Թռչնորս քահանային ուղարկել են զղջման, բայց արդյոք նա զղջո՞ւմ է

Econews.am կայքի հրապարակումն առ այն, որ հոգևորականը չթույլատրված որս է կատարել, անպատասխան չի մնացել Հայ Առաքելական եկեղեցու Արագածոտնի թեմի Առաջնորդարանի կողմից։ 

Մասնավորապես թեմից հանրությանը հետևյալն են փոխանցել. «Տարիներ առաջ իմանալով Տ. Ղևոնդ քահանա Գափոյանի` թույլատրելիի սահմաններում որսասիրական հակումների մասին՝ թեմական համապատասխան մարմինը հորդորել է տեր հորը հրաժարվել իր նախասիրությունից` այն գիտակցությամբ, որ արարչագործությունը սրբազան նվեր է մարդկությանը, իսկ նրա պահպանությունը նվիրական առաքելություն` անկախ կրոնական պատկանելությունից, սեռից, հասարակության մեջ գրաված դիրքից, մասնագիտությունից և կոչումից: Ավելին, Արագածոտնի թեմի Թեմակալ Առաջնորդի կողմից տեր հայրն արժանացել է խիստ նկատողության և անցել ապաշխարության շրջան:

Econews.am 30.10.2017 թ. հրապարակած հոդվածից հետո խնդրո առարկա հարցն Արագածոտնի Թեմի համապատասխան մարմնի կողմից առնված է քննության: Ուսումնասիրության եզրակացությունն` ի պահանջել հարկին, ընկալյալ կարգի համաձայն կներկայացվի Մայր Աթոռ Սուրբ Էջմիածնի Կարգապահական հանձնախմբին` առ ի տնօրինություն»:

Արագածոտնի թեմի առաջնորդի քարտուղար Արման սարկավագ Ահարոնյանից հետաքրքրվեցինք, թե ինչ նկատողություն է ստացել քահանան ու ինչ է ենթադրում ապաշխարության շրջան ասվածը։ Արման սարկավագ Ահարոնյանը մեզ ասաց, որ նման հայտարարություն անելու իրավունք չունի, իսկ ապաշխարության շրջան առհասարակ նշանակում է զղջում, այսինքն՝ զղջման շրջան է դա։

«Յուրաքանչյուր հայ քրիստոնյա՝ մկրտյալ անձ, պետք է մասնակցի ապաշխարության։ Կիրակի օրը, երբ մասնակցում է պատարագի, պատարագի սկզբին տեղի է ունենում ապաշխարության կարգ։ Կամա թե ակամա, գիտակցաբար, թե անգիտակցաբար գործած մեղքերի համար քրիստոնյան ապաշխարության է մասնակցում, որը լինում է անհատական ու ընդհանրական։ Եկեղեցում տեղի է ունենում ընդհանրական ապաշխարում, իսկ անհատների դեպքում՝ անհատական։ 

Հիմա, եթե քրիստոնյան չի մասնակցում ապաշխարության կարգին, ուրեմն նա ինքն իրեն համարում է անմեղ մարդ, բայց անմեղ մարդ գոյություն չունի»,– նշեց Արման սարկավագ Ահարոնյանը։

Հարցին, թե Տ. Ղևոնդ քահանա Գափոյանն առաջին անգամ է նման նկատողություն ստանում, հրաժարվեց պատասխանել՝ նշելով, որ իրավասու չէ նման մանրամասներ բարձրաձայնել։ Դիտարկմանն էլ, թե հնարավոր է արդյունքում հոգևոր աստիճանից զրկել նույնպես չկարողացավ պատասխանել՝ նշելով, որ չի կարող ասել, քանի որ դրա մասին հայտարարություն անելու իրավունք չունի։

Հավելենք, որ ըստ քրիստոնեական եկեղեցու՝ ապաշխարությունը մի նոր ընթացք է քրիստոնյայի համար, ունի շարունակական բնույթ և սահմանափակված չէ ժամանակի ինչ–որ մի հատվածով:

«Թեև մկրտությունը լվանում է մեր մեղքերը, սակայն մկրտությունից հետո էլ ենք մեղք գործում, քանի որ չկա աշխարհում մարդ, որ մեղք չգործի, ուստի յուրաքանչյուր մարդ պետք է զղջա մինչև իր վերջին շունչը: Այդ պատճառով այս խորհուրդը կրկնելի է: Այս մասին Հովհաննես Աստվածաբան առաքյալը ասում է. «Եթե ասենք՝ «Մեղք չունենք», ինքներս մեզ ենք խաբում, և ճշմարտություն չկա մեր մեջ: Իսկ եթե խոստովանենք մեր մեղքերը, վստա՛հ եղեք, թե Աստված, որ արդար է, կների մեր մեղքերը և մեզ կսրբի մեր բոլոր անիրավություններից»։ Ապաշխարությունը սրբարար զորություն ունեցող խորհուրդ է. հաստատում է ընկածներին, վերստին կենդանացնում, նորոգում հոգևոր կյանքը և հաշտեցնում Աստծո հետ: Անկեղծ խոստովանությամբ քրիստոնյան ոչ միայն մեղքերի թողություն է ստանում, այլ նաև հոգևոր առողջություն է ձեռք բերում. վերականգնվում է խղճի հանգստությունը, հոգու խաղաղությունը, Աստծո օրհնությունն է իջնում մարդու վրա: Այս խորհրդով վերականգնվում է այն, ինչ ստանում ենք մկրտության ժամանակ»,– կարդում ենք Առաքելական եկեղեցիներից մեկի պաշտոնական կայք–էջում:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ

«Փաստ»