Ոսկու հանքը մոտ է Արդվիին, բայց դրա լինել–չլինելը կորոշեն մղարթցիները

Past.am.Նոյեմբերի 29–ին Օձունի համայնքապետարանում պիտի կայանային հանրային քննարկումներ «Միռամ» ՍՊԸ–ի կողմից ներկայացված Լոռու մարզի Շեկաղբյուրի ոսկի–բազմամետաղների հանքերևակումում 2017–2020 թթ. երկրաբանական ուսումնասիրությունններ իրականացնելու վերաբերյալ:

Հիշեցնենք, որ այս ոսկու հանքը բավական մոտ է գտնվում Արդվի համայնքին, և հենց արդվեցիների շնորհիվ ամռանը հանրային քննարկումները տապալվեցին: Սակայն, լսումներն Օձունում անցկացնելու փաստը արդվեցիներին լուրջ մտահոգվելու տեղիք է տվել: Արդվու նախաձեռնող խմբից մեզ հայտնեցին, որ իրենց նամակների արդյունքում նախարարությունը տվեց բացասական եզրակացություն, և հայտը ուղարկվեց լրամշակման: Սակայն «Միռամ» ընկերությունը սպասել է համայնքների խոշորացմանը և խոշորացումից 10 օր չանցած լրամշակված հայտը ներկայացրել նախարարություն: Ըստ արդվեցիների՝ ընկերությունը բավական խորամանկ քայլեր է ձեռնարկել: Նախագծից հանվել է Արդվիի 140–ից ավելի հա–ը և գրվել, որ աշխատանքներ կկատարվեն միայն Մղարթ համայնքի 54 հա–ի վրա:

«Բայց Մղարթի այդ տարածքն անմիջապես մեր գյուղի հողերի վերևում է, այսինքն՝ նոր ծրագրով ազդեցության փոփոխություն չի լինելու: Միակ դրական բանն այն է, որ մեր արոտավայրերը չեն փչանա: Բայց դժվարը սկսելն է, վաղը, մյուս օրը դրանց էլ կարող են հասնել: Մնացած բոլոր ազդեցությունները՝ ջրի աղտոտումը, փոշին նույնն են լինելու: Իրենց հայտում նշել են, որ տվյալ տարածքը Մղարթից հեռու է 3,5 կմ, Հովհանաձորից՝ 2,9 կմ, իսկ Արդվիի մասին գրում են որպես հարակից տարածք՝ չնշելով, որ Արդվին հեռու է ընդամենը 2 կմ–ով»,– նշեցին գյուղացիները:

Հարցին, թե արդվեցիներին այդ լսումներին մասնակցելու համար հրավիրել են, պատասխանեցին, որ դեռևս ոչ մի պաշտոնական լուր չկա: Իրենք հայտարարությունը տեսել են բնապահպանության նախարարության կայքում և, եթե լսումները Արդվիում տեղի չունենան, բոլորով գնալու են Օձուն՝ իրենց կարծիքը հայտնելու համար:

Օձունի համայնքապետ Արսեն Տիտանյանից փորձեցինք հասկանալ, թե ինչո՞ւ է ընտրվել Օձուն համայնքը և արդյոք չէ՞ր կարելի հանրային քննարկումներն անցկացնել Արդվիում: Սակայն Տիտանյանը տեղեկացրեց, որ այսօր առավոտյան իր և նախարարության աշխատակցի զրույցից հետո և՛ քննարկումների օրն է փոխվել, և՛ վայրը:

«Առաջարկել եմ հանրային քննարկումները տեղափոխել դեկտեմբերի 1 և Մղարթի գյուղապետարանում դրանք կազմակերպել: Կհրավիրենք նաև Արդվիի բնակիչներին»,– տեղեկացրեց համայնքապետը: Մեր դիտարկմանը, թե հանքին ամենից մոտիկ համայնքը Արդվին է և տրմաբանական էր այնտեղ անցկացնել լսումներ, Տիտանյանը պատասխանեց, որ օրենքով պիտի այն համայնքում անցկացնել, որի վարչական տարածքում էլ գտնվում է հանքը: Եվ ըստ նրա՝ այս դեպքում որոշողը Մղարթը պիտի լինի. «Նայեք, եթե Արդվիում տապալել են քննարկումները, հիմա առաջարկվում է Մղարթում անել: Եթե Մղարթի բնակչությունը համաձայն է, դա իրենց որոշելու հարցն է: Ես խոստացել եմ բոլորի կողքին լինել: Հիմա այդ համայնքը ինչ կորոշի, ես իրենց հետ եմ, ավել ինչ ասեմ»,– նշեց նա:

Սակայն նշված 54 հա–ն բուն համայնքի տարածքի մեջ չի գտնվում, այլ Մղարթից բավական հեռու գտնվող առանձին հողատարածք է՝ Մղարթին դեռևս կոմունիստներից բաժին հասած արոտավայր: Սրան ի պատասխան՝ Տիտանյանը հավելեց, որ մեզնից է այդ մասին տեղեկանում:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ