Գոնե տուգանելն օգնի աղմուկի «բերանը» փակել

Գաղտնիք չէ, որ երբ մարդիկ միջոցառում են կազմակերպում, առաջին շեշտը դնում են բարձրախոսների հզորության վրա: Դա նրա համար է, որ միջոցառման մասին իմանան անգամ մի քանի թաղամաս այն կողմ բնակվողները: Ժամանցային վայրերում ու փակ տարածություններում կազմակերպվող միջոցառումների կազմակերպիչները, առաջնորդվելով նույն սկզբունքով, բարձրախոսից դուրս եկող ձայնային ալիքների հզորությունը չեն կանոնակարգում՝ հաճելի ժամանցը վերածելով տանջանքի:
Ձայնային ալիքների առաջացրած տատանումն, իրականում, պետք է այնքան լինի, որ միջոցառումը չվերածվի ժխորի և տարեդարձը չդառնա հիվանդության պատճառ: Ի դեպ, մանկական ժամանցային վայրերում նույնպես ժխորի պակաս չկա, իսկ թե դրանից հետո ինչ կարող է պատահել երեխայի հետ՝ ժամանցի կազմակերպիչներին ամենևին էլ չի հետաքրքրում:

Ի դեպ, ժամանցային վայրերի համար գործում է ոչ միայն հին օրենքը, որը սահմանափակում է երեկոյան 23:00–ից հետո աղմուկը, այլ մշակվել են նաև սանիտարական կանոններ և նորմեր, որոնք կարգավորում են աշխատավայրերի և ժամանցային վայրերի աղմուկը:

«Հաշվի առնելով հարցի կարևորությունը՝ Առողջապահության նախարարությունը մշակել և կառավարությանն է ներկայացրել սանիտարական կանոնների նոր փոփոխությունները, որտեղ սահմանվում են մանկական սրճարանների և զվարճանքի վայրերի ձայնի բարձրության նոր նորմատիվային չափանիշները: Այն արդեն հնարավորություն կտա համապատասխան մարմինների կողմից վերահսկողություն իրականացնել ձայնի թույլատրելի չափանիշների խախտման վրա»,– «Փաստի» հետ զրույցում ասաց Առողջապահության նախարարության հիվանդությունների վերահսկման և կանխարգելման ազգային կենտրոնում որպես աշխատանքի հիգիենայի, ճառագայթային և քիմիական անվտանգության բաժնի պետ Հովսեփ Հովհաննիսյանը:

Սահմանվել է աղմուկի կամ երաժշտության բարձրության այն մաքսիմալ չափը, որը թույլատրելի է: Որոշումն ուժի մեջ մտնելուց հետո թույլատրելիից ավելի բարձր ձայնի առկայությունը կհամարվի խախտում: Ի դեպ, սանիտարական կանոնները սահմանելիս ձայնի առավելագույն թույլատրելի մակարդակը հաշվարկելու ժամանակ հաշվի է առնվել ողջ բնակչության առանձնահատկությունները՝ ելնելով տարիքային և սեռային կազմերից:
Համաձայն դրա՝ աշխատավայրում ներթափանցող աղմուկը չպետք է գերազանցի 55 դեցիբելը, իսկ ձայնարկիչ սարքի աշխատանքի դեպքում, դրանից 2 մետր հեռավորության վրա ձայնի բարձրությունը չպետք է գերազանցի 85 դեցիբելը:

Ու քանի որ բարձր ձայնը կամ երաժշտությունը մարդկանց և երեխաների մոտ կարող է առաջացնել ուղեղի խանգարումներ և այլ հիվանդություններ, իսկ որոշ դեպքերում նաև կարող է երկար տևել, ուստի մասնագետները խորհուրդ չեն տալիս երեխաներին հաճախ նման աղմկոտ վայրեր տանել:

Մասնագետները նշում են նաև, որ աղմուկից առաջացող նյարդային խանգարումներն անցողիկ բնույթ ունեն և, եթե մարդը ստիպված չէ ամեն օր նման վայրերում գտնվել, ապա բարձր երաժշտության հետևանքով առաջացած ուղեղի խանգարումը որոշ ժամանակ հետո անցնում է: 

«Եթե խոսում ենք աշխատողի մասին, ապա պետք է աշխատանքային օրը նշված չափանիշների պայմաններում 8 ժամ լինի, որպեսզի մարդու առողջությունը չվնասվի: Ինչ վերաբերում է մանկական ժամանցային վայրերում ձայնի բարձրության հետևանքով առաջացած խանգարումներին, ապա ես չեմ բացառում, որ երեխայի մոտ գիշերային քնի խախտում, նյարդային վարքագծի դրսևորում, ականջի ցավ լինի, բայց փորձը ցույց է տալիս, որ նման խանգարումները կարճ ժամանակի ընթացքում՝ 1–2 օրում վերականգնվում են և երեխայի օրգանիզմի վրա երկարատև վնասակար ազդեցություն չեն ունենում»,– ասաց Հ. Հովհաննիսյանը:

Ի դեպ, նոր նախագծի համաձայն կկանոնակարգվի ոչ միայն ժամանցի վայրերի, այլ բաց հարթակներում իրականացվող միջոցառումներից հնչող ձայնի առավելագույն չափը, իսկ դրան չհետևողները, ինչպես խախտումների մնացած դեպքերի ժամանակ, համապատասխան մարմինների կողմից կտուգանվեն

Արմինե Գրիգորյան