Բարզանին մեղադրում է Բաղդադին և ԱՄՆ–ին

Իրաքյան Քուրդիստանի նախկին նախագահ Մասուդ Բարզանին իր հրաժարականից հետո հաճախ է շփվում մամուլի հետ և, բնականաբար, շատ ավելի անկաշկանդ է առանձին ճշմարտություններ բացահայտում: Newsweek ամերիկյան հանդեսին տված հարցազրույցում, օրինակ (որն անցած շաբաթ նրան ներկայացրել էր որպես անկախության հանրաքվե գլուխ բերած, բայց քրդական պետության ստեղծման շանսերը նվազեցրած գործիչ) Բարզանին հայտարարել է, որ քրդերին ճնշելու և Քիրքուք մտնելու իրաքյան ծրագիրը դեռ Հանրաքվեից շատ առաջ է պլանավորվել, և այժմ, եթե նույնիսկ ներկայիս քրդական կառավարությունը չեղարկի դրա արդյունքները, Բաղդադը երբեք չի հրաժարվի իր պլաններից: Նա չի համաձայնել նաև ընդունված այն տեսակետի հետ, թե իր կառավարությունը ժամանակից առաջ ընկավ անկախական մղումներով և հայտարարել է, որ իրենց միակ սխալը Հանրաքվեն ոչ թե շուտ կազմակերպելու, այլ մի բան էլ ուշացնելու մեջ է տեսնում: Միևնույն ժամանակ՝ Բարզանին ընդունել է իր մեղքն այն հարցում, որ երբևէ չի հավատացել, թե ԴԱԻՇ–ի դեմ կռվելու համար նախատեսված ամերիկյան զենքը կարող էր նաև քուրդ ժողովրդի դեմ ուղղվել: Ինչ վերաբերում է դաշնակից ԱՄՆ–ին, Բարզանին չի թաքցրել, որ վերջին շրջանում Սպիտակ տան հետ Էրբիլն առանձնապես նորմալ հարաբերություններ չի ունեցել, և այժմ արդեն պարզ է, որ ԱՄՆ–ն ոչ միայն նախապես է իմացել Բաղդադի ծրագրերի մասին, այլև ամեն կերպ է օժանդակել կենտրոնական իշխանություններին: Եվ դա այն դեպքում, երբ Իրաքի կառավարության բոլոր որոշումները, ըստ Բարզանիի, Թեհրանում են ընդունվել, և այն, ինչով այժմ Բաղդադն է զբաղված վիճելի տարածքներում, ոչ այլ ինչ է, քան՝ քրդերին տեղահանելու միջոցով վիճելի տարածքներում դեմոգրաֆիական պատկերի փոփոխության ձգտում:

Հաջորդ նյութը, որին անպայման արժե ուշադրություն դարձնել, Մասուդ Բարզանիի՝ NPR–ին տված հարցազրույցն է, որ դարձյալ ուղերձների մի ամբողջ համագումար է: Առաջինը դարձյալ Հանրաքվեի հետ է կապված, որի առնչությամբ Բարզանին հայտարարում է, որ չի ափսոսում այն կազմակերպելու և քրդական ժողովրդի ձայնը աշխարհի ու Բաղդադի համար լսելի դարձնելու համար: Ինչ վերաբերում է Վաշինգտոնին՝ սովորաբար զգուշավոր Բարզանին հարկ չի համարել այլևս քաղաքական կոռեկտություն պահպանել և հայտարարել է, որ այն ժամանակ, երբ Իրանի շիա աշխարհազորայիններն ու Իրաքի զինված ուժերը ամերիկյան զենքով դուրս եկան քրդերի դեմ, ԱՄՆ–ն անակնկալ լռություն պահպանեց 2003–ից սկսած՝ իր հավատարիմ դաշնակցի տառապանքի հետ կապված: Արդյունքում՝ «ԱՄՆ–Քուրդիստան հարաբերությունները պիտի վերանայվեն… ավելի ճիշտ՝ այն արդեն այդպես է… որովհետև սերը, հույսը, վստահությունը, որ մարդիկ ունեին ԱՄՆ–ի նկատմամբ, այժմ օրեցօր նվազում է»,– հայտարարել է Բարզանին՝ պնդելով, որ քրդական պայքարը ոչ թե ավարտվել, այլ պարզապես նոր փուլ է մտել :