Յուրաքանչյուր տնտեսություն 500000–700000 դրամի կորուստ է ունեցել.Ծաղկալանջցիները փոխհատուցում են պահանջում

Հոկտեմբերի 16–ին հանրապետությունում գրանցված ուժեղ քամին Արմավիրի մարզի Ծաղկալանջ համայնքի բնակիչներին լրացուցիչ ծախսերի տակ է գցել:
Գյուղացիները «Փաստ» օրաթերթի թղթակցի հետ զրույցում հայտնեցին, որ ջերմոցային տնտեսությունները 90%–ով տուժել են: Բազմաթիվ ջերմոցներ են քանդվել, սածիլներն էլ ամբողջությամբ գետնին է հավասարվել:

«Պոլիէթիլենային ծածկերն է ամբողջովին քանդվել: Կան ջերմոցներ, որտեղ նույնիսկ երկաթներն են ծռվել: Աղետալի վիճակում ենք»,– բողոքեցին նրանք:
Այստեղ ընտանիք չկա, որը քամուց վնասներ կրած չլինի: Նախնական հաշվարկով՝ յուրաքանչյուր գյուղացիական տնտեսություն ամենաքիչը 500000–700000 դրամի կորուստ է ունեցել:

«Գյուղացի կա՝ 200000 դրամի է վնաս կրել, մարդ էլ կա՝ 2 միլիոնի»,– տեղեկացրին ծաղկալանջցիները:
Ջերմոցները գյուղացիները վարկերի միջոցով են կառուցել: Այսօր նրանք կրկին բանկի դուռն են թակելու՝ նոր վարկ ձեռքբերելու համար:
«Վարկի տակ են սաղ, հիմա էլ լրացուցիչ ծախսի տակ ընկանք, ստիպված պետք է ցելոֆոն գնենք ու բերենք ջերմոցները վերականգնենք: Մեր հացը դրա միջոցով ենք ստանում, չենք կարող այդ գործից հրաժարվել»,– նշեցին նրանք:

Կրած վնասների դիմաց ծաղկալանջցիները կառավարությունից փոխհատուցում են պահանջում: Համայնքի ղեկավար Մանվել Մկրտչյանը հաշվարկները մարզպետարան է ներկայացրել և փոխանցել բնակիչների պահանջը: Դրական պատասխանով, սակայն, համայնք չի վերադարձել:

«Ասացին՝ փոխհատուցումը հնարավոր չի: Մենք միջոցներ չունենք, որ տրամադրենք»,– փոխանցեց նա:

Հիշեցնենք, որ հոկտեմբերի 16–ին գրանցված ուժեղ քամու հետևանքով հանրապետության մի շարք բնակավայրեր տուժել էին: Լոռու մարզի Ստեփանավան քաղաքում հրդեհ էր բռնկվել: Ծառեր ու էլեկտրասյուներ էին տապալվել Տավուշի մարզի Իջևան և Դիլիջան քաղաքներում: Արարատի և Արմավիրի մարզերում էլ բազմաթիվ ջերմոցային տնտեսություններ էին տուժել:

Մանյա Պողոսյան

«Փաստ»