչինչ չենք կարող ասել: Դեռևս յոլա են գնում, իսկ սցենարներ կարող են լինել 18 հատ՝ տարբեր սցենարներ,- ասաց նա օրինակ բերելով՝ Սերժ Սարգսյան՝ վարչապետ, Կարեն Կարապետյան՝ փոխվարչապետ, Սերժ Սարգսյան՝ վարչապետ, Կարեն Կարապետյանը՝ թողնում գնում է, Կարեն Կարապետյանը՝ վարչապետ, Սերժ Սարգսյան՝ Անվտանգության խորհրդի քարտուղար և այլ սցենարներ,- ո՞ր մեկն ասել, բայց այդ քննարկումները լուրջ չեն, հասկանու՞մ եք»:

Պատասխանելով դիտարկմանը, թե քննարկվում է նաև վարկած, ըստ որի, հնարավոր է՝  հայաստանյան քաղաքական միջավայրում նույնպես կրկնվի ռուսական՝ Պուտին-Մեդվեդև մոդելը, Սարգսյանն ու Կարապետյանը մնան քաղաքականությունում, Կարեն Քոչարյանը՝ նշեց, որ հիմա  բոլոր սցենարն են հավանական. «Քանի որ ոչինչ հստակ չէ: Ագաթա Քրիստին կարդացել եք, չէ՞. այնտեղ բոլորը բոլորին կասկածում ես: Հիմա էլ՝ մենք բոլորս կասկածում ենք բոլորին: Հիմա մեզ մոտ Ագաթա Քրիստիի սցենարն է: Ես երբեք չեմ սիրել գիրքը վերջից կարդալ, ես շարունակում եմ կարդալը, մինչև պարզ կդառնա ավարտը»,- ասաց նա:

Անդրադառնալով վարչապետ Կարեն Կարապետյանի դերին ու նշանակությանը «Հանրապետական» կուսակցությունում` քաղաքական տեխնոլոգը հիշատակեց, որ նրա վարկանիշն ինչ-որ չափով ընկավ կուսակցական դառնալով, սակայն առանձնապես նրա իմիջը մեծ վնասներ չկրեց: «Եթե հաշվի առնենք, որ վարչապետը, որպես կառավարության ղեկավար, մշտապես քավության նոխազ է դառնում՝ բոլոր կառավարությունների և բոլոր իշխանությունների օրոք, ապա պետք է նկատենք, որ Կարեն Կարապետյանի վարկանիշ հիմա շատ բարձր է՝ իջնելով հանդերձ, որպես վարչապետ, նրա վարկանիշը շատ բարձր է մնացել»,- ասաց նա:

Խոսելով ՀՀ նախագահ Սերժ Սարգսյանի՝ վարչապետ չլինելու մասին հավատացումներից հրաժարվելու հավանական մտադրության մասին՝ Կարեն Քոչարյանը նկատեց, որ չի բացառվում, որ  նախագահը հետ կանգնի իր խոսքից: «Եթե հաշվի առնենք, որ քաղաքականությունը հենց նման բաների արվեստ է, ապա հավանական է դա: Բայց Սերժ Սարգսյանի գործունեությունը ուսումնասիրելով՝ կարող եմ ասել, որ իր դեպքում քիչ հավանական է. եթե նա մտադրված չէ ինչ-որ բան անել, այդ մասին չի խոսի: Այսինքն՝ ինքը եթե այդ մասին չմտածեր, չէր ասի, ես չեմ կարծում, որ նա 2014 թվականին ասեր մի բան, որը ինքը չէր ցանկանա հետո անել»,-ասաց նա:

Քաղաքական տեխնոլոգի խոսքով՝ «Հանրապետական» կուսակցությունում հիմա ինտրիգներ ու մրցակցություն կարող են լինել: «Հատկապես այն պարագայում, որ իշխանությունը չի ունենում լուրջ ընդդիմություն, դա հնարավոր է: Իսկ մեր դեպքում ընդդիմությունը ոչ միայն լուրջ չէ, այլ նաև՝ անլուրջ է: Հիմա հատկապես, երբ ենթադրվում են լուրջ փոփոխություններ են լինելու, անկախ նրանից, թե Կարեն Կարապետյանը վարչապետ կմնա, իսկ Սերժ Սարգսյանը վարչապետ չի դառնա, այդ փոփոխությունները կլինեն իշխանական դաշտում: Այդ փոփոխությունները հիմա անգամ երևում են: Այդ բարեփոխումների ժամանակ միշտ բոլորը փորձելու են իրենց տեղը գտնել արևի տակ, գտնել պայքարի գնով, և այդ պայքարը գոնե մամուլում շատ պարզ երևում է»,- նշեց նա:

Այն, որ «Հանրապետական» կուսակցության ներսում քննարկումներ չկան 2018-ի գարնանը վարչապետի թեկնածուների մասին, Կարեն Քոչարյանի խոսքով, նորմալ է:

«2013 թվականին իրենք վերջին րոպեին իմացան, որ ԵԱՏՄ են մտնում: Նախորդ տարի էլ իրենք չէին իմանում, թե ով է լինելու իրենց վարչապետը, չգիտեին, որ ով է լինելու իրենց թեկնածուն, չգիտեին օրինակ` Սերժ Սարգսյանը լինելու է իրենց նախընտրական ցուցակում, թե՝ ոչ: Նրանք ամեն ինչ իմանում են վերջին պահին: Այդ տրամաբանությունից ելնելով՝ շատ նորմալ է, որ վերջին պահին իմանան իրենց վարչապետի թեկնածուի մասին: ․Փետրվարին նախագահի ընտրությունից հետո արդեն՝ փետրվարյան մի հինգշաբթի՝ ԳՄ նիստի ժամանակ, Հանրապետականներին տեղյակ  կպահեն, թե ով է իրենց վարչապետի թեկնածուն»,–եզրափակեց Կարեն Քոչարյանը: