Գայանե Թերզյան. «Նախադպրոցական կրթության ոլորտում փոփոխությունները կարող են կոռուպցիոն ռիսկեր պարունակել»

Կառավարությունը պատրաստվում է նախադպրոցական կրթության ոլորտում ներդնել ծախսարդյունավետ մոդելների ծրագիր, որի շրջանակներում առաջարկվում են մի քանի տարբերակներ: Դրանցից մեկը ենթադրում է, որ միևնույն համայնքում գործող մի քանի մանկապարտեզներ կարող են գործել առանձին, բայց ունենալ մեկ վարչական աշխատակազմ և տնօրեն:

Կրթության փորձագետ Գայանե Թերզյանի կարծիքով, եթե վարչական միավորում է լինելու, այդ դեպքում էական փոփոխություններ չեն լինի:

«Եթե տարածքը նույնն է մնում, եթե հնարավորությունները չեն կրճատում, եթե մի շենքը չեն վերցնում և  երեխաներին խցկում ավելի փոքր տարածք ունեցող շենքի մեջ, այս դեպքում մեծ բան չի փոխվի»,– «Փաստ» ի թղթակցի հետ զրույցում ասաց նա:
Հակառակ ազդեցությունը կլինի, եթե նյութատեխնիկական համակարգում կրճատումներ լինեն: Այս դեպում փորձագետի դիտարկմամբ՝ կրթության բովանդակային կողմը կտուժի:
«Այլ բան է, եթե խմբում դաստիարակն աշխատում է տասնհինգ կամ քսան երեխայի հետ, մեկ այլ բան՝ եթե երեխաների թիվը երեսունի է հասնում: Չի կարող որակը նույնը լինել: Եթե ֆինանսավորումը երեխաների մասով չի կրճատվում, փոփոխություններ հազիվ թե լինեն: Իսկ եթե փոփոխությունները ենթադրում են նաև նյութատեխնիկական կրճատումներ, ապա դա, բնականաբար, երեխաների դաստիարակության վրա կազդի: Կան որոշակի սանիտարական նորմեր. ասենք՝ եթե խմբում այսքան երեխա է, ապա տարածքը պետք է նրանց հաշվով լինի և այլն, որոնք պետք է պահպանել»,– նկատեց փորձագետը:

Ըստ նրա, սակայն, ծրագիրն իր բացասական ազդեցությունը կթողնի աշխատատեղերի կրճատման հարցում: Տնօրեն և  որոշ աշխատակիցներ կկրճատվեն: Հետևաբար, գործազրկության տոկոսը կբարձրանա:

Փաստորեն, երեխաների կրթության վրա փող չծախսելու համար Հայաստանում փորձում են ձևավորել տնօրեն չունեցող մանկապարտեզներ: 

Գայանե Թերզյանի դիտարկմամբ՝ եթե երկու մանկապարտեզի տնօրեններից մեկն է մնալու, դա կարող է իր մեջ կոռուպցիոն ռիսկեր պարունակել:

«Գիտենք, թե մեր երկրում ինչպես է սովորաբար ընտրություն տեղի ունենում, եթե երկու տնտեսության ղեկավարներից մեկը պետք է մնա: Աշխարհում սա այլ տարբերակով է լուծվում, մեզ մոտ՝ բոլորիս հայտնի է, թե ինչպես»,– մատնանշեց փորձագետը: 
Նրան, սակայն, ամենից շատ կրթության որակն է անհանգստացնում, այնպես չլինի` ծրագրով հաստատվեն կետեր, որոնք բացասական կանդրադառնան երեխաների կրթության որակի վրա:



Մանյա Պողոսյան