Դեղատոմսի մասին օրենքի նախագիծն արդեն կառավարությունում է

Կառավարությունը որոշել է ուժը կորցրած ճանաչել «ՀՀ–ում կիրառվող դեղատոմսերի ձևերը հաստատելու մասին» որոշումը, ինչը կքննարկվի հինգշաբթի օրը կայանալիք նիստի ընթացքում:

«Դեղատոմսերի ձևերը, դեղատոմսեր գրելու, դեղեր բաց թողնելու (ներառյալ` էլեկտրոնային եղանակով) կարգը, ինչպես նաև դեղերի և դեղանյութերի հաշվառման կարգը սահմանելու և Հայաստանի Հանրապետության կառավարության 2001 թ. օգոստոսի 14–ի թիվ 759 որոշումն ուժը կորցրած ճանաչելու մասին» կառավարության որոշման նախագիծը մշակվել է «Դեղերի մասին» օրենքի 25–րդ հոդվածի 4–րդ մասի հիման վրա՝ ի կատարումն վարչապետի 2016 թ. օգոստոսի 11–ի թիվ 736–Ա որոշման և պայմանավորված է «Դեղերի մասին» նոր օրենքին համապատասխանեցնելու անհրաժեշտությամբ:

Հաշվի առնելով «Դեղերի մասին» նոր օրենքում առկա կարգավորումները` անհրաժեշտություն է առաջացել վերանայել դեղատոմսերի գրման և դեղերի բացթողնման կարգն ու դեղատոմսերի ձևերը՝ դրանք համապատասխանեցնելով գործող օրենսդրության պահանջներին:

Նախագծի նպատակն է մեկ միասնական փաստաթղթով կարգավորել ՀՀ տարածքում դեղերի դեղատոմսերի շրջանառությունը՝ հստակ սահմանելով ՀՀ–ում թմրամիջոցների, հոգեմետ նյութեր պարունակող դեղերի, անվճար և արտոնյալ կարգով հատկացվող դեղերի գրման, բացթողնման և հաշվառման կարգերը, դեղատոմսերի ձևերը` համապատասխանեցնելով գործող օրենսդրությանը:

Նախագծի համաձայն՝ դեղատոմսը մնում է դեղատանը, հետագայում պատշաճ վերահսկողություն և մշտադիտարկում իրականացնելու նպատակով: Միաժամանակ սահմանվել են նոր դեղատոմսային չորս տեսակի ձևաթղթեր նախկին երեքի փոխարեն: Ըստ այդմ կլինեն մեկանգամյա, բազմակի, թմրամիջոց ու հոգեմետ նյութեր պարունակող դեղերի համար դեղատոմսեր:

Բազմակի օգտագործման, այդ թվում` անվճար կամ արտոնյալ պայմաններով տրամադրվող դեղերի դեղատոմսով գրվում են պացիենտի երկարատև բուժումն իրականացնելու, քրոնիկ հիվանդություններով տառապող հիվանդների համար և նախատեսվում են գրել վեց ամսվա կտրվածքով: Ինչպես նաև նախագծով չի բացառվում դեղերի բաց թողումը ոչ ամբողջական սպառողական փաթեթով՝ կախված պացիենտի հայեցողությունից:

Դրական միտում կարելի է համարել դեղատոմսերում դեղերը համընդհանուր (ջեներիկ) անվանումներով գրելու պահանջը, ինչը նշանակում է, որ այլևս բժիշկները չեն կարող այս կամ այն կոնկրետ ֆիրմայի դեղ նշանակել, այլ կնշվի պարզապես համընդհանուր անունը: Օրինակ՝ եթե նախկինում բժշիկը կարող էր նշանակել դիկլոֆենակ պարունակող «Դիկլակ» դեղամիջոցը, ապա այժմ դեղատոմսում իրավունք ունի նշել միայն դիկլոֆենակ: Դեղատուն այցելելով՝ մարդն ինքը կորոշի, թե որ ընկերության դեղը գնի: Դեղատունը դեղ ձեռք բերող անձին պարտավորվում է ներկայացնել դեղատանը առկա նույն բաղադրատարրը պարունակող, նույն դեղաչափով և դեղաձևով փոխադարձաբար փոխարինելի բոլոր դեղերի վերաբերյալ սպառիչ տեղեկատվություն, այդ թվում՝ գների մասին առանց ուղղորդման:

Դեղատոմսի ձևի վրա նախատեսվում է նշել պացիենտի ծննդյան թիվը կամ տարիքը, ընդ որում՝ մինչև 5 տարեկան երեխաների տարիքը պիտի գրվի տարիներով և ամիսներով՝ ելնելով երեխաների անվտանգության խնդիրներից, քանի որ գոյություն ունեն որոշ դեղեր, որոնց դոզավորումը իրականացվում է ըստ երեխայի տարիքի տարիներով և ամիսներով:

Նախագծով նաև պարզեցված է թմրամիջոցների նշանակման կարգը, ինչպես նաև դեղատոմսի ուժի մեջ լինելը՝ համաձայն «Թմրամիջոցների մասին օրենքի»: Բացի այդ, սահմանվել է պահանջ, համաձայն որի թմրամիջոցներ և հոգեմետ նյութեր պարունակող դեղեր կարող են գրել բժշկական օգնություն և սպասարկում իրականացնող հաստատությունների ընտանեկան բժիշկները, ինչպես նաև պացիենտին բուժող բժիշկները` անկախ մասնագիտությունից:

Հավելենք, որ նախագիծը մշակվել է Առողջապահության նախարարության աշխատակազմի դեղորայքային քաղաքականության և բժշկական տեխնոլոգիաների վարչության, «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲԸ–ի և նախարարության աշխատակազմի իրավաբանական վարչության կողմից: