Վարկաբեկում ամերիկյան եղանակով

Ամերիկյան մամուլը դարձյալ կեղտոտ տեխնոլոգիաներ է գործածում նախագահ Դոնալդ Թրամփի դեմ՝ վերջինիս նախընտրական շտաբի նախկին ղեկավար, Սպիտակ տան էքսխորհրդական Փոլ Մանաֆորթի և նրա գործընկեր Ռիկ Գեյթսի նկատմամբ առաջ քաշված կոռուպցիոն մեղադրանքները ներկայացնելով որպես ամերիկյան ընտրություններում ռուսական միջամտության ապացույց: Երեկ նույնիսկ ամենահեղինակավոր հանդեսներն ու հեռուստաընկերությունները չխորշեցին ակնհայտ ապատեղեկատվությունից, ըստ որի՝ ԱՄՆ Հետաքննությունների դաշնային բյուրոյի մեղադրանքների հաստատման շրջանակում և վերջին նախագահական ընտրություններում ռուսական միջամտության գործի տիրույթում Մանաֆորթը հանձնվել է Հետաքննությունների դաշնային բյուրոյին, որովհետև նրա մյուս գործընկեր Ջորջ Պապադոպուլոսն արդեն իսկ առանձին դետալներ է խոստովանել: Մինչդեռ այն մեղադրանքները, որ գոնե այս պահին ներկայացվում են վերոնշյալ անձանց՝ որևէ ուղիղ կապ չունեն ընտրությունների և Թրամփի հետ, իսկ Մանաֆորթն ու Գեյթսն էլ իրենց շքեղ–կապույտ կոստյումներով ոչ թե ՀԴԲ, այլ Վաշինգտոնի շրջանային դատարան են ներկայացել: Այն էլ՝ ոչ թե հանձնվելու, այլ իրենց հասցեագրված մեղադրանքները հերքելու համար:

Խնդիրն այն է, որ Մանաֆորթն ու իր գործընկերները երկար տարիներ են Վաշինգտոնում զբաղվել թույլատրելի լոբբիստական գործունեությամբ՝ ներկայացնելով տարբեր համաշխարհային առաջնորդների շահերը: Այդ թվում՝ Ռուսաստանի, Ուկրաինայի և այլն: Եվ ահա քննելով հենց ա՛յդ գործունեությունը՝ ԱՄՆ իրավապահները կարծում են, որ Մանաֆորթն այդ ողջ ընթացքում թաքցրել է իր եկամուտների իրական չափը, հետևաբար նաև՝ խուսափել է հարկերից, դրսի ընկերությունների միջոցով զբաղվել է փողերի լվացմամբ (խոսքը մոտ 18 մլն դոլարի մասին է), և ձեռք բերած ահռելի ֆինանսական միջոցները ԱՄՆ–ում ծախսել է անշարժ գույքի, շքեղ ավտոմեքենաների, կոստյումների ու անտիկվարիատի ձեռքբերման վրա: Իհարկե, եթե այս մեղադրանքները հաստատվեն՝ դրանք զգալի ստվեր կգցեն նախագահ Թրամփի հեղինակության վրա, և սա ոչ ոք չի ժխտում: Չի բացառվում նաև, որ հիշյալ գործի շրջանակներում իսկապես բացահայտվեն նաև Մանաֆորթ–Կրեմլ կապերով պայմանավորված՝ Թրամփ–Կրեմլ կապերն ու դրանց ներգործությունն ամերիկյան ընտրությունների վրա: Բայց այս պահին, ինչպես տեսաք, որևէ նման բան չկա, և հիշյալ անձանց նկատմամբ առաջադրված մեղադրանքներում Թրամփի անունը չի հնչում ոչ թե նույնիսկ գործակցի, այլ գոնե Մանաֆորթի գործունեության մասին տեղեկացված անձ լինելու մակարդակում: Հետևաբար, անկախ ԱՄՆ նախագահի նկատմամբ ունեցած վերաբերմունքից, ցանկացած ողջամիտ մարդ, համենայն դեպս, այս փաստերի պարագայում, պարտավոր է համաձայնել Թրամփի այն տեսակետի հետ, ըստ որի՝ ամերիկյան մամուլն ու իսթեբլիշմենթը «վհուկների որս են սկսել», որի միջոցով փորձում են վարկաբեկել նախագահին: Ակնհայտ է նաև, որ այս հիստերիայի վերջը չի էլ երևում, եթե նույնիսկ ՏՏ ոլորտի ազդեցիկ ամերիկյան ընկերություններն են կանգնած պատասխանատվության առաջ՝ իբր, Կրեմլի կողմից ամերիկյան ընտրությունների վրա ներազդելու գործում իրենց տեղեկատվական հարթակների գործածման մեղադրանքով: Բանը հասել է նրան, որ խոսքի ազատության երկրում Կոնգրեսի մակարդակում են մտածում համացանցային ազատության օրենսդրական սահմանափակումների, քթները մարդկանց անձնական կյանք մտցնելու մասին, իսկ ԱՄՆ ուղեղային կենտրոններ դիտարկվող համալսարաններում՝ Սթենֆորդ, Բերքլի և այլն, պրոֆեսորները ճառում են համացանցի՝ ժողովրդավարության տեսանկյունից լուրջ մարտահրավեր լինելու վերաբերյալ: Համաձայնեք՝ այս ամենն արդեն ծիծաղելի էլ չէ:

«Մեր դիրքորոշումն այս առիթով չի փոխվել առաջին իսկ օրվանից: Այժմ հստակ երևում է, որ եթե եղել է համագործակցություն Ռուսաստանի հետ, ապա դա եղել են դեմոկրատներն ու Քլինթոնի ընտանիքը»,– հայտարարել է Սպիտակ տան խոսնակ Սառա Սանդերսը: