Ռուսական «Զվեզդան» ու ՀՀԿ արծիվը

Ռուսական «Զվեզդա» հեռուստաալիքը, որը ներկայացնում է այդ երկրի զինված ուժերը, իր հաղորդումներից մեկի ժամանակ անդրադարձել էր ՀՀ–ԵՄ առաջիկայում շրջանակային համաձայնագրի ստորագրմանը: Ռուսական որոշ շրջանակներ ցավոտ են տանում այդ ստորագրումը և ամեն կերպ փորձում են խոսել այդ մասին, խոսել այնպես, որ Հայաստանը դիտարկվի որպես երկիր, որ ուրանում է ռուսների հետ եղբայրությունը:
Այս անգամ, սակայն, Հայաստանի հանդեպ քննադատությունը հասել է ՀՀԿ–ին, ավելի շուտ ՀՀԿ գերբին՝ արծվին: Հաղորդման հաղորդավարուհու կարծիքով, պատահական չէ, որ իրեն հանդիպած հայերը պնդում են, որ արիացի են, իսկ արիացիների երկրի իշխող ուժի գերբը շատ նման է նացիստական գերբին:

Այն, որ ՀՀԿ–ն պաշտոնապես ցեղակրոն է, մենք գիտեինք: Գիտենք նաև, որ ցեղակրոնության կնքահայր Նժդեհը կոշտ է եղել բոլշևիկների հետ, միաժամանակ որոշակի դիվանագիտական կապեր ունեցել նացիստական Գերմանիայի հետ: Բայց նաև գիտենք, որ ՀՀԿ–ն միայն պաշտոնապես է ցեղակրոն, կանոնադրության մեկ կետով և մեկ–երկու ավագ սերնդի հանրապետականներով, որոնք բացի ՀՀԿ գործադիր մարմնում սիմվոլիկ ներկայությունից, ոչ մի ազդեցություն չունեն: ՀՀԿ–ն պարզապես իշխողների հավաքատեղի է, վայր, որտեղ հավաքված են տնտեսական ու քաղաքական կապիտալ ունեցողները, մոտավորապես այնպես, ինչպես օրինակ Եդինայա Ռոսիան: Մի տարբերությամբ՝ ներկայիս ՀՀԿ–ն պարզապես ձևավորվել է նախկին, քիչ թե շատ գաղափարական ՀՀԿ փլատակների վրա:

Եթե ռուսները սա գիտեն, բայց ամեն դեպքում խոսում են բացառապես ՀՀԿ սիմվոլիկ պատկերից, ուրեմն նրանց նպատակը բացառապես քարոզչական է: Եթե չգիտեն ու չեն էլ ուզում իմանալ, ուրեմն կրկին բացառապես քարոզչական նպատակ են հետապնդում՝ առանց փորձելու խորանալ ու հասկանալ իրական պատկերը այն թիրախի, որը որոշել են քննադատել:


Արտակ Ասլանյան