Ոմանք Դանիա կմեկնեն առանց վիզայի վճար կատարելու

ՀՀ կառավարության և Դանիայի Թագավորության միջև վիզաների տրամադրումը դյուրացնելու մասին համաձայնագիր է կնքվել՝ դյուրացնելու համար ՀՀ քաղաքացիների մուտքի վիզաների տրամադրումը: Այս մասին որոշման նախագիծը կներկայացվի գործադիրի՝ այսօր կայանալիք նիստի ընթացքում:

Համաձայնագիրը կնքվել է նաև նկատի ունենալով, որ 2013 թ. հունվարի 10–ից հետո ԵՄ բոլոր քաղաքացիները 90 օրը չգերազանցող ժամանակահատվածով դեպի Հայաստան ճամփորդելիս կամ ՀՀ տարածքով տարանցելիս ազատված են մուտքի վիզայի պահանջից: Համաձայնագրի նպատակն է դյուրացնել վիզաների տրամադրումը ՀՀ քաղաքացիներին 90 օրից ոչ ավելի ժամանակահատվածում Դանիայի Թագավորությունում և Շենգենյան գոտու այլ անդամ պետություններում գտնվելու համար:

Եթե Հայաստանը վերականգնի վիզայի պահանջները ԵՄ քաղաքացիների կամ նրանց որոշ կատեգորիաների համար, ապա այն նույն դյուրացումները, որոնք այս համաձայնագրով շնորհվել են ՀՀ քաղաքացիներին, փոխադարձության սկզբունքի հիման վրա կկիրառվեն Դանիայի Թագավորության համապատասխան քաղաքացիների նկատմամբ:

Մեր քաղաքացիների՝ իրենց ճամփորդությունը հիմնավորելու համար տարբեր դեպքերում անհրաժեշտ են տարբեր փաստաթղթեր: Այս շարքն իհարկե բավական երկար է, սակայն ներկայացնենք դրանցից միայն մի քանիսը: Դանիայում օրինական բնակվող ՀՀ քաղաքացիներին կամ հենց Դանիայի քաղաքացիներին այցելող հայաստանցի մերձավոր ազգականները պետք է ունենան գրավոր դիմում հյուրընկալող անձի կողմից:Պաշտոնական պատվիրակության անդամները պետք է ունենան իրավասու մարմնի կողմից տրված նամակը, որով հաստատվում է, որ դիմողը իր պատվիրակության անդամ է: Դպրոցականների, ուսանողների, հետբուհական կրթություն ստացող անձանց և ուղեկցող ուսուցիչների համար, ովքեր ճամփորդում են ուսման կամ կրթական վերապատրաստման նպատակով` հյուրընկալող համալսարանի, քոլեջի կամ դպրոցի կողմից գրավոր դիմում կամ ընդունման մասին վկայական պետք է ներկայացնեն: 

Բուժման նպատակով ճամփորդող անձանց անհրաժեշտ է ունենալ բուժհիմնարկի պաշտոնական փաստաթուղթը: Լրագրողների և մասնագիտական պարտականությունների կատարման շրջանակներում նրանց ուղեկցող տեխնիկական անձնակազմին անհրաժեշտ է մասնագիտական կազմակերպության կամ դիմողի գործատուի կողմից տրված վկայական կամ այլ փաստաթուղթ:

Նշենք, որ վիզայի դիմումների հետ կապված ձևակերպումների համար վճարը կազմում է 35 եվրո: Սակայն կան մարդիկ, ովքեր ազատվում են այդ վճարներից: Դրանց թվում են թոշակառուները, 12 տարեկանից փոքր երեխաները, լրագրողները, հաշմանդամություն ունեցող անձինք և նրանց ուղեկցող անձինք, Դանիայի տարածքում օրինական բնակվող մեր քաղաքացիների կամ Դանիայի քաղաքացիների հայաստանցի մերձավոր ազգականները` ամուսինները, երեխաները, ծնողները, տատիկները, պապիկները, թոռները, պաշտոնական պատվիրակությունների անդամները, ինչպես նաև դպրոցականները, ուսանողները, հետբուհական կրթություն ստացող անձինք ու նրանց ուղեկցող ուսուցիչները:

Հավելենք, որ մեր այն քաղաքացիները, ովքեր ունեն վավեր դիվանագիտական անձնագրեր, կարող են մուտք գործել Դանիայի Թագավորության տարածք, այնտեղից դուրս գալ և այն տարանցել` առանց վիզաների: Նրանք Դանիայի տարածքում կարող են մնալ առանց վիզաների 90 օրվանից ոչ ավելի ժամկետով:

Միաժամանակ համաձայնագրում ասված է, որ պահպանելով ազգային անվտանգության վերաբերյալ Դանիայի Թագավորության ազգային կանոններն ու կանոնակարգերը և տարածքային սահմանափակ վավերությամբ վիզաների մասին ԵՄ կանոնները` ՀՀ քաղաքացիներն իրավունք ունեն ճամփորդել Շենգենյան գոտու անդամ պետությունների տարածքներով Եվրոպական միության քաղաքացիների հետ հավասար հիմունքներով:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ

Past.am