«Ռիո»–ի ռուսական ցուցանակը հակասում է օրենքին, բայց տեսչությունից դեռ չեն շտապում՝ տոնական տրամադրությունը չփչացնելու համար

Past.am-ը տեղեկացնում է.Օրեր առաջ Երևանում մեծ շուքով բացվեց «Ռիո մոլ» առևտրաժամանցային կենտրոնը: Բացմանը ներկա էին բազմաթիվ բարձրաստիճան պաշտոնյաներ: Առևտրի կենտրոնն էլ, ինչպես հայտնի է, պատկանում է Սամվել Կարապետյանին: Իհարկե այս ամենը մի կողմ: Մեր ուշադրությունը գրավել է ոչ այնքան այդ մոլի շուրջ ծագած աժիոտաժը, այլ այն, որ դրա անվան ցուցանակը հակասում է ՀՀ «Լեզվի մասին օրենքին»:

Օրենքով բոլոր խանութները, ժամանցային կենտրոնները, գրասենյակները առաջին հերթին պետք է ունենան հայերեն անվանում և նոր միայն օտար լեզվով: Իսկ «Ռիո մոլ»–ն ունի միայն մեկը, այն էլ՝ ռուսերեն լեզվով:

«Լեզվի մասին օրենքի» 4–րդ հոդվածի 2–րդ մասի պահանջներով ՀՀ պետական մարմինները, ձեռնարկությունները, հիմնարկները, կազմակերպությունները պարտավոր են ցուցանակները, ձևաթղթերը, դրոշմանիշերը, նամականիշերը, կնիքներն ու գովազդի բոլոր միջոցները ձևավորել հայերեն՝ անհրաժեշտության դեպքում զուգակցելով այլ լեզուներով: Ոչ հայերեն ձևավորման համար նախատեսվում է տուգանք վարչական իրավախախտումների վերաբերյալ ՀՀ օրենսգրքի 189–ի 3–րդ հոդվածով:

Խախտումն առաջացնում է տուգանքի նշանակում նվազագույն աշխատավարձի 200–250–ապատիկի չափով, իսկ պաշտոնական անձանց համար՝ 250–300–ապատիկի չափով:

Խնդրի հետ կապված զանգահարեցինք Լեզվի պետական տեսչություն՝ հասկանալու, թե ստեղծված իրավիճակում իրենք ի՞նչ անելիքներ ունեն: Տեսչության պետի տեղակալ Մարինե Հովյանը «Փաստին» տեղեկացրեց, որ այս պահի դրությամբ իրենք օրենքով ստուգումներ իրականացնելու ոչ մի իրավասություն չունեն, քանի որ ընթացքում ենտեսչական բարեփոխումները: Դրանց ավարտից հետո միայն տեսչությունը կշարունակի իր սովորական գործառույթների իրականացումը: Հովյանի փոխանցմամբ՝ 2015 թ. մեկնարկած այդ բարեփոխումներին բավական քիչ ժամանակ է մնացել՝ մինչև տարեվերջ կավարտվեն:

Քանի որ տեսչությունը ստուգումներ ու տուգանքներ նշանակելու իրավասություն չունի և փաստացի մոտ երկու տարի վերահսկում չի իրականացնում, այս պահին նրանք սահմանափակվում են իրազեկումներով: Մարինե Հովյանը նաև հավաստիացրեց, որ այդ իրազեկումները արդյունավետ են և կրկին նույն օբյեկտը ստուգելիս տեսնում են, որ իրենց դիտողությունը հաշվի են առել: Չնայած ամբողջ ստուգումների 40%–ն է դեռևս համապատասխան արձագանք ստացել:

«2015 թ. հունիսի 30–ից ստուգումներ չենք իրականացնում, քանի որ կա կառավարության որոշում: Այդ որոշմամբ ոչ միայն լեզվի պետական տեսչության, այլ մնացած բոլոր տեսչությունների գործունեությունը ստուգումների և վարչական վարույթների մասով կասեցվել է: Մենք տեսչական այդ բարեփոխումների ընթացքը օգտագործեցինք կանխարգելիչ միջոցառումներ անելու համար: Աշխարհում էլ է այսպես ընդունված. ավելի շատ մարդկանց գիտակցության վրա են աշխատում, դաստիարակչական աշխատանքներ են տանում տնտեսվարող սուբյեկտների հետ, որպեսզի նրանք օրենսդրության պահանջներին համապատասխանեցնեն իրենց գործուենությունը»,– նշեց նա:

Մարինե Հովյանը նշում է. ««Ռիո»–ի դեպքում բացման օրն արդեն նախապատրաստել էինք, որ տանեինք: Բայց քանի որ իմացանք, որ հենց բացման օրն է, մի փոքր ընկրկեցինք, որ գոնե մի քանի օր անցնի, հետո այդ մասին իրազեկենք: Չնայած ես սոցիալական ցանցում ի պաշտոնե իրենց շնորհավորել եմ բացման կապակցությամբ՝ գրառելով ցուցանակի՝ օրենքին չհամապատասխանելու մասին, ինչին, սակայն, առայժմ չեն արձագանքել»:

Հովյանի խոսքով՝ առաջիկա օրերին պատրաստվում են իրազեկումը տանել «Ռիո»: Պարզապես տեսչությունում մտածում են բարեկրթության սահմանները չանցնել: Հարցին, արդյոք դա պայմանավորվա՞ծ չէ այն հանգամանքով, որ մոլի սեփականատերը Սամվել Կարապետյանն է, և այլ դեպքերում դուք նույնպես այդպես հապաղո՞ւմ եք, պատասխանեց, որ պայմանավորված չէ:

«Լեզվի տեսչության պարագայում չկան այդ կարգի պայմանավորվածություններ: Գուցե մեր նկատմամբ վերաբերմունքը ձևավորվել է այդ պայմանավորվածություններին ընդառաջ չգնալու պատճառով: Իրազեկումը կանենք, ուղակի գեղեցիկ չէ, որ մարդը բացել է, այդ օրն իր համար տոն է, իսկ մենք գնում ենք հենց այդ օրն ասում՝ գիտես ինչ, խախտումներ ես արել: Մյուս շաբաթ մենք անպայման իրազեկումը կտանենք ու կհետևենք՝ արդյոք ականջալուր եղա՞ն մեր խոսքին»,– նկատեց նա:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ